ಮಸೆದು ಮಾಡುವ ಮಸೊಪ್ಪು ಸಾರು

Updated: Thursday, August 23, 2012, 11:53 [IST]

ಮಸೊಪ್ಪು ಸಾರಿನ ರುಚಿಗೆ ಮನಸೋಲದವರು ತುಂಬಾ ವಿರಳ! ರೊಟ್ಟಿ, ಚಪಾತಿ, ರಾಗಿ ಮುದ್ದೆ, ಅನ್ನ ಈ ಅಡುಗೆಗಳಿಗೆ ಬೆಸ್ಟ್ ಕಾಂಬಿನೇಷನ್ ಈ ಮಸೊಪ್ಪು ಸಾರು. ಬಗೆಬಗೆಯ ಸೊಪ್ಪು ಹಾಕಿ ತಯಾರಿಸುವ ಈ ಸಾರು ಬಾಯಿಗೆ ರುಚಿ ಮತ್ತು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಈ ಮಸೊಪ್ಪು ಸಾರು ಮಾಡುವ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:

* ಒಂದು ಕಟ್ಟು ಅರಿವೆ ಸೊಪ್ಪು, ಸಬ್ಸಿಗೆ ಸೊಪ್ಪು ಒಂದು ಕಟ್ಟು, ಪಾಲಾಕ್ ಸೊಪ್ಪು ಒಂದು ಕಟ್ಟು, ಸ್ವಲ್ಪ ಕೀರೆ ಸೊಪ್ಪು, ಸ್ವಲ್ಪ ಮೆಂತೆ ಸೊಪ್ಪು
* ಒಂದು ಕಪ್ ತೊಗರಿ ಬೇಳೆ
* ಒಂದು ಈರುಳ್ಳಿ ( ಕತ್ತರಿಸಿದ್ದು)
* 5-8 ಬೆಳ್ಳುಳ್ಳಿ ಎಸಳು
* ಅರ್ಧ ಕಪ್ ತೆಂಗಿನ ತುರಿ
* 2 ಟೊಮೆಟೊ
* 6-8 ಹಸಿ ಮೆಣಸಿನ ಕಾಯಿ
* ಒಂದು ಚಮಚ ಅರಿಶಿಣ ಪುಡಿ
* ಒಂದು ಚಮಚ ಜೀರಿಗೆ
* ರುಚಿಗೆ ತಕ್ಕ ಉಪ್ಪು

ಒಗ್ಗರಣೆಗೆ:
* 1 ಚಮಚ ಎಣ್ಣೆ
* ಸ್ವಲ್ಪ ಸಾಸಿವೆ

ತಯಾರಿಸುವ ವಿಧಾನ:

1. ತೊಗರಿಬೇಳೆಯ ಜೊತೆ ಮೇಲೆ ಹೇಳಿದ ಎಲ್ಲಾ ಸೊಪ್ಪುಗಳು, ಈರುಳ್ಳಿ, ತೆಂಗಿನ ತುರಿ, ಬೆಳ್ಳುಳ್ಳಿ, ಟೊಮೆಟೊ, ಹಸಿಮೆಣಸಿನ ಕಾಯಿ, ಅರಿಶಿ ಪುಡಿ, ಜೀರಿಗೆ ಹಾಕಿ ಬೇಯಿಸಬೇಕು.

2. ನಂತರ ಈ ಮಿಶ್ರಣವನ್ನು ಉರಿಯಿಂದ ತೆಗೆದು ಆರಲು ಬಿಡಬೇಕು. ನಂತರ ಈ ಮಿಶ್ರಣವನ್ನು ನುಣ್ಣನೆ ಅರೆಯಬೇಕು. (ಈ ಮಿಶ್ರಣದ ಪೇಸ್ಟ್ ಗಟ್ಟಿಯಾಗಿರಲಿ)

3. ಈಗ ಸ್ವಲ್ಪ ದೊಡ್ಡದಿರುವ ಪಾತ್ರೆಯನ್ನು ಉರಿಯ ಮೇಲಿಟ್ಟು ಸ್ವಲ್ಪ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟ ಶಬ್ದ ಬರುವಾಗ ಅರೆದ ಸೊಪ್ಪಿನ ಮಿಶ್ರಣ ಹಾಕಿ ರುಚಿಗೆ ತಕ್ಕ ಉಪ್ಪು ಹಾಕಿ ಕುದಿಸಿದರೆ ರುಚಿಯಾದ ಮಸೊಪ್ಪು ಸಾರು ರೆಡಿ.