ಮಕರ ಸಂಕ್ರಾಂತಿಗೆ ಸವಿ ಸವಿ-ಸ್ವಾದಿಷ್ಟ ತಿನಿಸುಗಳು

Sweets

oi-Staff

By Super

Published: Tuesday, March 27, 2012, 17:47 [IST]

ಸಕ್ಕರೆ ಅಚ್ಚು, ಎಳ್ಳುಬೆಲ್ಲ, ಪಾಯಸ, ಸಿಹಿ ಹುಗ್ಗಿ, ಬರ್ಫಿ, ಹೋಳಿಗೆ... ಅಬ್ಬಬ್ಬಾ ಎಷ್ಟೊಂದು ಹಬ್ಬದ ಅಡುಗೆ....ಯಾರು ಮಾಡಿದ್ರು ಇಷ್ಟೆಲ್ಲ?

ಎಳ್ಳು ಹೋಳಿಗೆ

ಬೇಕಾಗುವ ಸಾಮಾಗ್ರಿ : ಒಂದು ಬಟ್ಟಲು ಕರಿ ಅಥವಾ ಬಿಳಿ ಎಳ್ಳು, ಒಂದು ಬಟ್ಟಲು ಬೆಲ್ಲ, ಒಂದು ಕಪ್‌ ಮೈದಾಹಿಟ್ಟು, ಒಂದು ಚಮಚ ಗಸಗಸೆ, ಏಲಕ್ಕಿ.

ಮಾಡುವ ವಿಧಾನ : ಎಳ್ಳನ್ನು ಸ್ವಲ್ಪ ಸ್ವಲ್ಪವೇ ಬಾಣಲೆಗೆ ಹಾಕಿ ಹದವಾಗಿ ಹುರಿಯಿರಿ. ಗಸಗಸೆ, ಏಲಕ್ಕಿ, ಬೆಲ್ಲದ ಪುಡಿ, ಎಳ್ಳು ಸೇರಿಸಿ ಪುಡಿ ಮಾಡಿ ಬೆರೆಸಿ ಎಳ್ಳಿನ ಹೂರಣ ಮಾಡಿ. ನಂತರ ಮೈದಾಹಿಟ್ಟಿಗೆ ನೀರು ಹಾಕಿ ಚಪಾತಿ ಹಿಟ್ಟಿನಂತೆ ಕಲಸಿ. ಒಂದು ಗಂಟೆಯ ನಂತರ ಚಪಾತಿ ರೀತಿಯಲ್ಲಿ ಲಟ್ಟಿಸಿ ಮಧ್ಯೆ ಎಳ್ಳಿನ ಹೂರಣ ಇಟ್ಟು ಮಡಚಿ ಪುನಃ ಲಟ್ಟಿಸಿ ಎಣ್ಣೆ ಹಾಕಿ ಹೊಂಬಣ್ಣಕ್ಕೆ ಬರುವವರೆಗೂ ಎರಡೂ ಕಡೆ ಬೇಯಿಸಿ. ನಂತರ ತುಪ್ಪ ಹಾಕಿ ತಿನ್ನಬಹುದು.

***

ಡ್ರೆೃ ಬರ್ಫಿ

ಬೇಕಾಗುವ ಸಾಮಗ್ರಿ : ಸಕ್ಕರೆ , ಪುಡಿ ಮಾಡಿದ ಹುರಿಗಡಲೆ, ಗಸಗಸೆ, ದ್ರಾಕ್ಷಿ, ಗೋಡಂಬಿ, ಕೊಬ್ಬರಿ, ಬಾದಾಮಿ.

ಮಾಡುವ ವಿಧಾನ : ಸಕ್ಕರೆ ಪಾಕ ಮಾಡಿಕೊಂಡು ಅದಕ್ಕೆ ಪುಡಿ ಮಾಡಿದ ಹುರಿಗಡಲೆ ಹಾಕಿ. ನಂತರ ಹುರಿದ ಗಸೆ ಸಗಸೆ, ದ್ರಾಕ್ಷಿ, ಗೋಡಂಬಿ, ಕೊಬ್ಬರಿ ತುರಿ, ಬಾದಾಮಿ, ಎರಡು ಚಮಚ ತುಪ್ಪ ಹಾಕಿ ಗಟ್ಟಿಯಾಗುವವರೆಗೂ ಚೆನ್ನಾಗಿ ಕೆದಕಿ, ಆನಂತರ ತುಪ್ಪ ಸವರಿದ ತಟ್ಟೆಗೆ ಹಾಕಬೇಕು. ಒಣಗಿದ ನಂತರ ನಿಮಗೆ ಬೇಕಾದಂತೆ ಕತ್ತರಿಸಿಕೊಳ್ಳಿ.

***

ಅಕ್ಕಿ, ಕಡಲೆ ಬೇಳೆ ಪಾಯಸ

ಬೇಕಾಗುವ ಸಾಮಗ್ರಿ : ಹುರಿದ ಅಕ್ಕಿ, ಗಸಗಸೆ, ಬೆಲ್ಲ, ಕಾಯಿತುರಿ, ಬೇಯಿಸಿದ ಕಡಲೆ ಬೇಳೆ ಹಾಗೂ ಬೆಲ್ಲ.

ಮಾಡುವ ವಿಧಾನ : ಮೊದಲು ಅಕ್ಕಿ ಹಾಗೂ ಗಸಗಸೆಯನ್ನು ಪ್ರತ್ಯೇಕವಾಗಿ ಹುರಿದುಕೊಳ್ಳಬೇಕು. ಅದಕ್ಕೆ ಬೆಲ್ಲ , ಕಾಯಿತುರಿ ಎಲ್ಲಾ ಹಾಕಿ ರುಬ್ಬಿಕೊಳ್ಳಬೇಕು. ಬೇಯಿಸಿದ ಕಡಲೆ ಬೇಳೆಗೆ ಸ್ವಲ್ಪ ನೀರು ಹಾಕಿ ಈ ರುಬ್ಬಿದ ಮಿಶ್ರಣವನ್ನು ಸೇರಿಸಿ ಚೆನ್ನಾಗಿ ಕುದಿಸಬೇಕು. ಆನಂತರ ಸ್ವಲ್ಪ ಬಿಸಿ ಹಾಲು ಸೇರಿಸಿ. ಸಿಹಿ ಸಿಹಿ ಪಾಯಸದಿಂದ ದಿನವೆಲ್ಲ ಸಿಹಿ.

***

ಬಾದಾಮಿ ಖೀರು

ಬೇಕಾಗುವ ಸಾಮಗ್ರಿ : ಅರ್ಧ ಲೀಟರ್‌ ಹಾಲು, 125 ಗ್ರಾಂ. ಬಾದಾಮಿ, ಎರಡು ಏಲಕ್ಕಿ, 25 ಗ್ರಾಂ. ಸಕ್ಕರೆ.

ಮಾಡುವ ವಿಧಾನ : ಬಾದಾಮಿಯನ್ನು ಮೆತ್ತಗಾಗುವವರೆಗೆ ನೆನೆಸಿ ತರಿತರಿಯಾಗಿ ರುಬ್ಬಿಕೊಳ್ಳಿ. ಇದಕ್ಕೆ ಹಾಲು, ಸಕ್ಕರೆ ಸೇರಿಸಿ ಇಪ್ಪತ್ತು ನಿಮಿಷಗಳ ಕಾಲ ಬೇಯಿಸಿ. ಕೆಳಗಿಳಿಸಿ ಏಲಕ್ಕಿ ಪುಡಿ ಬೆರೆಸಿ ಮಿಶ್ರ ಮಾಡಿ. ಸರ್ವ್‌ ಮಾಡುವಾಗ ಸ್ಟೀಲ್‌ ಲೋಟ ಬೇಡ. ಶೋಕೇಸಿನಲ್ಲಿರುವ ಒಳ್ಳೆ ಗಾಜಿನ ಲೋಟಗಳನ್ನು ಹೊರಗೆ ತೆಗೆಯಿರಿ.

- ನೀಲು ಬಸವಣ್ಣ ಹಿರೇಮಠ, ದಾಂಡೇಲಿ