ಟೊಮೆಟೊ ಬಟಾಣಿ ಭಾತ್‌ : ಬೇಗ ಅಡುಗೆ, ಬೇಗ ಊಟ

* ಹೊಸಮನೆ ಕುಮುದ ಶಂಕರ್‌

ಬೇಕಾಗುವ ಸಾಮಗ್ರಿಗಳು:

1ಕಪ್‌ ಅಕ್ಕಿ
4-5 ಚೆನ್ನಾಗಿ ಹಣ್ಣಾಗಿರುವ ಟೊಮೆಟೊ
1/2 ಕಪ್‌ ಹಸಿ ಬಟಾಣಿ
2 ಈರುಳ್ಳಿ
2-3 ಹಸಿ ಮೆಣಸಿನಕಾಯಿ
1 ಚೆಕ್ಕೆ, ಲವಂಗ, ಏಲಕ್ಕಿ, ಪಲಾವ್‌ ಎಲೆ
ಎಣ್ಣೆ ಸಾಸಿವೆ, ಜೀರಿಗೆ, ಕರಿಬೇವು
ಇಂಗು ( ಬೇಕಿದ್ದರೆ)
ಬೆಳ್ಳುಳ್ಳಿ ಮತ್ತು ಶುಂಠಿಪೇಸ್ಟ್‌
1/4 ಚಮಚ ಕಾರದ ಪುಡಿ
1/2 ಚಮಚ ಧನಿಯಾ ಪುಡಿ
1/4 ಚಮಚ ಗರಮ್‌ ಮಸಾಲ, ಉಪ್ಪು
2 ಕಪ್‌ ನೀರು, ಹೆಚ್ಚಿದ ಕೊತ್ತಂಬರಿ ಸೊಪ್ಪು
ಇಷ್ಟವೆನಿಸಿದರೆ ಕಾಯಿ ಅಥವಾ ಕೊಬ್ರಿ ತುರಿ
1 ಚಮಚ ನಿಂಬೆರಸ

ಮಾಡುವ ವಿಧಾನ :

* ಅಕ್ಕಿ ತೊಳೆದು ನೆನೆಹಾಕಿ. ಟೊಮೆಟೊ, ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿ ಹೆಚ್ಚಿಕೊಳ್ಳಿ.
* ಕುಕ್ಕರ್‌ ಅಥವಾ ದಪ್ಪ ತಳದ ಪಾತ್ರೆಗೆ ಎಣ್ಣೆ ಹಾಕಿ ಕಾದ ನಂತರ ಸಾಸಿವೆ, ಜೀರಿಗೆ, ಚೆಕ್ಕೆ, ಲವಂಗ, ಏಲಕ್ಕಿ, ಎಲೆ ಹಾಕಿ, ಕರಿಬೇವು, ಇಂಗು ಹಾಕಿ ಆಮೇಲೆ ಬೆಳ್ಳುಳ್ಳಿ ಶುಂಠಿ ಪೇಸ್ಟ್‌ ಹಾಕಬೇಕು.
* ಈರುಳ್ಳಿ, ಹಸಿ ಮೆಣಸಿನಕಾಯಿ ಹಾಕಿ ಬಾಡಿಸಿದ ನಂತರ 2 ನಿಮಿಷ ಬಿಟ್ಟು ಅರಿಶಿನ, ಟೊಮೆಟೊ ಹಾಕಿ ಚೆನ್ನಾಗಿ ಬೆರೆಸಿ. ಬಟಾಣಿ ಬೆರೆಸಿ 5 ನಿಮಿಷದ ನಂತರ ನೀರು ಮತ್ತು ಉಪ್ಪು ಹಾಕಿ ಜೊತೆಯಲ್ಲಿಯೇ ಪುಡಿಗಳನ್ನೆಲ್ಲ ಹಾಕಿ ಕೈಯಾಡಿಸಿ.
* ನೀರು ಕುದಿ ಬಂದ ನಂತರ ನೆನೆಸಿಟ್ಟುಕೊಂಡ ಅಕ್ಕಿ ಹಾಕಿ, ಬೇಕಾದರೆ ನಿಂಬೆರಸ ಹಿಂಡಿ. ಕಾಯಿತುರಿ ಹಾಕಿ ಮುಚ್ಚಳ ಮುಚ್ಚಿ. ಒಂದೇ ಏಟಿಗೆ ಅಡುಗೆ ತಯಾರಾಗುತ್ತೆ.
* ಹಪ್ಪಳ ಸಂಡಿಗೆ ಬಾಳಕ ಮೆಣಸಿನಕಾಯಿ ಪಕ್ಕದಲ್ಲಿದ್ದರೆ ಊಟದ ಗಮ್ಮತ್ತು ಹೆಚ್ಚಾಗುತ್ತದೆ.