ಮಲೆನಾಡು ಮತ್ತು ಕರಾವಳಿಯ ‘ಹಸಿ ಶುಂಠಿ ತಂಬ್ಳಿ’

ಹಸಿ ಶುಂಠಿ - ಸುಮಾರು ಒಂದು ಇಂಚು
ಕಾಳು ಮೆಣಸು - ಆರು ಕಾಳು
ಉದ್ದಿನ ಬೇಳೆ - 1/2 ಟೀ ಚಮಚ
ಹಸೀ ತೆಂಗಿನಕಾಯಿ ತುರಿ - ಒಂದು ಟೇಬಲ್‌ ಚಮಚ ತುಂಬಾ.
ಒಗ್ಗರಣೆಗೆ- ಕಾಲು ಟೀ ಚಮಚ ಸಾಸಿವೆ, ಕರಿಬೇವು ಹತ್ತು ಎಲೆ, ಒಣಮೆಣಸಿನ ಕಾಯಿ ಒಂದು ಮತ್ತು ಅಡುಗೆಯ ಎಣ್ಣೆ ಎರಡು ಟೀ ಚಮಚ ಹಾಗೂ,
ರುಚಿಗೆ ತಕ್ಕಷ್ಟು ಉಪ್ಪು.

ತಂಬ್ಳಿ ತಯಾರಿಕೆಯ ವಿಧಾನ :

ಹಸಿ ಶುಂಠಿಯನ್ನು ಅತೀ ಚಿಕ್ಕದಾಗಿ ಹೆಚ್ಚಿಕೊಳ್ಳಿ, ಸಣ್ಣಗೆ ತುರಿದರೂ ಆಗಬಹುದು. ಒಂದು ಚಿಕ್ಕ ಬಾಣಲೆಯಲ್ಲಿ ಒಂದು ಟೀ ಚಮಚ ಎಣ್ಣೆಯನ್ನು ಹಾಕಿ ಸಣ್ಣ ಉರಿಯಲ್ಲಿ ಬಿಸಿಮಾಡಿಕೊಳ್ಳಿ. ಈ ಬಿಸಿ ಎಣ್ಣೆಗೆ ತುರಿದ ಶುಂಠಿ, ಕಾಳು ಮೆಣಸು ಮತ್ತು ಉದ್ದಿನ ಬೇಳೆ ಇವನ್ನು ಹಾಕಿ ಸುಮಾರು ಒಂದು ನಿಮಿಷ ಹುರಿಯಿರಿ. ಒಲೆಯಿಂದ ಬಾಣಲೆಯನ್ನು ಇಳಿಸಿರಿ.

ಈ ಪದಾರ್ಥಗಳು ತಣಿದಮೇಲೆ, ಇವಕ್ಕೆ ತೆಂಗಿನ ಕಾಯಿತುರಿ ಮತ್ತು ಎರಡು ಟೀ ಚಮಚ ನೀರು ಸೇರಿಸಿ ಮಿಕ್ಸಿಯ ಚಟ್ನಿ ಜಾರ್‌ಗೆ ಹಾಕಿ ನುಣ್ಣನೆ ತಿರುವಿರಿ. ತಮ್ಮ ರುಚಿಗೆ ತಕ್ಕಂತೆ ಒಂದು ಕಪ್‌ ಮೊಸರು ಅಥವಾ ಕಡೆದ ಮಜ್ಜಿಗೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಬೆರಸಿಕೊಳ್ಳಿ. ಒಂದು ಚಮಚ ಎಣ್ಣೆಯಲ್ಲಿ ಸಾಸಿವೆ ಹಾಕಿ ಬಿಸಿಮಾಡಿ. ಸಾಸಿವೆ ಸಿಡಿಯಲು ಶುರುವಾದಾಗ ಒಣಮೆಣಸಿನ ಕಾಯಿಯ ಚೂರುಗಳನ್ನು ಮತ್ತು ಕರಿಬೇವಿನ ಎಲೆಗಳನ್ನು ಕಮ್ಮನೆ ಹುರಿದು ಮೇಲಿನ ಮಿಶ್ರಣಕ್ಕೆ ಒಗ್ಗರಣೆ ಹಾಕಿರಿ.

ಈಗ ‘ಹಸೀ ಶುಂಠಿ ತಂಬ್ಳಿ’ ಅಥವಾ ನಮ್ಮ ಮಲೆನಾಡಿನ ಭಾಷೆಯಲ್ಲಿ ‘ಶುಂಠಿಯ ಹಸೀವಳೆ’ ತಯಾರ್‌!

ಸರ್ವ ಋತುಗಳಲ್ಲೂ ಆಹಾರ ವ್ಯತ್ಯಾಸಗಳಿಂದ ಉಂಟಾಗುವ ಅಜೀರ್ಣದ ತೊಂದರೆಗಳಿಗೆ ಇದು ನಮ್ಮಲ್ಲಿಯ ಮನೆಮದ್ದು. ......... ಅಲ್ಲದೆ ಊಟಕ್ಕೂ ರುಚಿ.