ಡಾಬಾದ ದಾಲ್ ಕರಿ ಏಕೆ ಅಷ್ಟೊಂದು ರುಚಿಕರ?

ಡಾಬಾ ಶೈಲಿಯ ಅಡುಗೆಯ ರುಚಿಯೇ ವಿಭಿನ್ನ. ಅವರು ಮಾಡಿದ ದಾಲ್ ಸಾರಿಗೂ, ನಾವು ಮಾಡುವ ಬೇಳೆ ಸಾರಿಗೂ ರುಚಿಯಲ್ಲಿ ಸಾಕಷ್ಟು ವ್ಯತ್ಯಾಸವಿರುತ್ತದೆ. ಅವರ ಅಡುಗೆಯೇ ವಿಧಾನವೇ ಹಾಗೆ ತಮ್ಮ ಅಡುಗೆಯ ಸ್ವಾದದಿಂದ ಗ್ರಾಹಕರನ್ನು ಮತ್ತೆ-ಮತ್ತೆ ಸೆಳೆಯುವಂತಿರುತ್ತದೆ.

ಡಾಬಾದಲ್ಲಿ ದೊರೆಯುವ ದಾಲ್ ರುಚಿಯನ್ನು ಮನೆಯಲ್ಲಿಯೇ ಮಾಡಿ ತಿನ್ನ ಬಯಸುವುದಾದರೆ ಇಲ್ಲಿದೆ ನೋಡಿ ರೆಸಿಪಿ.

ಬೇಕಾಗುವ ಸಾಮಾಗ್ರಿಗಳು
ತೊಗರಿ ಬೇಳೆ ಅರ್ಧ ಕಪ್
ಉದ್ದಿನ ಬೇಳೆ ಅರ್ಧ ಕಪ್
ರಾಜ್ಮಾ ಅರ್ಧ ಕಪ್
ಜೀರಿಗೆ 1 ಚಮಚ
ಕೊತ್ತಂಬರಿ ಪುಡಿ 1 ಚಮಚ
ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಟೊಮೆಟೊ 1
ಈರುಳ್ಳಿ1
ಕಸೂರಿ ಮೇತಿ (ಒಣ ಮೆಂತೆ ಎಲೆ) 2 ಚಮಚ
ಎಣ್ಣೆ 2 ಚಮಚ
ತೆಂಗಿನೆಣ್ಣೆ 1 ಚಮಚ
ನೀರು 2 ಕಪ್

ತಯಾರಿಸುವ ವಿಧಾನ:

* ರಾಜ್ಮಾವನ್ನು ಕಮ್ಮಿಯೆಂದರೂ 4 ಗಂಟೆ ನೀರಿನಲ್ಲಿ ನೆನೆ ಹಾಕಿರಬೇಕು.

* ನಂತರ ಅದನ್ನು ತೊಗರಿಬೇಳೆ ಮತ್ತು ಉದ್ದಿನಬೇಳೆ ಜೊತೆ ಹಾಕಿ , 2 ಕಪ್ ನೀರು ಹಾಕಿ ಸ್ವಲ್ಪ ಉಪ್ಪು ಹಾಕಿ 3 ವಿಶಲ್ ಬರುವವರೆಗೆ ಬೇಯಿಸಿ. ನಂತರ ಉರಿಯಿಂದ ಇಳಿಸಿ 5 ನಿಮಿಷ ಇಡಿ.

* ಈಗ ಸಾರು ಪಾತ್ರೆಯಲ್ಲಿ ಎಣ್ಣೆ ಹಾಕಿ ಅದು ಬಿಸಿಯಾದಾಗ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ 2-3 ನಿಮಿಷ ಹುರಿಯಿರಿ, ನಂತರ ಈರುಳ್ಳಿ ಹಾಕಿ, ಈರುಳ್ಳಿ ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ.

* ಈಗ ಜೀರಿಗೆ ಪುಡಿ, ಖಾರದ ಪುಡಿ, ಕೊತ್ತಂಬರಿ ಪುಡಿ, ಅರಿಶಿಣ ಪುಡಿ ಹಾಕಿ ಮತ್ತೆ 2 ನಿಮಿಷ ಹುರಿಯಿರಿ, ನಂತರ ಟೊಮೆಟೊ ಮತ್ತು ಸ್ವಲ್ಪ ಉಪ್ಪು ಹಾಕಿ ಟೊಮೆಟೊ ಮೆತ್ತಗಾಗುವವರೆಗೆ ಫ್ರೈ ಮಾಡಿ, ನಂತರ ಬೇಯಿಸಿದ ಬೇಳೆ ಮತ್ತು ರಾಜ್ಮಾ ಮಿಶ್ರಣವನ್ನು ಹಾಶಕಿ ಒಮ್ಮೆ ಸೌಟ್ ನಿಂದ ಆಡಿಸಿ ಪಾತ್ರೆಯ ಬಾಯಿ ಮುಚ್ಚಿ 5-6 ನಿಮಿಷ ಬೇಯಿಸಿ. ಉಪ್ಪು ಬೇಕಿದ್ದರೆ ಸ್ವಲ್ಪ ಉಪ್ಪು ಸೇರಿಸಿ.

* ನಂತರ ಉರಿಯಿಂದ ಇಳಿಸಿ ಕಸೂರಿ ಮೇತಿಯನ್ನು ಉದುರಿಸಿ, ನಂತರ ಒಮ್ಮೆ ಮಿಕ್ಸ್ ಸ್ವಲ್ಪ ತೆಂಗಿನೆಣ್ಣೆ ಅಥವಾ ಬೆಣ್ಣೆ ಹಾಕಿದರೆ ಡಾಬಾ ಶೈಲಿಯಲ್ಲಿ ದಾಲ್ ಕರಿ ರೆಡಿ.