ಗುಜರಾತಿ ಶೈಲಿಯಲ್ಲಿ ಮೊಸರು ಗ್ರೇವಿ

ಗುಜರಾತಿ ಖಾದಿ(ಮೊಸರು ರೆಸಿಪಿ) ಉತ್ತರ ಭಾರತದ ಕಡೆ ತುಂಬಾ ಪ್ರಸಿದ್ಧವಾದ ಅಡುಗೆಯಾಗಿದೆ. ಇದು ತುಂಬಾ ಸರಳವಾದ ರೆಸಿಪಿಯಾಗಿದ್ದು ಕಡಲೆಹಿಟ್ಟು ಮತ್ತು ಮೊಸರು ಬಳಸಿ ಈ ಗ್ರೇವಿಯನ್ನು ತಯಾರಿಸಲಾಗುವುದು.

ರೆಸಿಪಿ ತುಂಬಾ ಸರಳವಾಗಿದ್ದರೂ ಈ ಗ್ರೇವಿಯ ರುಚಿ ಮಾತ್ರ ಸೂಪರ್ ಆಗಿದೆ. ಇದನ್ನು ಮಾಡುವ ವಿಧಾನವನ್ನು ಈ ಕೆಳಗೆ ನೀಡಲಾಗಿದೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
* ಕಡಲೆ ಹಿಟ್ಟು 2 ಟೇಬಲ್ ಸ್ಪೂನ್
* ಮೊಸರು ಒಂದೂವರೆ ಕಪ್
* ಶುಂಠಿ ಪೇಸ್ಟ್ ಅರ್ಧ ಚಮಚ
* ಹಸಿ ಮೆಣಸಿನಕಾಯಿ ಅರ್ಧ ಚಮಚ
* ಸಕ್ಕರೆ 2 ಚಮಚ
* ಸ್ವಲ್ಪ ಕೊತ್ತಂಬರಿ ಸೊಪ್ಪು
* ನೀರು ಎರಡೂವರೆ ಕಪ್
ಒಗ್ಗರಣೆಗೆ
ಸ್ವಲ್ಪ ಕರಿಬೇವು
ಜೀರಿಗೆ ಅರ್ಧ ಚಮಚ
ಸಾಸಿವೆ ಅರ್ಧ ಚಮಚ
ಚಿಟಿಕೆಯಷ್ಟು ಇಂಗು
ಒಂದು ಒಣ ಮೆಣಸು
ತುಪ್ಪ 2 ಚಮಚ

ತಯಾರಿಸುವ ವಿಧಾನ:

* ಸ್ವಲ್ಪ ದೊಡ್ಡ ಬಟ್ಟಲಿಗೆ ಕಡಲೆ ಹಿಟ್ಟು, ಮೊಸರು ಮತ್ತು ನೀರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ.

* ನಂತರ ತಳ ದಪ್ಪವಿರುವ ಪಾತ್ರೆಗೆ ಈ ಮಿಶ್ರಣವನ್ನು ಹಾಕಿ ಕುದಿಸಿ.

* ನಂತರ ಶುಂಠಿ ಪೇಸ್ಟ್, ಹಸಿ ಮೆಣಸಿನಕಾಯಿ ಪೇಸ್ಟ್, ಸಕ್ಕರೆ, ಉಪ್ಪು ಹಾಕಿ ಮಿಕ್ಸ್ ಮಾಡಿ, ಸೌಟ್ ಆಡಿಸುತ್ತಲೇ ಇರಿ.

* ಸೌಟ್ ನಿಂದ ಆಗಾಗ ಆಡಿಸುತ್ತಲೇ ಗ್ರೇವಿಯನ್ನು 8-10 ನಿಮಿಷ ಕುದಿಸಿ. ನಂತರ ಉರಿಯಿಂದ ಇಳಿಸಿ.

* ಈಗ ಒಗ್ಗರಣೆ ಪಾತ್ರೆಗೆ ತುಪ್ಪ ಹಾಕಿ , ತುಪ್ಪ ಬಿಸಿಯಾದಾಗ ಸಾಸಿವೆ, ಜೀರಿಗೆ ಹಾಕಿ, ನಂತರ ಒಣ ಮೆಣಸನ್ನು ಮುರಿದು ಹಾಕಿ, ಇಂಗು ಕರಿಬೇವು ಹಾಕಿ ಒಂದು ನಿಮಿಷ ಫ್ರೈ ಮಾಡಿ, ಒಗ್ಗರಣೆಯನ್ನು ಗ್ರೇವಿಗೆ ಸೇರಿಸಿ, ಮಿಕ್ಸ್ ಮಾಡಿ ಮತ್ತೊಮ್ಮೆ 2 ನಿಮಿಷ ಕುದಿಸಿ.

* ನಂತರ ಕತ್ತರಿಸಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಗುಜರಾತಿ ಶೈಲಿಯ ಮೊಸರು ಗ್ರೇವಿ ರೆಡಿ.