ಬೇಸಿಗೆ ಸ್ಪೆಷಲ್ ಡಿಲೈಟ್ : ಸಪೋಟಾ ಐಸ್ ಕ್ರೀಂ

Sweets

oi-Prasad P Naik

By Prasad

Published: Friday, April 15, 2011, 19:21 [IST]

ಮಕ್ಕಳಿಗೆ ಬೇಸಿಗೆ ರಜೆ ಹೇಗಿದ್ದರೂ ಪ್ರಾರಂಭವಾಗಿದೆ. ಪಾಟಿಚೀಲವನ್ನು ಮೂಲೆಗೆ ಎಸೆದು ಆಟಕ್ಕೆಂದು ಅಜ್ಜಿಯ ಮನೆಗೆ ಹೋಗುವ ಕಾಲ. ಅಪ್ಪನ ಸಿಡಿಮಿಡಿಯೂ ಇಲ್ಲ, ಅಮ್ಮನ ಗದರಿಕೆಯೂ ಇಲ್ಲ. ಏನಾದರೂ ತಿಂದರೆ ಕೆಮ್ಮು, ನೆಗಡಿ, ಜ್ವರ ಬಂದು ಕ್ಲಾಸು ಮಿಸ್ಸಾಗುತ್ತದೆ ಎಂಬ ಭಯವಿಲ್ಲ. ಕಂಡದನ್ನು ಕೇಳುವ, ಇಷ್ಟವಾಗಿದ್ದನ್ನು ತಿನ್ನಲು ಇದಕ್ಕಿಂತ ಸಮಯ ಬೇಕೆ?

ಸೋ, ಮತ್ತೇಕೆ ತಡ. ಮಕ್ಕಳ ಅಚ್ಚುಮೆಚ್ಚಿನ, ಹಿರಿಯರೂ ಇಷ್ಟಪಡುವ ರುಚಿಕಟ್ಟಾದ ಚಿಕ್ಕು ಅಥವಾ ಸಪೋಟಾ ಐಸ್ ಕ್ರೀಂನ್ನು ಮನೆಯಲ್ಲೇ ತಯಾರಿಸಿ. ಇದರಲ್ಲಿ ಪ್ರಿಸರ್ವೆಟೀವ್ಸ್ ಇಲ್ಲದಿರುವುದರಿಂದ ಅಂಗಡಿಯಿಂದ ತಂಡ ಐಸ್ ಕ್ರೀಂಗಿಂತ ಎಷ್ಟೇ ಪಾಲು ಉತ್ತಮ. ಕ್ಯಾಲರಿ ಕಡಿಮೆ ಮಾಡಬೇಕೆಂದರೆ ಕೊಬ್ಬಿನಂಶ ಕಡಿಮೆಯಿರುವ ಹಾಲನ್ನು ಬಳಸಿರಿ. ಆರೋಗ್ಯದ ದೃಷ್ಟಿಯಿಂದಲೂ ಸಪೋಟಾ ಅತ್ಯುತ್ತಮ ಹಣ್ಣು. ಸಪೋಟಾ ಐಸ್ ಕ್ರೀಂನ್ನು ಮನೆಯಲ್ಲಿಯೇ ಮಾಡುವ ವಿಧಾನ ತಿಳಿಯೋಣ ಬನ್ನಿ.

ಬೇಕಾಗುವ ಪದಾರ್ಥಗಳು

ಸಪೋಟಾ ಹಣ್ಣುಗಳು 4
ಸಕ್ಕರೆ ಅರ್ಧ ಕಪ್
ಕೆನೆರಹಿತ ಹಾಲು 2 ಕಪ್
ಕ್ರೀಂ 1 ಕಪ್
ಜಿಲ್ಯಾಟಿನ್ ಪೌಡರ್ 1 ಚಮಚ
ಮಿಲ್ಕ್ ಮೇಡ್ 1 ಕಪ್

ತಯಾರಿಸುವ ವಿಧಾನ

ಚಿಕ್ಕುವನ್ನು ಚೆನ್ನಾಗಿ ತೊಳೆದು ಚಿಪ್ಪೆಯನ್ನು ಸುಲಿದಿಟ್ಟು ಹೋಳುಗನ್ನಾಗಿ ಮಾಡಿಕೊಳ್ಳಿ. ನಂತರ ಜಿಲ್ಯಾಟಿನ್ ಪೌಡರನ್ನು ನೀರಿನಲ್ಲಿ ಮಿಶ್ರಣ ಮಾಡಿ, ಅದಕ್ಕೆ ಚಿಕ್ಕು ಮತ್ತು ಸಕ್ಕರೆ ಸೇರಿಸಿ ಕುದಿಯಲು ಇಡಿ.

ಈ ಮಿಶ್ರಣ ಆರಿದ ಮೇಲೆ ಅದಕ್ಕೆ ಹಾಲು, ಮಿಲ್ಕ್ ಮೇಡ್, ಕ್ರೀಂನ್ನು ಸೇರಿಸಿ ಮಿಕ್ಸಿಯಲ್ಲಿ ಹಾಕಿ ರುಬ್ಬಿರಿ. ಅದನ್ನು ಐಸ್ ಕ್ರೀಂ ಕಪ್ ಗಳಲ್ಲಿ ಹಾಕಿ ರೆಫ್ರಿರೇಟರಿನ ಫ್ರೀಜರ್ ನಲ್ಲಿ ಐದಾರು ತಾಸು ಅತ್ಯಂತ ಕಡಿಮೆ ಉಷ್ಣಾಂಶದಲ್ಲಿ ಇಡಿ.

ತಾಜಾ ಇರುವಾಗಲೇ ಸಪೋಟಾ ಐಸ್ ಕ್ರೀಂನ್ನು ಮಕ್ಕಳಿಗೆ ನೀಡಿ. ನೀವು ಕೂಡ ತಿನ್ನಲು ಮರೆಯಬೇಡಿ.