ಮಧು ಪುಷ್ಪ:ಹಬ್ಬದ ಸಡಗರ ಹೆಚ್ಚಿಸಲು ಹೊಸ ಸಿಹಿತಿನಿಸು

ಬೇಕಾಗುವ ಪದಾರ್ಥಗಳು :

ಮೈದಾ ಹಿಟ್ಟು : 300 ಗ್ರಾಂ
ಉಪ್ಪು : ಒಂದು ಚಿಟಿಕೆ
ಬಿಸಿ ಹಾಲು : 1 ಕಪ್ಪು
ಸಕ್ಕರೆ : ಮುಕ್ಕಾಲು ಕಪ್ಪು
ತುಪ್ಪ : 2 ಟೇಬಲ್ ಚಮಚ
ಏಲಕ್ಕಿ : 1 ಟೇಬಲ್ ಚಮಚ
ವೆನಿಲಾ : ಒಂದೆರಡು ಹನಿ
ಹುರಿಯಲು ತುಪ್ಪ ಅಥವಾ ಎಣ್ಣೆ

ಮಾಡುವ ವಿಧಾನ :

ಮೈದಾ ಹಿಟ್ಟಿಗೆ ಚಿಟಿಕೆ ಉಪ್ಪನ್ನು ಬೆರಸಿ ಜರಡಿ ಹಿಡಿಯಬೇಕು. ಈಗ ಅದಕ್ಕೆ ತುಪ್ಪವನ್ನು ಬೆರಸಿ. ಹಾಲಿಗೆ ಏಲಕ್ಕಿ ಮತ್ತು ಸಕ್ಕರೆಯನ್ನು ಹಾಕಿ ಚೆನ್ನಾಗಿ ಕಲಸಿ. ಈಗ ಕೊಂಚ ಕೊಂಚವಾಗಿ ಮೈದಾಗೆ ಹಾಲನ್ನು ಬೆರಸುತ್ತಾ ಮೈದಾ ಹಿಟ್ಟನ್ನು ಚೆನ್ನಾಗಿ ನಾದ ಬೇಕು. ಹತ್ತು ನಿಮಿಷಗಳ ಕಾಲ ಒಂದು ಪಾತ್ರೆಯಲ್ಲಿ ಹಾಕಿ ಮುಚ್ಚಿಡಿ. ಆನಂತರ ಹಿಟ್ಟನ್ನು ಸಣ್ಣ ಗೋಲಿ ಗಾತ್ರದಿಂದ ಹಿಡಿದು ನಿಂಬೆ ಹಣ್ಣು ಗಾತ್ರದ ಉಂಡೆಗಳವರೆಗೆ ವಿವಿಧ ಆಕಾರಗಳಲ್ಲಿ ಮಾಡಿಟ್ಟುಕೊಳ್ಳಿ. ಮೊದಲು ದೊಡ್ಡ ಉಂಡೆಗಳಿಂದ ಗುಂಡನೆಯ ಪೂರಿ ಮಾಡಿಕೊಳ್ಳಿ. ಅದರ ಮೇಲೆ ಸಣ್ಣ ಉಂಡೆಗಳಿಂದ ಮಾಡಿದ ಪೂರಿ ಇಡಬೇಕು. ಈ ಪದರಗಳ ಮಧ್ಯೆ ಸಿಹಿಯಾದ ಹಾಲನ್ನು ಸ್ವಲ್ಪ ಲೇಪಿಸಬೇಕು. ಹೀಗೆ ಎಲ್ಲಾ ಪೂರಿಗಳನ್ನು ಮಾಡಿದ ಬಳಿಕ ಪೂರಿಯ ಮಧ್ಯದಲ್ಲಿ ಹೆಬ್ಬೆರಳಿನಿಂದ ಸ್ವಲ್ಪ ಒತ್ತಿ. ಏಕೆಂದರೆ ಎಲ್ಲ ಪೂರಿಗಳೂ ಒಂದಕ್ಕೊಂದು ಅಂಟಿಕೊಳ್ಳುತ್ತವೆ. ವೃತ್ತಾಕಾರದಲ್ಲಿರುವ ಪೂರಿಯನ್ನು ನಕ್ಷತ್ರಾಕಾರಕ್ಕೆ ಕತ್ತರಿಸಿಕೊಳ್ಳಿ. ಇದಕ್ಕಾಗಿ ಸಣ್ಣ ಚಾಕುವನ್ನು ಬಳಸಬಹುದು. ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆಯನ್ನು ಹಾಕಿ ನಕ್ಷತ್ರಾಕಾರಕ್ಕೆ ಕತ್ತರಿಸಿದ ಪೂರಿಗಳನ್ನು ಹೊಂಬಣ್ಣ ಬರುವವರೆಗೂ ಕಾಯಿಸಿ. ಈಗ ನಿಮ್ಮ ನೆಚ್ಚಿನ ಮಧುಪುಷ್ಪಗಳು ತಯಾರಾದಂತೆ.