ಕಾಯಿ ಸಾಸಿವೆ ಚಿತ್ರಾನ್ನ ಸೇವಿಸಿ

ಬಹುಮಂದಿಗೆ ಚಿತ್ರಾನ್ನ ಪ್ರಿಯ. ಇನ್ನು ಕೆಲವರಿಗೆ ಚಿತ್ರಾನ್ನವೆಂದರೆ ಆಗದು. ಬಹಳ ಸುಲಭವಾಗಿ ತಯಾರಿಸಬಹುದಾದ ಚಿತ್ರಾನ್ನ ಒಂದು ರೀತಿ ಬಹು ಜನಪ್ರಿಯ ದೈನಂದಿನಉಪಹಾರ ಎನ್ನಬಹುದು. ಅವಿವಾಹಿತರಿಗಂತೂ ತಂಗಳು ಚಿತ್ರಾನ್ನ ಸವಿಯೋದು ದಿನ್ಯನಿತ್ಯದವಿಷಯವಾಗಿರುತ್ತದೆ. ಚಿತ್ರಾನ್ನ ಅನ್ನೋ ಹೆಸರಿನ ಜತೆಗೆ ನಗರಗಳಲ್ಲಿ ಕಲರ್ ರೈಸ್, ಲೆಮನ್ ರೈಸ್ ಎಂತಲೂ, ಎಲ್ಲೋ ಕೆಲವೆಡೆ ರಾವಣಭಾತ್ ಎಂದು ಚಿತ್ರಾನ್ನಕ್ಕೆ ಕರೆದಿದ್ದನ್ನು ಕೇಳಿದ ನೆನಪು. ಮಾಮೂಲಿ ಚಿತ್ರಾನ್ನದ ಜೊತೆಗೆ ಎಳ್ಳು ಪುಡಿ ಚಿತ್ರಾನ್ನ, ಕಾಯಿಸಾಸಿವೆ ಚಿತ್ರಾನ್ನ, ಮಸಾಲೆ ಚಿತ್ರಾನ್ನ, ನಿಂಬೆ ಹಣ್ಣಿನ ಚಿತ್ರಾನ್ನ ಹೀಗೆ ತರಾವರಿ ಚಿತ್ರಾನ್ನಗಳನ್ನು ಮಾಡಿ ಸವಿಯಬಹುದು.

ಮನಸ್ವಿನಿ, ನಾರಾವಿ

ತಯಾರಿಸಲು ಬೇಕಾದ ಸಾಮಾಗ್ರಿ:

ಅಕ್ಕಿ : 1 ಪಾವು
ಹಸಿತೆಂಗಿನಕಾಯಿ :1 ದೊಡ್ಡ ಬಟ್ಟಲು
ಹಸಿಮೆಣಸಿನಕಾಯಿ :5
ಕೊತ್ತಂಬರಿ ಸೊಪ್ಪು:- 1 ಕಪ್
ಅರಿಶಿನ ಪುಡಿ: -ಕಾಲು ಟೀ ಚಮಚ
ಸಾಸಿವೆ: 2 ಟೀ ಚಮಚ
ಕಡಲೇಕಾಯಿಬೀಜ: 2ಟೀ ಚಮಚ
ಹುಣಸೆ ಹಣ್ಣು : ಅರ್ಧ ನಿಂಬೆ ಗಾತ್ರದ್ದು
ಕಡ್ಲೇಕಾಯಿ ಎಣ್ಣೆ :5 ಟೀ ಚಮಚ
ರುಚಿಗೆ ತಕ್ಕಷ್ಟು ಇಂಗು, ಉಪ್ಪು

ತಯಾರಿಸುವ ವಿಧಾನ: ಅಕ್ಕಿಯನ್ನು ಚೆನ್ನಾಗಿ ತೊಳೆದು ಉದುರುದುರಾಗಿ ಅನ್ನ ಮಾಡಿ ಆರಲು ಬಿಡಿ. ಹಸಿಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು, ಇಂಗು, ಅರಿಶಿನ, 1 ಚಮಚ ಸಾಸಿವೆ, ಉಪ್ಪು, ಸ್ವಲ್ಪ ಹುಣಸೆಹಣ್ಣು, ಕಾಯಿತುರಿ ಎಲ್ಲವನ್ನು ಮಿಕ್ಸಿಗೆ ಸ್ವಲ್ಪ ನೀರು ಬೆರೆಸಿ ನುಣ್ಣಗೆ ರುಬ್ಬಿಕೊಳ್ಳಿ..

ಒಗ್ಗರಣೆ: ಬಾಣಲೆಯಲ್ಲಿ ಎಣ್ಣೆಯನ್ನು ಕಾಯಿಸಿ, ಸಾಸಿವೆ ಹಾಕಿ. ಅದು ಚಿಟಗುಟ್ಟ ತೊಡಗಿದಾಗ ಕಡ್ಲೇಬೇಳೆ, ಉದ್ದಿನಬೇಳೆ ಹಾಕಿ ಹುರಿಯಿರಿ ಅದು ಕೆಂಪಗಾದಾಗ ಕಡಲೇಬೀಜ ಹಾಕಿ ಹುರಿಯಿರಿ ನಂತರ ಕರಿಬೇವು, ಕೊತ್ತಂಬರಿ ಸೊಪ್ಪು ಹಾಕಿರಿ. ಮಿಕ್ಸಿಯಿಂದ ರುಬ್ಬಿದ ಮಿಶ್ರಣವನ್ನು ಒಗ್ಗರಣೆ ಸಾಮಗ್ರಿಗಳ ಜೊತೆ ಬೆರೆಸಿರಿ.ಮಿಶ್ರಣವು ಕುದಿದ ನಂತರ ಅನ್ನದೊಡನೆ ಬೆರೆಸಿ ಸೇವಿಸಬಹುದು.

(ದಟ್ಸ್ ಕನ್ನಡ ಪಾಕಶಾಲೆ)