ಸಂಭ್ರಮದ ಹೊಸ ವರ್ಷಕ್ಕೆ ಸಿಹಿ ಸಿಹಿ ಪೂರಿ ಮಾಡಿ

Sweets

oi-Sumalatha

By Sumalatha

Published: Saturday, December 31, 2011, 11:36 [IST]

ಹೊಸ ವರ್ಷ ಒಂಥರಾ ಹಬ್ಬವಿದ್ದಂತೆ. ಅದರಲ್ಲೂ ವರುಷದ ಮೊದಲ ದಿನ ಸಂತೋಷ ಸಂಭ್ರವಿದ್ದರೆ ವರ್ಷವಿಡೀ ಸಂತೋಷವಾಗಿರುತ್ತೇವೆ ಎಂಬ ನಂಬಿಕೆ. ಆದ್ದರಿಂದ ಹೊಸ ವರ್ಷಕ್ಕೆ ಸಿಹಿ ತಿನಿಸುಗಳನ್ನು ಮಾಡುವುದು, ಹಂಚುವುದು ರೂಢಿ. ಆದರೆ ಈ ಬಾರಿ ಹೊಸ ವರುಷಕ್ಕೆ ಸ್ವಲ್ಪ ಸ್ಪೆಷಲ್ ಇರಲಿ.

ಅಂಗಡಿಗಳಿಂದ ಸಿಹಿ ತಿಂಡಿಗಳನ್ನು ತರುವ ಬದಲು ಮನೆಯಲ್ಲೇ ಮಕ್ಕಳಿಗೆ, ನಿಮಗೆ ಅಚ್ಚುಮೆಚ್ಚಾಗುವ ಸಿಹಿ ಪೂರಿಗಳನ್ನು ತಯಾರಿಸಿ. ಅದೂ ಕೂಡ ಕಡಿಮೆ ಅವಧಿಯಲ್ಲಿ. ಸಿಹಿ ಪೂರಿ ಮಾಡುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಸಿಹಿ ಪೂರಿಗೆ ಏನೇನು ಬೇಕು?
* ಒಂದು ಬಟ್ಟಲು ಮೈದಾಹಿಟ್ಟು
* ಸ್ವಲ್ಪ ಡಾಲ್ಡ / ಬೆಣ್ಣೆ / ತುಪ್ಪ
* 2 ದೊಡ್ಡ ಚಮಚ ಸಕ್ಕರೆ ಪುಡಿ
* ಸ್ವಲ್ಪ ಕೊಬ್ಬರಿತುರಿ
* ಎಣ್ಣೆ

ಸಿಹಿ ಪೂರಿ ತಯಾರಿಸುವ ವಿಧಾನ:
* ಮೊದಲು ಮೈದಾ, ಸಕ್ಕರೆಪುಡಿ ಮತ್ತು ಡಾಲ್ಡ ಎಲ್ಲವನ್ನು ಚೆನ್ನಾಗಿ ಬೆರೆಸಿ, ನೀರು ಹಾಕಿ ಗಟ್ಟಿಯಾಗಿ ಪೂರಿ ಹಿಟ್ಟಿನ ಹದಕ್ಕೆ ಅಥವ ಅದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಕಲೆಸಿಕೊಂಡು 15 ನಿಮಿಷ ಬಿಡಬೇಕು.

* ಈ ಹಿಟ್ಟಿನಿಂದ ಉಂಡೆ ಮಾಡಿಕೊಂಡು ಪೂರಿಯಂತೆ ಮಣೆ ಮೇಲೆ ಲಟ್ಟಿಸಿಕೊಳ್ಳಬೇಕು (ಸ್ವಲ್ಪ ತೆಳುವಾಗಿರಲಿ)

* ನಂತರ ಕಾದಿರುವ ಎಣ್ಣೆಯಲ್ಲಿ ಎರಡೂ ಕಡೆಯಲ್ಲಿ ಬೇಯಿಸಿಕೊಳ್ಳಬೇಕು. ಪೂರಿ ಎಣ್ಣೆ ಹೀರಿಕೊಳ್ಳಲು ಪೇಪರ್ ಮೇಲೆ ಈ ಪೂರಿಗಳನ್ನು ಹಾಕಿಡಬೇಕು.

* ತಕ್ಷಣವೇ ಅಂದರೆ ಬಿಸಿ ಇರುವಾಗಲೇ ಪೂರಿಯ ಎರಡು ಕಡೆಗೂ ಸಕ್ಕರೆಪುಡಿ ಮತ್ತು ಕೊಬ್ಬರಿ ತುರಿ ಉದುರಿಸಬೇಕು.

* ಸಕ್ಕರೆ ಉದುರಿಸುವ ಬದಲು ಸಕ್ಕರೆ ಪಾಕ ಮಾಡಿಕೊಂಡು ಅದರಲ್ಲಿ ಅದ್ದಿ ತೆಗೆಯಲೂಬಹುದು. ನಂತರ ಕೊಬ್ಬರಿ ಉದುರಿಸಬಹುದು. ಈಗ ಸಿಹಿ ಪೂರಿ ತಿನ್ನಲು ಸಿದ್ಧವಾಗಿರುತ್ತೆ. ತುಂಬಾ ಸುಲಭವಾಗಿ ತಯಾರಿಸಬಹುದಾದ ಈ ಸಿಹಿಪೂರಿ ಹೊಸ ವರುಷಕ್ಕೆ ಹೇಳಿ ಮಾಡಿಸಿದ್ದು.

[ಕೃಪೆ: ಅಡುಗೆ ಸವಿರುಚಿ]