ಮೆಂತೆ ಸೊಪ್ಪು ಮತ್ತು ಪನ್ನೀರ್ ಕರಿ ರೆಸಿಪಿ

ಮೆಂತೆ ಸೊಪ್ಪು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಆದರೆ ಅದು ಕಹಿಯಾಗಿರುವುದರಿಂದ ಕೆಲವರು ಇದನ್ನು ತಿನ್ನಲು ಇಷ್ಟಪಡುವುದಿಲ್ಲ. ಇಲ್ಲಿ ಮೆಂತೆ ಸೊಪ್ಪು ಮತ್ತು ಪನ್ನೀರ್ ಹಾಕಿ ತಯಾರಿಸುವ ಮೆಂತೆ ಸೊಪ್ಪಿನ ಕರಿಯ ರೆಸಿಪಿ ನೀಡಲಾಗಿದೆ. ಈ ಅಡುಗೆಯಲ್ಲಿ ಹಾಲಿನ ಕೆನೆ ಸೇರಿಸುವುದರಿಂದ ಕಹಿ ಕಡಿಮೆಯಾಗಿ ಅಡುಗೆ ತುಂಬಾ ರುಚಿಕರವಾಗಿರುತ್ತದೆ.

ಬೇಕಾಗುವ ಸಾಮಾಗ್ರಿಗಳು:
ಪನ್ನೀರ್ 200 ಗ್ರಾಂ
ಹಸಿಮೆಣಸಿನಕಾಯಿ 1
ಈರುಳ್ಳಿ 1
ಶುಂಠಿ ಪೇಸ್ಟ್ 1 ಚಮಚ
ಟೊಮಟೊ 1 (ಕತ್ತರಿಸಿದ್ದು)
ಮೆಂತೆ ಸೊಪ್ಪು1-2 ಕಟ್ಟು
ಕೊತ್ತಂಬರಿ ಪುಡಿ 1 ಚಮಚ
ಕೆಂಪು ಮೆಣಸಿನ ಪುಡಿ ಅರ್ಧ ಚಮಚ
ಅರಿಶಿಣ ಪುಡಿ ಕಾಲು ಚಮಚ
ಹಾಲಿನ ಕೆನೆ 2 ಚಮಚ
ಕರಿ ಮೆಣಸಿನ ಪುಡಿ 1 ಚಮಚ
ತುಪ್ಪ 1 ಚಮಚ
ಎಣ್ಣೆ 1 ಚಮಚ
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

* ಮೆಂತೆ ಸೊಪ್ಪನ್ನು ಸ್ವಚ್ಛಗೊಳಿಸಿ ಮಿಕ್ಸಿಯಲ್ಲಿ ಹಾಕಿ ನುಣ್ಣಗೆ ರುಬ್ಬಿಟ್ಟುಕೊಳ್ಳಬೇಕು.

* ಬಾಣಲೆಯಲ್ಲಿ ತುಪ್ಪ ಹಾಕಿ ಬಿಸಿ ಮಾಡಬೇಕು. ನಂತರ ಪನ್ನೀರ್ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

* ನಂತರ ಅದರಲ್ಲಿ ಕರಿಮೆಣಸಿನ ಪುಡಿ ಹಾಕಿ ಬದಿಯಲ್ಲಿಡಬೇಕು.

* ಈಗ ಪಾತ್ರೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ ಅದರಲ್ಲಿ ಈರುಳ್ಳಿ ಮತ್ತು ಹಸಿ ಮೆಣಸಿನ ಕಾಯಿ ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಟೊಮೆಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಬೇಕು.

* ನಂತರ ರುಬ್ಬಿದ ಮೆಂತೆ ಸೊಪ್ಪು ಹಾಕಿ ಸ್ವಲ್ಪ ಹೊತ್ತು ಸೌಟ್ ನಿಂದ ಆಡಿಸುತ್ತಾ ಹುರಿಯಬೇಕು. ನಂತರ ಖಾರದ ಪುಡಿ, ಅರಿಶಿಣ ಪುಡಿ, ಕೊತ್ತಂಬರಿ ಪುಡಿ, ಗರಂ ಮಸಾಲ, ರುಚಿಗೆ ತಕ್ಕ ಉಪ್ಪು ಹಾಕಿ ಕುದಿಸಬೇಕು.

* ಮಿಶ್ರಣ ಚೆನ್ನಾಗಿ ಕುದಿ ಬಂದ ನಂತರ ಹಾಲಿನ ಕೆನೆ ಹಾಕಿ 2 ನಿಮಿಷ ಕುದಿಸಿ ನಂತರ ಪನ್ನೀರ್ ಹಾಕಿ ಮತ್ತೆ 2 ನಿಮಿಷ ಕುದಿಸಿ ಉರಿಯಿಂದ ತೆಗೆದರೆ ಮೆಂತೆ ಪನ್ನೀರ್ ಕರಿ ರೆಡಿ.