ಪಾಕಶಾಲೆ: ರುಚಿಕರ ನೆಲಗಡಲೆ ಟಾಫಿ

ಬಡವರ ಬಾದಾಮಿ ನೆಲಗಡಲೆಯಲ್ಲಿ ಏನೆಲ್ಲಾ ಹೊಸ ಹೊಸ ರುಚಿಗಳನ್ನು ಮಾಡಬಹುದೋ ಹಾಗೆಯೇ ಇಲ್ಲೊಂದು ಹಳೆರುಚಿಯನ್ನು ಮಾಡಲಾಗಿದೆ. ಅದೇ ನೆಲಗಡಲೆ ಟಾಫಿ. ಇದನ್ನು ಟಾಫಿ ಎಂದು ಕರೆಯಲುನಿಮ್ಮ ಆಕ್ಷೇಪವೇನಾದರೂ ಇದ್ದರೆ ಮಿಠಾಯಿ ಅಥವಾ ಬರ್ಫಿ ಎಂದು ಕರೆಯಬಹುದು. ಹೆಸರಿನಲ್ಲೇನಿದೆ ಬಿಡಿ ನೆಲಗಡಲೆ ಟಾಫಿಯ ರುಚಿ ಮಾತ್ರ ಅದ್ಭುತ.

ಬೇಕಾಗುವ ಪದಾರ್ಥಗಳು

ಸಕ್ಕರೆ: 1¼ ಕಪ್ಪು
ಬೆಣ್ಣೆ: 1 ಟೇಬಲ್ ಚಮಚ
ಕಡಲೆ ಬೀಜ: 2 ಕಪ್ಪು

ಮಾಡುವ ವಿಧಾನ

ಕಡಲೆ ಬೀಜವನ್ನು ಹುರಿದು ಕುಟ್ಟಿ ತರಿತರಿಯಾಗಿ ಮಾಡಿಕೊಳ್ಳಬೇಕು. ಸಕ್ಕರೆ ಅಥವಾ ಬೆಲ್ಲಕ್ಕೆ ಸ್ವಲ್ಪ ನೀರು ಸೇರಿಸಿ ಬಾಣಲೆಯಲ್ಲಿ ಹಾಕಿಕೊಂಡು ಮಧ್ಯಮ ಗಾತ್ರದ ಉರಿಯಲ್ಲಿ ಬಿಸಿ ಮಾಡಬೇಕು. ಸಕ್ಕರೆ ಕರಗಿ ಪಾಕ ತಯಾರಾಗುತ್ತದೆ. 5 ನಿಮಿಷಗಳ ಕಾಲ ಹಾಗೇ ಕಲಕುತ್ತಿರಬೇಕು. ಪಾಕ ಉಂಡೆಪಾಕ ಆದ ನಂತರ ಸ್ವಲ್ಪ ಕಂದು ಬಣ್ಣಕ್ಕೆ ತಿರುಗುತ್ತದೆ.

ಈಗ ಬೆಣ್ಣೆಯನ್ನು ಹಾಕಿ ಚೆನ್ನಾಗಿ ಕಲಕಬೇಕು. ನಂತರ ನೆಲಗಡಲೆ ಹಾಕಬೇಕು. ತುಪ್ಪ ಸವರಿದ ತಟ್ಟೆಗೆ ಇದಿಷ್ಟನ್ನು ಹರಡಬೇಕು. ತಣ್ಣಗಾದ ನಂತರ ಬಿಲ್ಲೆಗಳಾಗಿ ಬರುತ್ತದೆ. ಬಿಸಿಯಾಗಿರುವಾಗಲೇ ಉಂಡೆಗಳಾಗಿಯೂ ಮಾಡಿಕೊಳ್ಳಬಹುದು. ಮಧ್ಯಮ ಗಾತ್ರದ 2 ಡಜನ್ ಉಂಡೆಗಳನ್ನು ಮಾಡಿಕೊಳ್ಳಬಹುದು.

(ದಟ್ಸ್‌ಕನ್ನಡ ಪಾಕಶಾಲೆ)