ಬಾಯಿ ಚಪ್ಪರಿಸುವಂತೆ ಮಾಡುವ ಮೆಂತ್ಯೆ ಪುಲಾವ್

Rice

oi-Staff

By Super

Updated: Tuesday, September 18, 2012, 9:04 [IST]

ದಿನಾ ಒಂದೇ ತರಹದ ತಿಂಡಿ ತಿಂದು ತಿಂದು ನಾಲಗೆ ಕೆಟ್ಟವರಿಗೆ ಇಲ್ಲೊಂದು ಡಿಫರೆಂಟ್ ಐಟೆಮ್ ರೆಡಿ ಇದೆ. ರುಚಿಯಾಗಿರೋದರ ಜೊತೆ ಆರೋಗ್ಯವೂ ಚೆನ್ನಾಗಿರುತ್ತೆ ಅಂದ್ರೆ ಯಾರಿಗೆ ಇಷ್ಟ ಆಗೊಲ್ಲ ಹೇಳಿ? ಮೆಂತ್ಯೆ ಸೊಪ್ಪನ್ನ ಕೇವಲ ಸೊಪ್ಪಿನ ಸಾರು, ಪಲ್ಯಕ್ಕೆ ಮಾತ್ರ ಅಲ್ಲದೆ ಅದನ್ನ ಬಳಸಿ ಟೇಸ್ಟಿ ಪುಲಾವ್ ತಯಾರು ಮಾಡಬಹುದು, ಏನನ್ನೂ ರುಬ್ಬದೆ ಬೇಗ ಬೇಗ ಹೇಗೆ ಪುಲಾವ್ ಮಾಡಬಹುದು ಅಂತ ಒಂದು ಸಾರಿ ಟ್ರೈ ಮಾಡಿ ನೋಡಿ...

ಬೇಕಾಗುವ ಸಾಮಾಗ್ರಿಗಳು:
* ಒಂದು ಬಟ್ಟಲು ಮೆಂತ್ಯೆ ಸೊಪ್ಪು
* ಕೊತ್ತಂಬರಿ, ಒಂದೆರಡು ಪುದೀನ ಎಲೆ
* 100 ಗ್ರಾಂ ಎಣ್ಣೆ
* ಒಗ್ಗರಣೆಗೆ ಸಾಸಿವೆ, ಕಡ್ಲೆಬೇಳೆ, ಉದ್ದಿನಬೇಳೆ, ಕರಿಬೇವು
* ಒಂದು ಕಪ್ ಎಚ್ಚಿದ ಈರುಳ್ಳಿ, ಒಂದು ಕಪ್ ಟೊಮೆಟೊ
* 4 ಮೆಣಸಿನಕಾಯಿ
* ಚಿಟಿಕೆ ಅರಿಶಿನ, ಚೆಕ್ಕೆ ಲವಂಗದ ಪುಡಿ, ಬೆಳ್ಳುಳ್ಳಿ-ಶುಂಠಿ ಪೇಸ್ಟ್ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು.

ಹೀಗೆ ಮಾಡಿ: ಒಂದು ಪಾತ್ರೆಯಲ್ಲಿ ಎಣ್ಣೆ ಬಿಸಿ ಮಾಡಿ ಅದಕ್ಕೆ ಸಾಸಿವೆ, ಕರಿಬೇವು, ಕಡಲೆ ಬೇಳೆ, ಉದ್ದಿನಬೇಳೆ ಹಾಕಿ ಒಗ್ಗರಣೆ ಮಾಡಿಕೊಳ್ಳಬೇಕು. ಆನಂತರ ಚೆನ್ನಾಗಿ ಜಜ್ಜಿಕೊಂಡಿದ್ದ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಹಸಿಮೆಣಸಿನಕಾಯಿ ಚೂರು ಹಾಗೂ ಈರುಳ್ಳಿ ಹಾಕಿ ಫ್ರೈ ಮಾಡಿಕೊಳ್ಳಬೇಕು. ಸ್ವಲ್ಪ ಕೆಂಪಗಾದ ನಂತರ ಸಣ್ಣದಾಗಿ ಹೆಚ್ಚಿದ ಮೆಂತ್ಯೆ ಸೊಪ್ಪು ಹಾಗೂ ಸ್ವಲ್ಪ ಕೊತ್ತಂಬರಿ, ಪುದೀನ ಸೊಪ್ಪಿನ ಚೂರುಗಳನ್ನು ಹಾಕಬೇಕು.

5 ನಿಮಿಷ ಆದ ಮೇಲೆ ಟೊಮೆಟೊ ಹಾಕಿ ಹುರಿದುಕೊಳ್ಳಬೇಕು. ಅದಕ್ಕೆ ಅರಿಶಿನ, ಚೆಕ್ಕೆ, ಲವಂಗದ ಪುಡಿಯನ್ನು ಬೆರೆಸಬೇಕು. ಅಳತೆಮಾಡಿಕೊಂಡ ನೀರನ್ನು (ಎರಡು ಗ್ಲಾಸ್ ಅಕ್ಕಿಗೆ ನಾಲ್ಕು ಗ್ಲಾಸ್ ನೀರು) ಪಾತ್ರೆಗೆ ಹಾಕಿಕೊಂಡು ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಬೇಕು. ಅದು ಕುದಿಯಲು ಆರಂಭಿಸಿದ ನಂತರ ತೊಳೆದ ಅಕ್ಕಿಯನ್ನು ಕುದಿಯುವ ನೀರಿಗೆ ಹಾಕಿ ಹದವಾಗಿ ಬೇಯಿಸಿದರೆ ಆಯಿತು. ಕುಕ್ಕರ್ ನಲ್ಲಿ ಮಾಡುವವರು 3 ಕೂಗು ಕೂಗಿಸಿದ ನಂತರ ತೆಗೆದು ಚೆನ್ನಾಗಿ ಬೆರೆಸಿಕೊಂಡರೆ ರುಚಿರುಚಿಯಾದ ಮೆಂತ್ಯ ಪುಲಾವ್ ತಿನ್ನಲು ರೆಡಿ.....