ಕೊಂಕಣಿ ಶೈಲಿಯಲ್ಲಿ ಮಾವಿನ ಹಣ್ಣಿನ ಸಾರು

ಮಾವಿನ ಹಣ್ಣನ್ನು ತಿನ್ನಲು, ಜ್ಯೂಸ್ ಮಾಡಲು ಮಾತ್ರವಲ್ಲದೆ , ಇದರಿಂದ ರುಚಿಕರವಾದ ಸಾರು ಮಾಡಬಹುದಾಗಿದೆ. ಮಾವಿನ ಹಣ್ಣಿನ ಸಾರನ್ನು ಕೂಡ ಅನೇಕ ರುಚಿಯಲ್ಲಿ ತಯಾರಿಸಬಹುದು. ಇವತ್ತು ನಾವು ಕೊಂಕಣಿಯರ ಅಡುಗೆ ಶೈಲಿಯಲ್ಲಿ ಮಾವಿನ ಹಣ್ಣಿನ ಸಾರು ಮಾಡುವ ವಿಧಾನ ತಿಳಿಯೋಣ:

ಬೇಕಾಗುವ ಸಾಮಾಗ್ರಿಗಳು:

* ಮಾವಿನ ಹಣ್ಣು 2
* ಎಣ್ಣೆ
* ಸಾಸಿವೆ
* ಚಿಟಿಕೆಯಷ್ಟು ಇಂಗು
* ಒಣ ಕೆಂಪು ಮೆಣಸಿನ ಕಾಯಿ 1-2
* ಕರಿಬೇವಿನ ಎಲೆ

ಮಸಾಲೆಗೆ:

* ಅರ್ಧ ಭಾಗ ತುರಿದ ತೆಂಗಿನ ಕಾಯಿ
* 1/2 ಚಮಚ ಎಳ್ಳು
* 2 ಚಮಚ ಹುಣಸೆ ಹಣ್ಣಿನ ರಸ
* 2-3 ಕೆಂಪು ಮೆಣಸಿನ ಕಾಯಿ
* ರುಚಿಗೆ ತಕ್ಕ ಉಪ್ಪು
* ರುಚಿಗೆ ಸ್ವಲ್ಪ ಬೆಲ್ಲ

ತಯಾರಿಸುವ ವಿಧಾನ:

1. ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ,ಒಣ ಕೆಂಪು ಮೆಣಸಿನ ಕಾಯಿ ಹಾಕಿ ಬಿಸಿ ಮಾಡಿ ಬದಿಯಲ್ಲಿ ತೆಗೆದಿಡಬೇಕು.

2. ಈಗ ತೆಂಗಿನ ಕಾಯಿ, ಹುಣಸೆ ಹಣ್ಣಿನ ರಸ, ಬೆಲ್ಲ, ಹುರಿದ ಎಳ್ಳು ಮತ್ತು ಮೆಣಸಿನ ಕಾಯಿ ಹಾಕಿ ಮಿಶ್ರಣ ಗಟ್ಟಿಯಾಗಿರುವಂತೆ ಮಿಕ್ಸಿಯಲ್ಲಿ ಆಡಿಸಬೇಕು.

3. ಈಗ ಮಾವಿನ ಹಣ್ಣಿನ ಸಿಪ್ಪೆ ತೆಗೆದು ಅದರ ತಿರಳನ್ನು ಚಿಕ್ಕದಾಗಿ ಕತ್ತರಿಸಿಡಬೇಕು.

4. ಅದಕ್ಕೆ ಅರೆದ ಮಸಾಲೆ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

5. ಈಗ ಬಾಣಲೆಯನ್ನು ಬಿಸಿ ಮಾಡಿ ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟ ಶಬ್ದ ಬರುವಾಗ ಚಿಟಿಕೆಯಷ್ಟು ಇಂಗು ಮತ್ತು ಕರಿ ಬೇವಿನ ಎಲೆ ಮತ್ತು ಒಣ ಕೆಂಪು ಮೆಣಸಿನ ಕಾಯಿಯನ್ನು ಕೈಯಲ್ಲಿ ಮುರಿದ ಎಣ್ಣೆಯಲ್ಲಿ ಹಾಕಿ, ಮಾವಿನ ಹಣ್ಣಿನ ಮಿಶ್ರಣವನ್ನು ಸೇರಿಸಬೇಕು. ಈಗ ಮಿಶ್ರಣ ಕುದಿ ಬರುವವರೆಗೆ ಬೇಯಿಸಬೇಕು.

6. ನಂತರ ಉರಿಯಿಂದ ತೆಗೆದು 3-4 ಗಂಟೆ ಕಾಲ ಇಡಬೇಕು.

ಈ ರೀತಿ ತಯಾರಿಸಿದ ಮಾವಿನ ಹಣ್ಣಿನ ಸಾರನ್ನು ಅನ್ನದ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.