ತಿಂಡಿ : ಡೋಕಳಾ

ಡೋಕಳಾ ತಯಾರಿಸುವುದು ಬಹಳ ಸುಲಭ. ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಕಡಿಮೆ. ಗುಜರಾತಿನ ಈ ಪಾಕ ನಮ್ಮ ನಾಡಿಗೆ ಬಂದು ಬಹಳಷ್ಟು ವರ್ಷಗಳೇ ಆಗಿಹೋದವು. ಡೋಕಳಾ ಎಂದರೆ ಇದು ನಮ್ಮದೇ ಖಾದ್ಯವೇನೋ ಅನ್ನುವಷ್ಟರ ಮಟ್ಟಿಗೆ ಪರಿಚಿತವಾಗಿದೆ.

ಬೇಕಾಗುವ ಸಾಮಗ್ರಿ :

ಕಡಲೆ ಬೇಳೆ : 250 ಗ್ರಾಂ
ಎಣ್ಣೆ : 100 ಗ್ರಾಂ
ಜೀರಿಗೆ : 10 ಗ್ರಾಂ
ಸಾಸಿವೆ : 10 ಗ್ರಾಂ
ಕೊತ್ತಂಬರಿ : 2 ಕಂತೆ
ಉಪ್ಪು : ರುಚಿಗೆ ತಕ್ಕಷ್ಟು

ತಯಾರಿಸುವ ವಿಧಾನ :

ಹೆಚ್ಚೂಕಡಿಮೆ 12 ಗಂಟೆಗಳ ಕಾಲ ನೆನೆಹಾಕಿದ ಕಡಲೆ ಬೇಳೆಯನ್ನು ರವೆರವೆ ಇರುವಂತೆ ರುಬ್ಬಿಕೊಳ್ಳಿ. ಈಗ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಇಡ್ಲಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಮರುದಿನ ಬೆಳಗ್ಗೆ ಬಾಣಲೆಯಲ್ಲಿ ಒಗ್ಗರಣೆ ಮಾಡಿಕೊಂಡು ಕೊತ್ತಂಬರಿ ಸೊಪ್ಪನ್ನು ಸಣ್ಣಗೆ ಹೆಚ್ಚಿ ಒಗ್ಗರಣೆ ಜೊತೆಗೆ ಮಿಶ್ರಣ ಮಾಡಿ. ನಂತರ ಒಂದು ಪಾತ್ರೆಗೆ ಎಣ್ಣೆ ಸವರಿ ಅದರಲ್ಲಿ ಹಿಟ್ಟನ್ನು ಅಗಲವಾಗಿ ಹರಡಿ ಇಡ್ಲಿ ಬೇಯಿಸುವ ಹಾಗೆ ಬೇಯಿಸಿ. ಬೆಂದ ನಂತರ ಕೆಳಗಿಳಿಸಿ, ಮೊದಲೇ ಮಾಡಿಟ್ಟುಕೊಂಡ ಒಗ್ಗರಣೆಯನ್ನು ಮೇಲ್ಗಡೆ ಹರಡಿ. ತಣ್ಣಗಾದ ನಂತರ ಚಿಕ್ಕದಾಗಿ ಕತ್ತರಿಸಿ. ಇದನ್ನು ಕಾಯಿಚಟ್ನಿಯೊಂದಿಗೆ ತಿಂದರೆ ರುಚಿಯಾಗಿರುತ್ತದೆ.

(ದಟ್ಸ್‌ಕನ್ನಡ ಪಾಕಶಾಲೆ)