ಬಾಯಿ ರುಚಿ ಹೆಚ್ಚಿಸುತ್ತೆ ಕಡಾಯಿ ಅಣಬೆ ಗ್ರೇವಿ

ಅಣಬೆ ರುಚಿಕರವಾದ ಆಹಾರ ಮಾತ್ರವಲ್ಲ, ಆರೋಗ್ಯಕ್ಕೆ ಒಳ್ಳೆಯದು. ಅದರಲ್ಲೂ ಫ್ರೈ ಮಾಡಿ ತಿನ್ನುವುದಕ್ಕಿಂತ ಸಾರು ಅಥವಾ ಗ್ರೇವಿ ರೀತಿ ಮಾಡಿ ತಿನ್ನುವುದು ಮತ್ತಷ್ಟು ಒಳ್ಳೆಯದು. ಅಣಬೆ ಸಾರು ಮಾಡಿದರೆ ಅನ್ನದ ಜೊತೆ ತಿನ್ನಬಹುದು ಅಥವಾ ಚಪಾತಿ, ರೊಟ್ಟಿ ಇವುಗಳನ್ನು ನೆಚ್ಚಿಕೊಂಡು ತಿನ್ನಲು ತುಂಬಾ ರಚಿಕರವಾಗಿರುತ್ತದೆ. ಇವತ್ತು ನಾವು ಕಡಾಯಿ ಅಣಬೆ ಗ್ರೇವಿ ಮಾಡುವ ವಿಧಾನ ತಿಳಿಯೋಣ.

ಬೇಕಾಗುವ ಸಾಮಾಗ್ರಿಗಳು:

* 200 ಗ್ರಾಂ ಅಣಬೆ
* 1 ಕತ್ತರಿಸಿದ ಕ್ಯಾಪ್ಸಿಕಂ (ದುಂಡು ಮೆಣಸಿನ ಕಾಯಿ)
* 2 ಈರುಳ್ಳಿ
* 4 ಟೊಮೆಟೊ
* ಶುಂಠಿ (1 ಚಿಕ್ಕ ತುಂಡು)
* 5-6 ಬೆಳ್ಳುಳ್ಳಿ ಎಸಳು
* 2 ಹಸಿ ಮೆಣಸಿನ ಕಾಯಿ
* ರುಚಿಗೆ ತಕ್ಕ ಉಪ್ಪು
* 1/2 ಚಮಚ ಕೆಂಪು ಮೆಣಸಿನ ಪುಡಿ
* 1 ಚಮಚ ಕೊತ್ತಂಬರಿ ಪುಡಿ
* 1/4 ಚಮಚ ಅರಿಶಿನ ಪುಡಿ
* 1/2 ಚಮಚ ಗರಂ ಮಸಾಲ
* 4 ಚಮಚ ತುಪ್ಪ

ತಯಾರಿಸುವ ವಿಧಾನ:

1. ಅಣಬೆಯನ್ನು ಶುಚಿಗೊಳಿಸಿ, ಕತ್ತರಿಸಿ ಚೆನ್ನಾಗಿ ತೊಳೆಯಬೇಕು. ನಂತರ ಕ್ಯಾಪ್ಸಿಕಂ ಅನ್ನು ಕತ್ತರಿಸಬೇಕು.

2. ಈರುಳ್ಳಿ ಮತ್ತು ಟೊಮೆಟೊವನ್ನು ಕತ್ತರಿಸಬೇಕು.

3. ಹಸಿ ಮೆಣಸಿನ ಕಾಯಿ, ಬೆಳ್ಳುಳ್ಳಿ, ಶುಂಠಿಯನ್ನು ಪೇಸ್ಟ್ ರೀತಿ ಮಾಡಬೇಕು.

4. ಈಗ ಬಾಣಲೆಯನ್ನು ಬಿಸಿ ಮಾಡಿ ತುಪ್ಪ ಹಾಕಿ ಈರುಳ್ಳಿ ಹಾಕಿ, ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

5. ನಂತರ ಹಸಿ ಮೆಣಸಿನ ಕಾಯಿ, ಬೆಳ್ಳುಳ್ಳಿ, ಶುಂಠಿ ಹಾಕಿ ತಯಾರಿಸಿದ ಪೇಸ್ಟ್ ಹಾಕಿ 1-2 ನಿಮಿಷ ಬಿಸಿ ಮಾಡಬೇಕು.

6. ಈಗ ಟೊಮೆಟೊ ಹಾಕಿ, ಟೊಮೆಟೊ ಮೆತ್ತಾಗುವವರೆಗೆ ಸೌಟ್ ನಿಂದ ಆಡಿಸುತ್ತಾ ಬಿಸಿ ಮಾಡಬೇಕು.

7. ಈಗ ರುಚಿಗೆ ತಕ್ಕ ಉಪ್ಪು, ಕೆಂಪು ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಅರಿಶಿಣ ಪುಡಿ ಹಾಕಿ ಮಿಶ್ರ ಮಾಡಬೇಕು. ನಂತರ ಅಣಬೆ ಹಾಕಿ ಅರ್ಧ ಕಪ್ ನೀರು ಹಾಕಬೇಕು.

8. ನಂತರ ಅಣಬೆ ಬೇಯುವವರೆಗೆ ಬೇಯಿಸಬೇಕು.

9. ನಂತರ ಕ್ಯಾಪ್ಸಿಕಂ ಹಾಕಿ 3-4 ನಿಮಿಷ ಬೇಯಿಸಿ ಉರಿಯಿಂದ ತೆಗೆದರೆ ರುಚಿಕರವಾದ ಕಡಾಯಿ ಅಣಬೆ ಗ್ರೇವಿ ರೆಡಿ.