ಕ್ಯಾಪ್ಸಿಕಂ ಮೊಸರು ಮಸಾಲಾ!

Snacks

oi-Staff

By * ಕುಮಾರಿ ಗೀತಾ, ಬೆಂಗಳೂರು

Published: Wednesday, March 28, 2012, 12:26 [IST]

ಕ್ಯಾಪ್ಸಿಕಂ ಬಜ್ಜಿ ಯಾರು ತಾನೇ ತಿಂದಿಲ್ಲ ? ಮೆಣಸಿನಕಾಯಿ ಎಂದರೆ ಮುಖ ಸಿಂಡರಿಸುವ ಸಿಹಿ ನಾಲಗೆಯ ಮಂದಿಯೂ ಕ್ಯಾಪ್ಸಿಕಂ ಕುರಿತು ಮೆದು ಧೋರಣೆ ವ್ಯಕ್ತಪಡಿಸುತ್ತಾರೆ. ಕ್ಯಾಪ್ಸಿಕಂ ಪಲ್ಯ ಕೂಡ ಭಲೇ ರುಚಿ! ಅಂದಹಾಗೆ, ನಾವೀಗ ಮಾಡಹೊರಟಿರುವುದು- ಪಲ್ಯವೂ ಅಲ್ಲ , ಬೋಂಡಾ ಕೂಡ ಅಲ್ಲ . ಇದು ಕ್ಯಾಪ್ಸಿಕಂ ಮೊಸರು ಮಸಾಲಾ ! ಮಾಡಲು ಸಿದ್ಧ ತಾನೇ ?

ಬೇಕಾಗುವ ಸಾಮಗ್ರಿಗಳು :

1. ತುಂಡು ಮಾಡಿದ ಈರುಳ್ಳಿ- 1 ಕಪ್‌.
2. ಕತ್ತರಿಸಿದ ಟೊಮಾಟೊ- 1 ಕಪ್‌.
3. ಕತ್ತರಿಸಿದ ದೊಣ್ಣೆ ಮೆಣಸಿನ ಕಾಯಿ (ಕ್ಯಾಪ್ಸಿಕಂ)- 1 ಕಪ್‌.
4. 2-3 ಟೀ ಸ್ಪೂನ್‌ ರೀಫೈನ್ಡ್‌ ಎಣ್ಣೆ .
5. ಜೀರಿಗೆ- 1 ಟೀ ಸ್ಪೂನ್‌.
6. ಹಸಿ ಮೆಣಸಿನ ಕಾಯಿ- 3. ಉದ್ದುದ್ದ ಕತ್ತರಿಸಿಕೊಳ್ಳಿ.
7. ಒಂದು ಎಸಳು ಕರಿಬೇವಿನ ಸೊಪ್ಪು.
8. ರುಚಿಗೆ ತಕ್ಕಷ್ಟು ಉಪ್ಪು .
9. ಬಣ್ಣಕ್ಕೆ ಒಗ್ಗುವಷ್ಟು ಅರಿಷಿಣ ಪುಡಿ.
10. 1 ಟೀ ಸ್ಪೂನ್‌ ಖಾರದ ಪುಡಿ (ಒಣ ಮೆಣಸಿನಕಾಯಿ ಪುಡಿ).
11. 1 ಟೀ ಸ್ಪೂನ್‌ ಕೊತ್ತಂಬರಿ ಬೀಜದ ಪುಡಿ.
12. ಅರ್ಧ ಟೀ ಸ್ಪೂನ್‌ ಗರಂ ಮಸಾಲಾ.
13. ಸಿಹಿ ಮೊಸರು- 100 ಮಿಲೀ. ಮೊಸರು ಗಟ್ಟಿಯಾಗಿರಲಿ.
14. ನೀರು- 1 ಲೋಟ.

ಮಾಡುವ ವಿಧಾನ :

ಮೊದಲಿಗೆ- ಅಗಲ ತಳದ ಪಾತ್ರೆಯಾಂದರಲ್ಲಿ 2-3 ಟೀ ಸ್ಪೂನ್‌ ಎಣ್ಣೆ ಹಾಕಿ. ಸ್ಟವ್‌ ಹಚ್ಚಿದ್ದೀರಿ ತಾನೇ? ಪಾತ್ರೆಯನ್ನು ಸ್ಟವ್‌ ಮೇಲಿಡಿ. ಮಧ್ಯಮ ಉರಿಯಲ್ಲಿ ಜೀರಿಗೆಯನ್ನು ಹುರಿದುಕೊಳ್ಳಿ. ಜೀರಿಗೆ ಹುರಿಯಲು 1 ನಿಮಿಷ ಸಾಕು.

ಜೀರಿಗೆ ಹುರಿದಿದ್ದಾಯಿತಾ ? ಅದೇ ಪಾತ್ರೆಗೆ- ಕತ್ತರಿಸಿಟ್ಟುಕೊಂಡ ಈರುಳ್ಳಿ ತುಂಡುಗಳು, ತೊಳೆದಿಟ್ಟುಕೊಂಡ ಕರಿಬೇವಿನ ಎಲೆ, ಹಸಿ ಮೆಣಸಿನಕಾಯಿ ತುಂಡುಗಳನ್ನು ಹಾಕಿ. ಈರುಳ್ಳಿ ತುಂಡುಗಳು ಬಂಗಾರ ಬಣ್ಣಕ್ಕೆ ಬರುವವರೆಗೆ ಬೇಯಲಿ. ಆನಂತರ ಕತ್ತರಿಸಿ ಸಿದ್ಧಪಡಿಸಿಕೊಂಡ ಟೊಮೊಟಾ ಹಾಗೂ ದೊಣ್ಣೆ ಮೆಣಸಿನಕಾಯಿ ತುಂಡುಗಳನ್ನು ಪಾತ್ರೆಗೆ ಸೇರಿಸಿ. ಚೆನ್ನಾಗಿ ಕಲಕಿ.

1 ಲೋಟ ನೀರನ್ನು ಪಾತ್ರೆಗೆ ಸೇರಿಸಿ, ಪ್ಲೇಟ್‌ ಮುಚ್ಚಿ . ಪಾತ್ರೆಯಲ್ಲಿನ ಪದಾರ್ಥಗಳು ಚೆನ್ನಾಗಿ ಕುದಿಯಲಿ. ತರಕಾರಿ ಚೆನ್ನಾಗಿ ಬೆಂದ ನಂತರ ಉಪ್ಪು , ಅರಿಷಿಣ ಹಾಗೂ ಕೊತ್ತಂಬರಿ ಪುಡಿ ಸೇರಿಸುವುದು. ಮಿಶ್ರಣವನ್ನು ಚೆನ್ನಾಗಿ ಕಲಕಿದ ನಂತರ ಮತ್ತೆ 5 ನಿಮಿಷ ಬೇಯಿಸುವುದು. ಈಗ ಸಿಹಿ ಮೊಸರು ಸೇರಿಸುವ ಸರದಿ. ಮೊಸರು ಸೇರಿಸಿದ ನಂತರದ ಮಿಶ್ರಣವನ್ನು ಮತ್ತೆ ಸ್ಟವ್‌ ಮೇಲಿಡಿ. ಉರಿ ಮಧ್ಯಮವಾಗಿರಲಿ. ಮೊಸರಿನಲ್ಲಿನ ನೀರಿನಂಶ ಸಂಪೂರ್ಣ ಆವಿಯಾಗುವ ತನಕ ಕುದಿಸುವುದು. ಒಲೆಯಿಂದ ಕೆಳಗಿಳಿಸುವ ಮುನ್ನ - ಗರಂ ಮಸಾಲಾ ಸೇರಿಸುವುದು.

ಪೂರಿ ಹಾಗೂ ಪರೋಟಾಗಳಿಗೆ ಕ್ಯಾಪ್ಸಿಕಂ ಮೊಸರು ಮಸಾಲಾ ತುಂಬಾ ರುಚಿ. ಬಿಸಿಯಾಗಿರುವಾಗಲೇ ಬಳಸುವುದು ಒಳ್ಳೆಯದು. ಹಸಿ ಈರುಳ್ಳಿ ಹಾಗೂ ಟೊಮೊಟೊ ತುಂಡುಗಳನ್ನು ಕ್ಯಾಪ್ಸಿಕಂ ಮೊಸಲು ಮಸಾಲಾದ ಮೇಲೆ ಹರಡಬಹುದು.