ಮಕ್ಕಳ ದಿನಾಚರಣೆಗೆ ಸ್ಪೆಷೆಲ್-ಕಾಫಿ ಕುಕ್ಕೀಸ್

ಮಕ್ಕಳ ದಿನಾಚರಣೆಯ ವಿಶೇಷವಾಗಿ ನಿಮ್ಮ ಮಕ್ಕಳು ಶಾಲೆಯಿಂದ ಬರುವಷ್ಟರಲ್ಲಿ ಏನಾದರೂ ವಿಶೇಷ ಅಡುಗೆ ಮಾಡಿಟ್ಟರೆ ಅವರಿಗೆ 'ನಮ್ಮ ದಿನವನ್ನು ಶಾಲೆಯಲ್ಲಿ ಮಾತ್ರವಲ್ಲ ಮನೆಯಲ್ಲೂ ಇಷ್ಟೊಂದು ವಿಶೇಷವಾಗಿ ಆಚರಿಸುತ್ತಿದ್ದಾರಲ್ಲ' ಎಂದು ತುಂಬಾ ಖುಷಿಯಾಗುವವರು.

ಮಕ್ಕಳಿಗೆ ಕುಕ್ಕೀಸ್ ಅಂದರೆ ತುಂಬಾ ಇಷ್ಟವಿರುತ್ತದೆ. ಈ ಕುಕ್ಕೀಸ್ ಅನ್ನು ಸುಲಭವಾಗಿ ಮಾಡಬಹುದಾಗಿದ್ದು ಇಲ್ಲಿ ನಾವು ಕಾಫಿ ಕುಕ್ಕೀಸ್ ನ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು:
* ಮೈದಾ ಒಂದೂವರೆ ಕಪ್
* ಬೆಣ್ಣೆ 50 ಗ್ರಾಂ
* ಬ್ರೌನ್ ಶುಗರ್ ಪುಡಿ 4 ಚಮಚ
* ಕಾಫಿ ಪುಡಿ 2 ಚಮಚ (instant coffee)
* ವೆನಿಲ್ಲಾ ಎಸೆನ್ಸ್ 4 ಹನಿ
* ಮೊಟ್ಟೆಯ ಬಿಳಿ 2
* ತೆಂಗಿನ ತುರಿ ಅರ್ಧ ಕಪ್
* ಚಿಟಿಕೆಯಷ್ಟು ಉಪ್ಪು
* ಅಡುಗೆ ಸೋಡಾ 1 ಚಮಚ
* ಬೇಕಿಂಗ್ ಮೋಲ್ಡ್ 20
* ಬೆಣ್ಣೆ 1 ಕಪ್
* ಬಟರ್ ಪೇಪರ್ 1 ಶೀಟ್

ತಯಾರಿಸುವ ವಿಧಾನ:

* ಬೆಣ್ಣೆಯನ್ನು ಬಿಸಿ ಮಾಡಿ ಕರಗಿಸಬೇಕು. ಈಗ ಕರಗಿದ ಬೆಣ್ಣೆಗೆ ಸಕ್ಕರೆಯನ್ನು ಹಾಕಿ ಚೆನ್ನಾಗಿ ಕದಡಬೇಕು.

* ನಂತರ ಮೊಟ್ಟೆಯ ಬಿಳಿ ಮತ್ತು ವೆನಿಲ್ಲಾ ಎಸೆನ್ಸ್ ಹಾಕಿ 3-4 ನಿಮಿಷ ಸ್ಪೂನ್ ನಿಂದ ಚೆನ್ನಾಗಿ ಕದಡಬೇಕು.

* ನಂತರ ಮತ್ತೊಂದು ಪಾತ್ರೆ ತೆಗೆದುಕೊಳ್ಳಿ (ಪಾತ್ರೆ ಸ್ವಲ್ಪ ದೊಡ್ಡದಿರಲಿ). ಆ ಪಾತ್ರೆಗೆ ಮೈದಾ ಹಿಟ್ಟು, ಅಡುಗೆ ಸೋಡಾ, ಕಾಫಿ ಪುಡಿ, ಚಿಟಿಕೆಯಷ್ಟು ಉಪ್ಪು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು. ನಂತರ ಬೆಣ್ಣೆ ಮತ್ತು ಮೊಟ್ಟೆಯ ಮಿಶ್ರಣವನ್ನು ಸುರಿಯಬೇಕು. ನಂತರ ಈ ಮಿಶ್ರಣಕ್ಕೆ ಸ್ವಲ್ಪ ಬಿಸಿ ನೀರು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ನಂತರ ತೆಂಗಿನ ತುರಿಯನ್ನು ಹಾಕಿ ಮತ್ತೊಮ್ಮೆ ಚೆನ್ನಾಗಿ ಕಲೆಸಿ.

* ನಂತರ ಮೈಕ್ರೋ ಓವನ್ ಅನ್ನು 350 ಡಿಗ್ರಿ Fಗೆ ಬಿಸಿ ಮಾಡಿ.

* ಈಗ ಬೇಕಿಂಗ್ ಮೌಲ್ಡ್ ಗೆ ಬೆಣ್ಣೆ ಸವರಿ ಅದರಲ್ಲಿ ಮಿಶ್ರಣವನ್ನು ಸುರಿಯಿರಿ, ನಂತರ ಅದನ್ನು ಬಟರ್ ಶೀಟ್ ನಿಂದ ಕವರ್ ಮಾಡಿ ಶೇ 60ರಷ್ಟು ಪವರ್ ನಲ್ಲಿ 7-10 ನಿಮಿಷ ಬೇಯಿಸಿ.

ನಂತರ ಅವುಗಳನ್ನು ತೆಗೆದು ತಣ್ಣಗಾಗಲು ಇಡಿ. ನಂತರ ಅವುಗಳನ್ನು ಬಿಳಿಯ ಕ್ರೀಮ್ ನಿಂದ ಅಲಂಕರಿಸಿದರೆ ಮಕ್ಕಳ ಮೆಚ್ಚಿನ ಕಾಫಿ ಕುಕ್ಕೀಸ್ ರೆಡಿ.