ಕ್ಯಾಪ್ಸಿಕಂ ರೈಸ್ ಮಾಡಿದರೆ 2 ಲಾಭ!

ಸಾಮಾನ್ಯವಾಗಿ ಮನೆಗಳಲ್ಲಿ ಲೆಮನ್ ರೈಸ್, ಟೊಮೆಟೊ ರೈಸ್ ಹೀಗೆ ತರಾವರಿ ರೈಸ್ ಐಟಂ ಮಾಡುತ್ತಿರುತ್ತೇವೆ. ಈ ರೀತಿಯ ರೈಸ್ ಮಾಡಿದರೆ ಒಂದು ಉಪಕಾರವೆಂದರೆ ಬೆಳಗ್ಗಿನ ತಿಂಡಿಗೂ ಸರಿ, ಮಧ್ಯಾಹ್ನದ ಲಂಚ್ ಬಾಕ್ಸ್ ಗೂ ತುಂಬಿಕೊಂಡು ಹೋಗಬಹುದು. ಇವತ್ತು ನಾವು ರುಚಿಕರವಾದ ಕ್ಯಾಪ್ಸಿಕಂ ರೈಸ್ ಮಾಡುವ ವಿಧಾನ ತಿಳಿಯೋಣ.

ಬೇಕಾಗುವ ಸಾಮಾಗ್ರಿಗಳು:

* 1 ಕಪ್ ಅಕ್ಕಿ
* ಕತ್ತರಿಸಿದ 2 ದುಂಡು ಮೆಣಸಿನ ಕಾಯಿ (ಹಳದಿ, ಕೆಂಪು ಅಥವಾ ಹಸಿರು ಬಣ್ಣದು)
* 1 ಈರುಳ್ಳಿ (ಕತ್ತರಿಸಿದ್ದು)
* 3-4 ಹಸಿಮೆಣಸಿನ ಕಾಯಿ (ಕತ್ತರಿಸಿದ್ದು)
* ಅರಿಶಿಣ ಪುಡಿ 1/4 ಚಮಚ
* ಜೀರಿಗೆ, ಸಾಸಿವೆ, ಎಣ್ಣೆ ಮತ್ತು ಉಪ್ಪು
* ಗೋಡಂಬಿ (ಬೇಕಿದ್ದರೆ ಬಳಸಬಹುದು)
* ಸ್ವಲ್ಪಕೊತ್ತಂಬರಿ ಸೊಪ್ಪು (ಕತ್ತರಿಸಿದ್ದು)
* ನಿಂಬೆ ರಸ
* ತುಪ್ಪ ಮತ್ತು ರುಚಿಗೆ ತಕ್ಕಉಪ್ಪು

ತಯಾರಿಸುವ ವಿಧಾನ:

1. ಅಕ್ಕಿಯನ್ನು ಬೇಯಿಸಿ ಅನ್ನ ಮಾಡಿ ಇಡಬೇಕು. ತುಂಬಾ ಬೇಯಿಸಬಾರದು.

2. ಈಗ ಬಾಣಲೆಯಲ್ಲಿ ಸ್ವಲ್ಪ ತುಪ್ಪ ಅಥವಾ ಎಣ್ಣೆ ಹಾಕಿ, ಎಣ್ಣೆ ಅಥವಾ ತುಪ್ಪ ಬಿಸಿಯಾದಾಗ ಸಾಸಿವೆ ಮತ್ತು ಜೀರಿಗೆ ಹಾಕಬೇಕು. ಅವುಗಳು ಚಟಾಪಟ ಶಬ್ದ ಮಾಡಲು ಪ್ರಾರಂಭಿಸಿದಾಗ ಈರುಳ್ಳಿ ಮತ್ತು ಹಸಿ ಮೆಣಸಿನಕಾಯಿ ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

3. ಈಗ ದುಂಡು ಮೆಣಸಿನಕಾಯಿ (ಕ್ಯಾಪ್ಸಿಕಂ) ಹಾಕಿ ಸ್ವಲ್ಪ ಮೆತ್ತಾಗುವವರೆಗೆ ಹುರಿಯಬೇಕು. ನಂತರ ರುಚಿಗೆ ತಕ್ಕ ಉಪ್ಪು ಹಾಕಬೇಕು.

4. ನಂತರ ಅನ್ನವನ್ನು ಸೇರಿಸಿ ಅರಿಶಿಣ ಮತ್ತು ಒಂದು ನಿಂಬೆ ಹಣ್ಣಿನ ರಸ ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

5. ನಂತರ ಗೋಡಂಬಿಯನ್ನು ತುಪ್ಪದಲ್ಲಿ ಹುರಿದು ಸೇರಿಸಿ, ಕತ್ತರಿಸಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಕ್ಯಾಪ್ಸಿಕಂ ರೈಸ್ ರೆಡಿ.

ಸಲಹೆ: ಇದನ್ನು ಸೌತೆಕಾಯಿ ರಾಯತ (ಮೊಸರು ಬಜ್ಜಿ) ಜೊತೆ ತಿನ್ನಲು ರುಚಿಕರವಾಗಿರುತ್ತದೆ.