ಅವಲಕ್ಕಿ ಲಾಡು : ಬಾಯಿಗೆ ಹಾಕಿ ನೋಡು!

ಒಂದು ಲೋಟ ಅವಲಕ್ಕಿ, ಒಂದು ಲೋಟ ಸಕ್ಕರೆ ಪುಡಿ, ಸಾಕಷ್ಟು ತುಪ್ಪ ನಿಮ್ಮ ಮನೆಯಲ್ಲಿ ಇದೆ ಅನ್ನುವುದಾದರೇ, ಈಗಲೇ ನೀವು ಅವಲಕ್ಕಿ ಲಾಡು ಮಾಡಲು ಮುಂದಾಗಬಹುದು. ಇಷ್ಟರ ಜೊತೆಗೆ ಯಾಲಕ್ಕಿ ಪುಡಿ, ಕೊಬ್ಬರಿ ಸಹಾ ಹೊಂದಿಸಿಕೊಳ್ಳಿ. ಇವೆರಡೂ ಇಲ್ಲದೇ, ಎಂಥಾ ಲಾಡು ಮಾಡಲು ಸಾಧ್ಯ ಅಲ್ವಾ?

ಮೊದಲು ಬಾಣಲೆಗೆ ಸ್ವಲ್ಪ ಅವಲಕ್ಕಿ ಹಾಕಿ, ಹುರಿಯಿರಿ. ಎಣ್ಣೆ ಹಾಕದೇ ಹುರಿಯಬೇಕು. ಆಮೇಲೆ ಮಿಕ್ಸಿಗೆ ಹಾಕಿ ಪುಡಿ ಮಾಡಿ. ಅಲ್ಲಿಗೆ ಅರ್ಧ ಕೆಲಸ ಮುಗಿಯಿತು. ಇದಕ್ಕೂ ಮುನ್ನವೇ ಕೊಬ್ಬರಿ ತುರಿ, ಯಾಲಕ್ಕಿ ಪುಡಿ ರೆಡಿ ಮಾಡೋದನ್ನು ಮರೆಯಬೇಡಿ.

ಈಗ ಅವಲಕ್ಕಿ ಪುಡಿಗೆ ಕೊಬ್ಬರಿ ತುರಿ, ಯಾಲಕ್ಕಿ ಪುಡಿ ಮತ್ತು ಸಕ್ಕರೆ ಪುಡಿಯನ್ನು ಸೇರಿಸಿ. ತುಪ್ಪವನ್ನೂ ಹಾಕಿ ಮಿಶ್ರಣ ಮಾಡಿ. ಆಮೇಲೆ ನಿಮಗೆ ಇಷ್ಟವಾಗುವಷ್ಟು ಗಾತ್ರದಲ್ಲಿ ಉಂಡೆ ಮಾಡಿ. ಈಗ ಅವಲಕ್ಕಿ ಲಾಡು ರೆಡಿ.

(ದಟ್ಸ್ ಕನ್ನಡ ಪಾಕಶಾಲೆ)