ಘಮಘಮ ಪುಡಿಕುಟ್ಟಿಹಾಕಿದ ಹುಳಿ

Rasam

oi-Staff

By * ಪದ್ಮಾವತಿ ಬಾಯಿ, ಡಾಬಸ್ ಪೇಟೆ

Published: Thursday, July 2, 2009, 15:07 [IST]

ಸಾರಿನ ಪುಡಿ, ಹುಳಿ ಪುಡಿ, ವಾಂಗಿಭಾತ್ ಪುಡಿ, ಚಟ್ನಿಪುಡಿಗಳನ್ನು ಮಾಡಿ ಡಬ್ಬದಲ್ಲಿ ತುಂಬಿಟ್ಟುಕೊಳ್ಳುವುದು ಸಾಮಾನ್ಯ. ಸಿದ್ಧ ಮಸಾಲೆ ಪುಡಿ ಇದ್ದರೆ ಅಡುಗೆ ಬೇಗ ಮಾಡುವುದು ಸಾಧ್ಯ. ಆದರೆ ಕೆಲವೊಮ್ಮೆ ಪುಡಿ ಖಾಲಿ ಆದಾಗ ಅಥವಾ ಮಾಡಿದ್ದೇ ಮಾಡಿ ಬೇಜಾರಾದಾಗ ಪುರುಸೊತ್ತು ಇದ್ದವರು ಪುಡಿ ಕುಟ್ಟಿ ಹಾಕಿದ ಹುಳಿ ಮಾಡಬಹುದು.

ಈ ಪುಡಿಯನ್ನು ದಿಢೀರ್ ತಯಾರಿಸಿ ಹುಳಿ ಮಾಡುವುದಕ್ಕೆ ಸಾಕಷ್ಟು ಸಮಯ ಬೇಕಾಗುತ್ತದೆ. ನಾಲಕ್ಕು ಮಂದಿಯ ಕುಟುಂಬಕ್ಕೆ ಅಗತ್ಯವಾದಷ್ಟು ಪುಡಿ ಕುಟ್ಟಿದ ಹುಳಿಪುಡಿ ಅಥವಾ ಸಾಂಬಾರ್ ಪುಡಿ ರೆಸಿಪಿಯನ್ನು ಇಲ್ಲಿ ಕೊಡಲಾಗಿದೆ.

ಎಂಟು ಖಾರದ ಒಣಮೆಣಸಿನಕಾಯಿಯನ್ನು ನಾಲಕ್ಕು ಚಮಚ ಎಣ್ಣೆಯಲ್ಲಿ ಹುರಿಯಬೇಕು. ಕೇವಲ ಹುರಿಯುವುದಲ್ಲ, ಕರಿದ ಹಾಗೆ ಇರಬೇಕು. ಮೆಣಸಿನಕಾಯಿ ಸ್ವಲ್ಪ ಕಪ್ಪು ಬಣ್ಣಕ್ಕೆ ಬಂದನಂತರ ಸಿಮ್ ಮಾಡಿ ಮೆಣಸಿನಕಾಯಿಗೆ ಕೆಳಕಂಡ ಪದಾರ್ಥಗಳನ್ನು ಬೆರೆಸಿ ಮತ್ತೆ ನಿಧಾನವಾಗಿ ಹುರಿಯಬೇಕು.

ಕಡಲೆಬೇಳೆ, ಉದ್ದಿನಬೇಳೆ, ಮೆಂತ್ಯ, ಜೀರಿಗೆ ತಲಾ ಒಂದು ಚಮಚದಂತೆ ಹಾಕಬೇಕು. ಚೆನ್ನಾಗಿ ಹುರಿದನಂತರ ಮಿಕ್ಸಿಗೆ ಹಾಕುವುದು. ಮಿಕ್ಸಿಗೆ ಒಂದು ತೊಳೆ ಹುಣಿಸೆ ಹಣ್ಣು, ಚೂರು ಬೆಲ್ಲ ಸೇರಿಸಿ ರುಬ್ಬಿಕೊಳ್ಳಬೇಕು. ಮೊದಲು ಡ್ರೈ ಆಗಿ ರುಬ್ಬಿಕೊಂಡು ಆನಂತರ ನೀರು ಬೆರೆಸಿ ಚಟ್ನಿಯ ರೂಪಕ್ಕೆ ಬರುವಂತೆ ರುಬ್ಬಬೇಕು.

ಕುಕ್ಕರ್ ನಲ್ಲಿ ಬೇಯಿಸಿದ ತೊಗರಿಬೇಳೆ ಹಾಗೂ ತರಕಾರಿಗೆ ಮೇಲಿನ ಚಟ್ನಿಯನ್ನು ಚೆನ್ನಾಗಿ ಬೆರೆಸಿ ಕುದಿಸಬೇಕು. ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಸಾಸಿವೆ ಕರಿಬೇವು ಸೊಪ್ಪಿನ ಒಗ್ಗರಣೆ ಕೊಡಬೇಕು. ಪುಡಿ ಕುಟ್ಟಿಹಾಕಿದ ಹುಳಿಗೆ ಸಾಮಾನ್ಯವಾಗಿ ಗಟ್ಟಿಯಾದ ತರಕಾರಿ ಹೊಂದುತ್ತದೆ. ಉದಾಹರಣೆಗೆ ಆಲೂಗೆಡ್ಡೆ, ಗೆಡ್ಡೆಕೋಸು, ಬಾಳೆಕಾಯಿ ಇತ್ಯಾದಿ.