ಮಲೈ ಚಮ್ ಚಮ್- ಸಿಹಿ ತಿಂಡಿ

ಮಲೈ ಚುಮ್ ಚುಮ್ ಸಿಹಿ ತಿಂಡಿ. ಇದನ್ನು ಚೀಸ್ ನಿಂದ ತಯಾರಿಸಲಾಗುವುದು. ಈ ಮಲೈ ಸ್ವೀಟ್ ಅನ್ನು ಬೇರೆ ಬೇರೆ ಬಣ್ಣದಲ್ಲಿ ತಯಾರಿಸಲಾಗುವುದು. ಇಲ್ಲಿ ನಾವು ಕೇಸರಿ ಹಾಕಿ ತಯಾರಿಸುವ ಕಂದು ಬಣ್ಣದ ಮಲೈ ತಿಂಡಿಯ ರೆಸಿಪಿ ನೀಡಲಾಗಿದೆ.

ಈ ಬೆಂಗಾಲಿ ತಿಂಡಿಯನ್ನು ಸುಲಭವಾಗಿ ತಯಾರಿಸಬಹುದಾಗಿದ್ದು ರೆಸಿಪಿ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು
ಪನ್ನೀರ್ 2 ಕಪ್
ಸಕ್ಕರೆ 2 ಕಪ್
ನೀರು 4-5 ಕಪ್
ಕೇಸರಿ ಅರ್ಧ ಚಮಚ

ಇತರ ಸಾಮಾಗ್ರಿಗಳು
ಹಾಲು 2-3 ಕಪ್
ಸಕ್ಕರೆ 2 ಕಪ್
ಏಲಕ್ಕಿ 1 ಚಮಚ

ಅಲಂಕಾರಕ್ಕೆ
ಗೋಡಂಬಿ ಸ್ವಲ್ಪ (ಚಿಕ್ಕದಾಗಿ ಕತ್ತರಿಸಿದ್ದು)
ಸ್ವಲ್ಪ ಕೇಸರಿ

ತಯಾರಿಸುವ ವಿಧಾನ

* ಒಂದು ಬಟ್ಟಲಿನಲ್ಲಿ ಪನ್ನೀರ್ ಹಾಕಿ ಅದು ಮೃದುವಾಗುವವರೆಗೆ ಕಲೆಸಿ. ಪನ್ನೀರ್ ಸ್ವಲ್ಪ ಗಟ್ಟಿಯಾಗಿದ್ದರೆಸ್ವಲ್ಪ ಬಿಸಿ ನೀರನ್ನು ಸೇರಿಸಿ ಕಲೆಸಿ.

* ಈಗ ಸಮ ಭಾಗಗಳಾಗಿ ತೆಗೆದುಕೊಂಡು ಅದರಿಂದ ಉಂಡೆ ಕಟ್ಟಿ. ನಂತರ ಅವುಗಳನ್ನು ಮೊಟ್ಟೆಯ ಆಕಾರದಲ್ಲಿ ಮಾಡಿ ತಟ್ಟೆಯಲ್ಲಿಡಿ.

* ನಂತರ ಒಂದು ದೊಡ್ಡ ಪಾತ್ರೆಯಲ್ಲಿ ನೀರನ್ನು ಬಿಸಿ ಮಾಡಬೇಕು. ಅದು ಕುದಿಯಲಾರಂಭಿಸಿದಾಗ ಸಕ್ಕರೆ ಮತ್ತು ಕೇಸರಿ ಹಾಕಿ ತಿರುಗಿಸಿ ಸಕ್ಕರೆ ಪಾಕ ಮಾಡಿ.

* ಈಗ ಮೊಟ್ಟೆಯ ಆಕಾರದಲ್ಲಿ ತಟ್ಟಿದ ಪನ್ನೀರ್ ಅನ್ನು ಸಕ್ಕರೆ ಪಾಕಕ್ಕೆ ಹಾಕಿ. ಆಗ ಪನ್ನೀರ್ ಸಕ್ಕರೆ ನೀರನ್ನು ಹೀರಿಕೊಂಡು ಸ್ವಲ್ಪ ದಪ್ಪಗಾಗುತ್ತದೆ. ಪನ್ನೀರ್ ಸ್ವಲ್ಪ ಸ್ಪಾಂಜ್ ರೀತಿಯಲ್ಲಿ ಆದಾಗ ಗ್ಯಾಸ್ ಆಫ್ ಮಾಡಿ.

* ಈಗ ಮತ್ತೊಂದು ಪಾತ್ರೆಯಲ್ಲಿ ಹಾಲನ್ನು ಬಿಸಿ ಮಾಡಿ. ಹಾಲನ್ನು ತಿರುಗಿಸುತ್ತಾ ಬಿಸಿ ಮಾಡಿ. ಹೀಗೆ ಮಾಡಿದರೆ ಹಾಲು ಪಾತ್ರೆಗೆ ಅಂಟುವುದಿಲ್ಲ. ಹಾಲು ಗಟ್ಟಿಯಾಗುವವರೆಗೆ ಕುದಿಸಿ. ನಂತರ ಅದಕ್ಕೆ ಸಕ್ಕರೆ ಮತ್ತು ಏಲಕ್ಕಿ , ಕೇಸರಿ, ಬಾದಾಮಿ ಹಾಕಿ 2 ನಿಮಿಷ ಕುದಿಸಿ ಉರಿಯಿಂದ ತೆಗಯರಿ.

* ಈಗ ಮೊಟ್ಟೆಯಾಕಾರದ ಪನ್ನೀರ್ ಅನ್ನು ಕತ್ತರಿಸಿ, ಅದರೊಳಗೆ ಹಾಲಿನ ಮಿಶ್ರಣ ತುಂಬಿದರೆ ಮಲೈ ಚಮ್ ಚಮ್ ರೆಡಿ.