ರುಚಿಕರವಾದ ಟೊಮೆಟೊ ಗ್ರೇವಿ ರೆಸಿಪಿ

Rasam

oi-Reena

By Hema S

Updated: Wednesday, July 25, 2012, 13:18 [IST]

ಟೊಮೆಟೊ ಬಳಸಿ ಅಡುಗೆ ಮಾಡಲು ಅಡುಗೆ ಅಷ್ಟಾಗಿ ಬರದವರಿಗೂ ಕೂಡ ಗೊತ್ತಿರುತ್ತದೆ. ಏಕೆಂದರೆ ಇದರಿಂದ ಅಡುಗೆ ಮಾಡುವುದು ಬಲು ಸುಲಭ, ಹೆಚ್ಚಿನ ಶ್ರಮ ಪಡದೆ ತಿಳಿ ಸಾರು ಅಥವಾ ಗೊಜ್ಜು ಮಾಡಬಹುದು.

ಈ ಟೊಮೆಟೊದಿಂದ ತಯಾರಿಸುವ ಅಡುಗೆಯನ್ನು ಮತ್ತಷ್ಟು ರುಚಿಕರವಾಗಿ ಮಾಡಬೇಕೆಂದು ಬಯಸುವುದಾದರೆ ಟೊಮೆಟೊ ಗ್ರೇವಿ ಟ್ರೈ ಮಾಡಿ. ತಿನ್ನಲು ತುಂಬಾ ರುಚಿಕರವಾಗಿರುವ ಈ ಗ್ರೇವಿ ತಯಾರಿಸುವುದು ಬಲು ಸುಲಭ. ಇದನ್ನು ತಯಾರಿಸುವ ವಿಧಾನದ ಬಗ್ಗೆ ತಿಳಿಯಲು ಮುಂದೆ ಓದಿ.

ಬೇಕಾಗುವ ಸಾಮಾಗ್ರಿಗಳು:

* 3 ಚಮಚ ಬೆಣ್ಣೆ
* 2 ಈರುಳ್ಳಿ (ಉದ್ದುದ್ದವಾಗಿ ಕತ್ತರಿಸಿದ್ದು)
* 4 ಹಸಿಮೆಣಸಿನ ಕಾಯಿ
* 1/4 ಕಪ್ ಅಣಬೆ
* 4-5 ಟೊಮೆಟೊ (ಕತ್ತರಿಸಿದ್ದು)
* 2 ಚಮಚ ಮೆಣಸಿನ ಪುಡಿ (ಖಾರಕ್ಕೆ ತಕ್ಕ)
* ಅರ್ಧ ಚಮಚ ಕೊತ್ತಂಬರಿ ಪುಡಿ
* 1/2 ಚಮಚ ಗರಂ ಮಸಾಲದ ಪುಡಿ
* ಬೆಳ್ಳುಳ್ಳಿ 2-3 ಎಸಳು
* ಶುಂಠಿ 1 ಇಂಚು
* ಅರಿಶಿಣ ಪುಡಿ 1/4 ಚಮಚ
* ಒಂದು ಕಪ್ ನೀರು
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಪಾತ್ರೆಯಲ್ಲಿ ಬೆಣ್ಣೆ ಹಾಕಿ ಬಿಸಿ ಮಾಡಬೇಕು. ನಂತರ ಅದಕ್ಕೆ ಕತ್ತರಿಸಿದ ಈರುಳ್ಳಿ ಮತ್ತು ಕತ್ತರಿಸಿದ ಹಸಿಮೆಣಸಿನ ಕಾಯಿ ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

2. ಈಗ ಕತ್ತರಿಸಿದ ಟೊಮೆಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಬೇಕು.

3. ನಂತರ ಬೆಳ್ಳುಳ್ಳಿ, ಜಜ್ಜಿದ ಶುಂಠಿ, ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಅರಿಶಿಣ ಪುಡಿ, ಗರಂ ಮಸಾಲ , ರುಚಿಗೆ ತಕ್ಕ ಉಪ್ಪು, ಅಣಬೆ ಹಾಕಿ 2 ನಿಮಿಷ ಹುರಿಯಬೇಕು.

4. ನಂತರ ಒಂದು ಕಪ್ ನೀರು ಸೇರಿಸಿ ಮಿಶ್ರಣ ಗಟ್ಟಿಯಾಗುವವರೆಗೆ ಕುದಿಸಬೇಕು. ನಂತರ ರುಚಿನೋಡಿ, ಉಪ್ಪು ಸಾಲದಿದ್ದರೆ ಉಪ್ಪು ಹಾಕಬೇಕು. ನಂತರ ಉರಿಯಿಂದ ತೆಗೆದರೆ ರುಚಿಕರವಾದ ಟೊಮೆಟೊ ಗ್ರೇವಿ ರೆಡಿ.