ಬೇಸಿಗೆಗೆ ಪನೀರ್ ಮೊಸರು ಸಾರು ಬೆಸ್ಟ್

ಬೇಸಿಗೆಯಲ್ಲಿ ಮೊಸರು, ಮಜ್ಜಿಗೆ ಬಳಸಿ ಖಾದ್ಯಗಳನ್ನು ಮಾಡುವುದು ಒಳ್ಳೆಯದು. ಏಕೆಂದರೆ ಮೊಸರು, ಮಜ್ಜಿಗೆ ದೇಹವನ್ನು ತಂಪಾಗಿಡುವಲ್ಲಿ ತುಂಬಾ ಸಹಕಾರಿ. ಕರ್ನಾಟಕದಲ್ಲಿ ಮೊಸರಿಗೆ ಕುಂಬಳಕಾಯಿ ಹಾಕಿ ಮಾಡುವ ಕುಂಬಳಕಾಯಿ ಮೊಸರು ಸಾರಿನ ರುಚಿ ಸಾಮಾನ್ಯವಾಗಿ ಎಲ್ಲರಿಗೂ ಚಿರಪರಿಚಿತ.

ಇಲ್ಲಿ ನಾವು ಮೊಸರಿಗೆ ಪನೀರ್ ಹಾಕಿ ಮಾಡುವ ಪನ್ನೀರ್ ಮೊಸರು ಸಾರು ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಪನೀರ್ 200 ಗ್ರಾಂ
ಹಸಿ ಬಟಾಣಿ ಅರ್ಧ ಕಪ್ (ನೀರಿನಲ್ಲಿ ನೆನೆ ಹಾಕಿದ್ದು)
ಜೀರಿಗೆ ಅರ್ಧ ಚಮಚ
ಸಾಸಿವೆ
ಸ್ವಲ್ಪ ಇಂಗು
ಹಸಿ ಮೆಣಸಿನಕಾಯಿ 2 ಮತ್ತು ಖಾರದ ಪುಡಿ(ಕಾರಕ್ಕೆ ತಕ್ಕಷ್ಟು)
ಅರ್ಧ ಚಮಚ ಅರಿಶಿಣ
ಸ್ವಲ್ಪ ಕೊತ್ತಂಬರಿ ಸೊಪ್ಪು
ರುಚಿಗೆ ತಕ್ಕ ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

* ಪಾತ್ರೆಯಲ್ಲಿ 2 ಚಮಚ ಎಣ್ಣೆ ಹಾಕಿ, ಬಿಸಿ ಮಾಡಿ ಅದಕ್ಕೆ ಸಾಸಿವೆ, ಜೀರಿಗೆ, ಇಂಗು, ಕತ್ತರಿಸಿದ ಹಸಿ ಮೆಣಸಿನಕಾಯಿ ಹಾಕಿ 2-3 ನಿಮಿಷ ಹುರಿಯಿರಿ. ಈಗ ಪನೀರ್ ತುಂಡುಗಳನ್ನು ಹಾಕಿ ಪನ್ನೀರ್ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ. ಈಗ ನೆನೆ ಹಾಕಿದ ಹಸಿ ಬಟಾಣಿಯನ್ನೂ ಸೇರಿಸಿ 3 ನಿಮಿಷ ಫ್ರೈ ಮಾಡಿ

* ಈಗ ಅರಿಶಿಣ ಪುಡಿ, ಸ್ವಲ್ಪ ಖಾರದ ಪುಡಿ ಹಾಕಿ, ನಂತರ ಚೆನ್ನಾಗಿ ಕದಡಿದ ಮೊಸರು , ರುಚಿಗೆ ತಕ್ಕ ಉಪ್ಪು ಸೇರಿಸಿ ಕಲೆಸಿ ಪಾತ್ರೆಯ ಬಾಯಿ ಮುಚ್ಚಿ ಕುದಿಸಿ. ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಪನೀರ್ ಮೊಸರು ಸಾರು ರೆಡಿ.