ಹಬ್ಬಕ್ಕೆ ರುಚಿಕರವಾದ ಸಿಹಿ ಕಡುಬು ರೆಸಿಪಿ

ಹಬ್ಬದ ಸಮಯದಲ್ಲಿ ಸಿಹಿಕಡುಬು ಮಾಡುವುದು ಸಾಮಾನ್ಯ. ಹಬ್ಬದ ಸಮಯದಲ್ಲಿ ಒಬ್ಬಟ್ಟು ಮಾಡುವುದಾದರೆ ಹೂರಣವನ್ನು ಸ್ವಲ್ಪ ಜಾಸ್ತಿ ತಯಾರಿಸಿದರೆ ಸಾಕು, ಸಿಹಿ ಕಡುಬು ಸುಲಭವಾಗಿ ಮಾಡಬಹುದು. ಹಬ್ಬಕ್ಕೆ ಸಿಹಿ ಕಡುಬು ಮಾಡುವುದಾದರೆ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
* ಹೂರಣ 1 ಕಪ್
(ಒಂದು ಕಪ್ ಕಡಲೆ ಬೇಳೆ ಬೇಯಿಸಿ, ಮತ್ತೊಂದು ಪಾತ್ರೆಯಲ್ಲಿ ಒಂದು ಕಪ್ ಬೆಲ್ಲವನ್ನು ನೀರು ಹಾಕದೆ ಕರಗಿಸಿ. ಕರಗಿದ ಬೆಲ್ಲದ ಪಾಕಕ್ಕೆ ಬೇಯಿಸಿದ ಕಡಲೆಬೇಳೆಯನ್ನು ಹಾಕಿ ಮಿಶ್ರಮಾಡಿ. ಮಿಶ್ರಣ ತುಂಬಾ ಗಟ್ಟಿಯಾಗಿರಲಿ, ನೀರಾದರೆ ಈ ಮಿಶ್ರಣವನ್ನು ಸ್ವಲ್ಪ ಕುದಿಸಿ, ಕುದಿಸಿದ ಮಿಶ್ರಣವನ್ನು ಆರಲು ಬಿಡಿ, ಆರಿದ ಮಿಶ್ರಣವನ್ನು ನುಣ್ಣಗೆ ರುಬ್ಬಿ. ಈ ರೀತಿ ಮಾಡಿದರೆ ಹೂರಣ ರೆಡಿ.)

* ಹೋಳಿಗೆ ಮಾಡಲು ತಯಾರಿಸುವ ರೀತಿಯಲ್ಲಿ ಮೈದಾ ಹಿಟ್ಟು ತಯಾರಿಸಿ.
* ಎಣ್ಣೆ

ತಯಾರಿಸುವ ವಿಧಾನ:

1. ಕಲೆಸಿದ ಮೈದಾಹಿಟ್ಟಿನಿಂದ ಚಿಕ್ಕ ಉಂಡೆಗಳನ್ನು ಮಾಡಿ ಅವುಗಳನ್ನು ಮೊಟ್ಟೆಯ ಆಕಾರದಲ್ಲಿ ಲಟ್ಟಿಸಬೇಕು. ಹೀಗೆ ಲಟ್ಟಿಸುವಾಗ ಹಿಟ್ಟು ಲಟ್ಟಣಿಗೆಗೆ ಅಂಟುತ್ತಿದ್ದರೆ ಸ್ವಲ್ಪ ಮೈದಾ ಪುಡಿಯನ್ನು ಉದುರಿಸಿ, ನಂತರ ತಟ್ಟಿ.

2. ಹೀಗೆ ಲಟ್ಟಿಸಿರುವ ಮಧ್ಯಭಾಗದಲ್ಲಿ ಸ್ವಲ್ಪ ಹೂರಣವನ್ನು ಹಾಕಿ ನಂತರ ತುದಿಯನ್ನು ಹಾಲಿನಿಂದ ಸವರಿ ಮಡಚಿ. ಈ ರೀತಿ ಕಡುಬು ಮಾಡಿಟ್ಟುಕೊಳ್ಳಬೇಕು.

3. ಎಣ್ಣೆಯನ್ನು ಕಾಯಿಸಿ ಮಾಡಿಟ್ಟ ಕಡುಬನ್ನು ಒಂದೊಂದು ಆಗಿ ಎಣ್ಣೆಯಲ್ಲಿ ಹಾಕಿ ಕಂದು ಬಣ್ಣ ಬರುವವರೆಗೆ ಕರಿಯಿರಿ. ಈ ರೀತಿ ಮಾಡಿದರೆ ರುಚಿಯಾದ ಸಿಹಿ ಕಡುಬು ತುಪ್ಪ ಜೊತೆ ತಿನ್ನಲು ರೆಡಿ.

ಸೂಚನೆ: ಇದನ್ನು ಮಾಮೂಲಿ ಕಡುಬು ಮಾಡುವ ರೀತಿಯಲ್ಲಿ ಕೂಡ ಬೇಯಿಸಬಹುದು.