ಕೇಸರಿ ಪೇಡಾ ಗಮ್ಮತ್ತು ತಿಂದವರಿಗಷ್ಟೇ ಗೊತ್ತು..

Sweets

oi-Sumalatha

By Sumalatha

Published: Tuesday, November 22, 2011, 15:51 [IST]

ಸ್ವೀಟ್ ತಯಾರಿಸಲು ಹಬ್ಬಗಳೇ ಕಾರಣವಾಗಬೇಕೆಂದೇನಿಲ್ಲ. ಮನಸ್ಸಿಗೆ ಬೇಕೆನಿಸಿದಾಗ, ನಾಲಿಗೆ ರುಚಿ ಬಯಸಿದಾಗ ಸಿಹಿ ತಿನಿಸು ಮಾಡಿ ತಿಂದರೆ ಚೆಂದ. ಅದರಲ್ಲೂ ಹಾಲಿನಿಂದ ಮಾಡಿದ ಖೀರು, ಹಲ್ವಾ, ಪೇಡಾ ಎಂತಹವರಿಗೂ ಬಾಯಿ ನೀರೂರುವಂತೆ ಮಾಡುತ್ತೆ. ಹಾಲು ಬೆರೆಸಿದ ಕೇಸರಿ ಪೇಡ ಮಾಡುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಂಡು ಹೊಸ ರುಚಿಯನ್ನು ನೀವೂ ಸವಿಯಬಹುದು.

ಕೇಸರಿ ಪೇಡಾ ತಯಾರಿಸಲು ಏನೇನು ಬೇಕು?
* 1 ಲೀಟರ್ ಹಾಲು
* 100 ಗ್ರಾಂ ಸಕ್ಕರೆ
* ಏಲಕ್ಕಿ ಪುಡಿ
* ಕೇಸರಿ
* 4-8 ತುಂಡು ಪಿಸ್ತಾ

ಕೇಸರಿ ಪೇಡಾ ತಯಾರಿಸುವ ವಿಧಾನ:
* ಪಾತ್ರೆಯಲ್ಲಿ ಹಾಲನ್ನು ಹಾಕಿ ಗಟ್ಟಿಯಾಗುವವರೆಗೂ ಕಾಯಿಸುತ್ತಾ ತಿರುಗಿಸುತ್ತಿರಬೇಕು. ಹಾಲು ಕೋವಾದಂತೆ ಗಟ್ಟಿಯಾಗುವಂತೆ ಕಾಯಿಸಬೇಕು.

* ಈಗ ಹಾಲಿಗೆ ಸಕ್ಕರೆ ಬೆರೆಸಿ ಅದು ಕರಗುವವರೆಗು ತಿರುಗಿಸಬೇಕು. ಪಾತ್ರೆಗೆ ಹಾಲು ಅಂಟಿಕೊಳ್ಳದಂತೆ ನೋಡಿಕೊಳ್ಳಬೇಕು. ಗಟ್ಟಿ ಹಾಲು ಸಕ್ಕರೆ ಕರಗಿ ತೆಳುವಾಗುತ್ತಿರುವಾಗ ಕಡಿಮೆ ಉರಿಯಲ್ಲಿ ಕಾಯಿಸಬೇಕು.

* ಕೇಸರಿಯನ್ನು ಗಟ್ಟಿಯಾಗಿರುವ ಹಾಲಿಗೆ ಹಾಕಿ ಚೆನ್ನಾಗಿ ಬೆರೆಸಿ ಹಾಲಿನ ಬಣ್ಣ ಕೇಸರಿ ಹಳದಿ ಬಣ್ಣದ ಮಿಶ್ರಣಕ್ಕೆ ತಿರುಗಬೇಕು.

* ನಂತರ ಈ ಮಿಶ್ರಣ ಗಟ್ಟಿಯಾದಾಗ ಉರಿ ಆರಿಸಿ ಚೆನ್ನಾಗಿ ಕದಡಿ ತಣ್ಣಗಾಗಲು ಬಿಡಬೇಕು. ತಣ್ಣಗಾದ ನಂತರ ಮಿಶ್ರಣದಿಂದ ಸಣ್ಣ ಸಣ್ಣ ಉಂಡೆ ಮಾಡಿ ಅದರ ಮೇಲೆ ಪಿಸ್ತಾ ಅಂಟಿಸಿದರೆ ಕೇಸರಿ ಪೇಡಾ ತಿನ್ನಲು ಬಲು ರುಚಿಯಾಗಿರುತ್ತೆ.