ಬ್ರೇಕ್ ಫಾಸ್ಟ್ ರುಚಿ ಹೆಚ್ಚಿಸುವ ಟೊಮೆಟೊ ಕುರ್ಮಾ

Rasam

oi-Reena

By Hema S

Updated: Monday, August 13, 2012, 13:19 [IST]

ಟೊಮೆಟೊ ಸಾರು ತಯಾರಿಸುವುದರ ವಿಧಾನ ಸಾಮಾನ್ಯವಾಗಿ ಎಲ್ಲರಿಗೆ ಗೊತ್ತಿರುತ್ತದೆ. ಆದರೆ ಇದೇ ಟೊಮೆಟೊ ಸಾರನ್ನು 100ಕ್ಕಿಂತ ಅಧಿಕ ಬಗೆಯಲ್ಲಿ ತಯಾರಿಸಬಹುದಾಗಿದೆ. ಇವತ್ತು ನಾವು ಟೊಮೆಟೊ ಕುರ್ಮಾ ಮಾಡುವ ವಿಧಾನ ತಿಳಿಯೋಣ.

ಬೇಕಾಗುವ ಸಾಮಾಗ್ರಿಗಳು:

* ಹಣ್ಣಾದ ಟೊಮೆಟೊ 3
* ಈರುಳ್ಳಿ 1 (ಕತ್ತರಿಸಿದ್ದು)
* ಶುಂಠಿ ಪೇಸ್ಟ್ ಅರ್ಧ ಚಮಚ
* ಬೆಳ್ಳುಳ್ಳಿ ಎಸಳು 2-3 ಎಸಳು
* ಅರ್ಧ ಇಂಚಿನಷ್ಟು ದೊಡ್ಡದಿರುವ ಚಕ್ಕೆ
* ಪಲಾವ್ ಎಲೆ 1
* ಕೆಂಪು ಮೆಣಸಿನ ಪುಡಿ 1 ಚಮಚ
* ಅರಿಶಿಣ ಪುಡಿ 1/4 ಚಮಚ
* ಕರಿಬೇವಿನ ಎಲೆ ಸ್ವಲ್ಪ
* ಎಣ್ಣೆ 1 ಚಮಚ
* ತುರಿದ ತೆಂಗಿನ ಕಾಯಿ ಕಾಲು ಕಪ್
* ಡುಂಡು ಮೆಣಸಿನ ಕಾಯಿ 2
* ಹಸಿ ಮೆಣಸಿನ ಕಾಯಿ 1
* ಗಸೆಗಸೆ ಅರ್ಧ ಚಮಚ
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಟೊಮೆಟೊ ಮತ್ತು ಗಸೆಗಸೆ ಅರೆದು ಗಟ್ಟಿಯಾದ ಪೇಸ್ಟ್ ರೀತಿ ಮಾಡಿಡಬೇಕು.

2. ತುರಿದ ತೆಂಗಿನ ಕಾಯಿಯನ್ನು ಅರೆದು ಇಡಬೇಕು.

3. ಈಗ ಸಾರು ಮಾಡುವ ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಅದಕ್ಕೆ ಬೆಳ್ಳುಳ್ಳಿ ಎಸಳು, ಚಕ್ಕೆ, ಪಲಾವ್ ಎಲೆ, ಕರಿಬೇವಿನ ಎಲೆ, ಎರಡು ಭಾಗ ಮಾಡಿದ ಹಸಿಮೆಣಸಿನಕಾಯಿ ಹಾಕಿ 30 ಸೆಕೆಂಡ್ ಹುರಿಯಬೇಕು. ನಂತರ ಶುಂಠಿ ಪೇಸ್ಟ್ ಹಾಕಿ ಒಂದು ನಿಮಿಷ ಹುರಿದು, ಕತ್ತರಿಸಿದ ದುಂಡು ಮೆಣಸಿನ ಕಾಯಿ 2 ನಿಮಿಷ ಹುರಿಯಬೇಕು.

4. ನಂತರ ಅರಿಶಿಣ ಮತ್ತು ಮೆಣಸಿನ ಪುಡಿ ಹಾಕಿ ಮಿಶ್ರ ಮಾಡಿ ನಂತರ ಪೇಸ್ಟ್ ರೀತಿ ಮಾಡಿದ ಟೊಮೆಟೊ ಹಾಕಿ ರುಚಿಗೆ ತಕ್ಕ ಉಪ್ಪು ಸೇರಿಸಿ 3-4 ನಿಮಿಷ ಬಿಸಿ ಮಾಡಬೇಕು. ನಂತರ ಅರೆದ ತೆಂಗಿನಕಾಯಿ ಹಾಕಿ ಒಂದು ಕಪ್ ನೀರು ಹಾಕಿ ಚೆನ್ನಾಗಿ ಕುದಿಸಬೇಕು.

ನಂತರ ಈ ಟೊಮೆಟೊ ಕುರ್ಮಾದಲ್ಲಿ ಉಪ್ಪು ಸರಿಯಾಗಿದೆಯೇ ಎಂದು ನೋಡಿ, ಸಾಲದಿದ್ದರೆ ಸ್ವಲ್ಪ ಉಪ್ಪು ಹಾಕಿ 2 ನಿಮಿಷ ಈ ಮಿಶ್ರಣವನ್ನು ಕುದಿಸಿ ಉರಿಯಿಂದ ತೆಗೆದರೆ ರುಚಿಯಾದ ಟೊಮೆಟೊ ಕುರ್ಮಾ ರೆಡಿ.

ಇದನ್ನು ಸೆಟ್ ದೊಸೆ ಮತ್ತು ನೀರು ದೋಸೆ ಜೊತೆ ತಿನ್ನಲು ತುಂಬಾ ರುಚಿಯಾಗಿರುತ್ತದೆ.