ಕಡಾಯಿ ಮಶ್ರೂಮ್ ಕರಿ ರೆಸಿಪಿ

ಅಣಬೆಯಿಂದ ಸಾರು, ಸ್ಟಾಟರ್ಸ್, ಗ್ರೇವಿ, ಪಲ್ಯ ಹೀಗೆ ಅನೇಕ ಬಗೆಯ ಅಡುಗೆಗಳನ್ನು ತಯಾರಿಸಬಹುದು. ಅಣಬೆ ಸಾರನ್ನು ತೆಂಗಿನಕಾಯಿ ಹಾಕಿ ಮಾಡಬಹುದು, ಇಲ್ಲದಿದ್ದರೆ ಬರೀ ಮಸಾಲೆ ಪದಾರ್ಥಗಳನ್ನು ಮಾತ್ರ ಹಾಕಿ ತಯಾರಿಸಬಹುದು.

ಇಲ್ಲಿ ನಾವು ಮಸಾಲೆ ಸಾಮಾಗ್ರಿಗಳನ್ನು ಬಳಸಿ ಮಾಡುವ ಕಡಾಯಿ ಅಣಬೆ ಸಾರಿನ (ಕಡಾಯಿ ಮಶ್ರೂಮ್ ಕರಿ) ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಗ್ರಿಗಳು:
* ಅಣಬೆ 250 ಗ್ರಾಂ
* ಈರುಳ್ಳಿ 2
* ಹಸಿ ಮೆಣಸಿನ ಕಾಯಿ 1 (ಕತ್ತರಿಸಿದ್ದು)
* ದುಂಡು ಮೆಣಸಿನ ಕಾಯಿ 1
* ಟೊಮೆಟೊ 2-3
* ಅರ್ಧ ಇಂಚಿನಷ್ಟು ದೊಡ್ಡದಿರುವ ಶುಂಠಿ
* 4-5 ಬೆಳ್ಳುಳ್ಳಿ ಎಸಳು
* ಕೆಂಪು ಮೆಣಸಿನ ಪುಡಿ (ಖಾರಕ್ಕೆ ತಕ್ಕಷ್ಟು)
* ಅರಿಶಿಣ ಪುಡಿ ಅರ್ಧಚಮಚ
* ಗರಂ ಮಸಾಲ 1 ಚಮಚ
* ರುಚಿಗೆ ತಕ್ಕ ಉಪ್ಪು
* ತುಪ್ಪ3-4ಚಮಚ
* ನೀರು 1 ಕಪ್
* ಕೊತ್ತಂಬರಿ ಸೊಪ್ಪು(ಅಲಂಕಾರಕ್ಕೆ)

ತಯಾರಿಸುವ ವಿಧಾನ:

* ಅಣಬೆಯನ್ನು ಶುಚಿ ಮಾಡಿ ಕತ್ತರಿಸಿಡಬೇಕು.

* ಶುಂಠಿ, ಹಸಿ ಮೆಣಸಿನಕಾಯಿ, ಬೆಳ್ಳುಳ್ಳಿ ಎಸಳು ಇವುಗಳನ್ನು ಅರೆದು ಪೇಸ್ಟ್ ರೀತಿಯಲ್ಲಿ ಮಾಡಿಡಬೇಕು.

* ಈಗ ಕಡಾಯಿಯಲ್ಲಿ ತುಪ್ಪ ಹಾಕಿ ಬಿಸಿ ಮಾಡಬೇಕು. ನಂತರ ಅದಕ್ಕೆ ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ಈಗ ಶುಂಠಿ, ಹಸಿ ಮೆಣಸಿನಕಾಯಿ, ಬೆಳ್ಳುಳ್ಳಿ ಹಾಕಿದ ತಯಾರಿಸಿದ ಪೇಸ್ಟ್ ಅನ್ನು ಹಾಕಬೇಕು.

* ನಂತರ ದುಂಡು ಮೆಣಸಿನ ಕಾಯಿ ಹಾಗೂ ಟೊಮೆಟೊ ಹಾಕಿ ಮೆತ್ತಗಾಗುವವರೆಗೆ ಹುರಿಯಬೇಕು. ನಂತರ ಖಾರದ ಪುಡಿ ಹಾಗೂ ಅರಿಶಿಣ ಪುಡಿ ಹಾಕಿ, ಕತ್ತರಿಸಿದ ಅಣಬೆ ಹಾಕಿ 2-3 ನಿಮಿಷ ಹುರಿದು. ಒಂದು ಲೋಟ ನೀರು ಹಾಕಿ ಗರಂ ಮಸಾಲ ಹಾಗೂ ರುಚಿಗೆ ತಕ್ಕ ಉಪ್ಪು ಸೇರಿಸಿ ಅಣಬೆ ಬೇಯುವವರೆಗೆ ಸೌಟ್ ನಿಂದ ಆಗಾಗ ತಿರುಗಿಸುತ್ತಾ ಬೇಯಿಸಬೇಕು.

* ನಂತರ ಉರಿಯಿಂದ ಇಳಿಸಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿಕರವಾದ ಕಡಾಯಿ ಮಶ್ರೂಮ್ ಕರಿ ರೆಡಿ.