ಆಲೂ ಎಗ್ ಫ್ರೈ-ಬ್ಯಾಚುಲರ್ ರೆಸಿಪಿ

ನೀವು ಮೊಟ್ಟೆ ಪ್ರಿಯರಾಗಿದ್ದರೆ, ನಿಮಗಾಗಿ ಸರಳವಾದ, ರುಚಿಯಾದ ಸ್ಪೆಷಲ್ ಮೊಟ್ಟೆಯ ರೆಸಿಪಿ ನೀಡಿದ್ದೇನೆ ನೋಡಿ.

ಈ ಆಲೂ ಎಗ್ ಫ್ರೈ ಮಾಡಲು ಸರಳವಾದ ಪದಾರ್ಥಗಳಿದ್ದರೆ ಸಾಕು. ಈ ಆಲೂ ಎಗ್ ಫ್ರೈಯನ್ನು ಚಪಾತಿ, ಅನ್ನದ ಜೊತೆ ತಿನ್ನಲು ತುಂಬಾ ರುಚಿಯಾಗಿರುತ್ತದೆ. ಬನ್ನಿ ಇವತ್ತಿನ ಸ್ಪೆಷಲ್ ಆಲೂ ಎಗ್ ಫ್ರೈ ಮಾಡುವುದು ಹೇಗೆ ಎಂದು ನೋಡೋಣವೇ?

ಬೇಕಾಗುವ ಸಾಮಾಗ್ರಿಗಳು
ಸಾಧಾರಣ ಗಾತ್ರದ ಆಲೂಗಡ್ಡೆ 4
ಹಸಿ ಮೆಣಸು 3 (ಹಸಿ ಮೆಣಸನ್ನು ಸಮ ಅರ್ಧ ಭಾಗವಾಗಿ ಕತ್ತರಿಸಿ)
ಟೊಮೆಟೊ1
ಮೊಟ್ಟೆ 3
ಈರುಳ್ಳಿ 1
ಬೆಳ್ಳುಳ್ಳಿ 2-3 ಎಸಳು
ಎಣ್ಣೆ 1 ಚಮಚ
ಸ್ವಲ್ಪ ಸಾಸಿವೆ
ಅರ್ಧ ಚಮಚ ಉಪ್ಪು

ತಯಾರಿಸುವ ವಿಧಾನ

* ಆಲೂಗಡ್ಡೆಯನ್ನು ತೆಳ್ಳಗೆ ಕತ್ತರಿಸಿ, ತೊಳೆದು ಇಡಿ.

* ಪಾತ್ರೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ ಸಾಸಿವೆ ಹಾಕಿ, ಸಾಸಿವೆ ಚಟಾಪಟ ಶಬ್ದ ಮಾಡುವಾಗ ಈರುಳ್ಳಿ, ಬೆಳ್ಳುಳ್ಳಿ, ಹಸಿ ಮೆಣಸು ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ.

* ನಂತರ ಟೊಮೆಟೊ ಹಾಕಿ ಮೆತ್ತಗಾಗುವವರೆಗೆ ಫ್ರೈ ಮಾಡಿ, ನಂತರ ಆಲೂಗಡ್ಡೆ ಹಾಕಿ, ಅರ್ಧ ಚಮಚ ಪುಡಿ ಉಪ್ಪು ಹಾಕಿ, 1 ಕಪ್ ನೀರು ಹಾಕಿ ಬೇಯಿಸಿ.

* ಆಲೂಗಡ್ಡೆ ಬೆಂದು ನೀರು ಸಂಪೂರ್ಣ ಆವಿಯಾಗುವವರೆಗೆ ಬೇಯಿಸಿ.

* ನಂತರ ಮೊಟ್ಟೆಯನ್ನು ಹಾಕಿ ಮಿಕ್ಸ್ ಮಾಡಿ, ಮತ್ತೆ 5 ನಿಮಿಷ ಸೌಟ್ ನಿಂದ ಆಡಿಸುತ್ತಾ ಫ್ರೈ ಮಾಡಿದರೆ ಆಲೂ ಎಗ್ ಫ್ರೈ ರೆಡಿ.