ತಡ ಇನ್ಯಾಕ, ಸವಿದು ಬಿಡಿ ‘ಹೆಸರು ಹಿಟ್ಟಿನ ಝುಣಕ’

ಚಪಾತಿ, ಜೋಳದ ರೊಟ್ಟಿ, ಅಕ್ಕಿರೊಟ್ಟಿ, ಸಜ್ಜೆರೊಟ್ಟಿ, ಇವುಗಳೊಂದಿಗೆ ಅದ್ಭುತವಾಗಿ ಮ್ಯಾಚ್‌ ಆಗುತ್ತದೆ. ಹಾಗಿದ್ದರೆ ತಡವೇಕೆ? ನಿಮ್ಮ ಪಾಕಶಾಲೆಯಲ್ಲೂ ಈ ಪ್ರಯೋಗ ನಡೆದುಬಿಡಲಿ...

ರೇವಣಸಿದ್ಧಪ್ಪ ದೊರೆಗಳ್‌, ಸರೂರು.

ಝುಣಕ ಎಂದ ತಕ್ಷಣ, ಉತ್ತರ ಕರ್ನಾಟಕದ ಪಾಕವೈವಿಧ್ಯ ಕಣ್ಣ ಮುಂದೆ ಪ್ರತ್ಯಕ್ಷವಾಗುತ್ತದೆ. ಹಲವು ಬಗೆಯ ಪಲ್ಯಗಳಲ್ಲಿ ಝಣಕ ತನ್ನದೇ ಆದ ವಿಶಿಷ್ಟ ಸ್ಥಾನ ಕಾಪಾಡಿಕೊಂಡಿದೆ. ಇದು ಸಾಮಾನ್ಯವಾಗಿ ಎರಡು ಬಗೆಯಲ್ಲಿ ಪ್ರಚಲಿತವಿದೆ.

ಹೆಚ್ಚಾಗಿ ಬಳಕೆಯಲ್ಲಿರುವುದು ಕಡಲೆಹಿಟ್ಟಿನ ಝುಣಕ. ಸ್ವಲ್ಪ ಕಡಿಮೆ ಪ್ರಮಾಣದಲ್ಲಿ ಕಂಡುಬರುವುದೇ ಹೆಸರು ಹಿಟ್ಟಿನ ಝುಣಕ. ಕಡಲೆಹಿಟ್ಟಿನ ಝುಣಕ ಒಂದು ಪಟ್ಟು ರುಚಿಯಾದರೆ, ಹೆಸರು ಹಿಟ್ಟಿನ ಝುಣಕದ ರುಚಿ ದುಪ್ಪಟ್ಟು. ಅದರ ರುಚಿ ಅನುಪಮ. ಅದನ್ನು ತಯಾರಿಸುವ ಬಗೆ ಹೇಗೆಂದು ಹೇಳುತ್ತೇನೆ ಕೇಳಿ...

ಬೇಕಾಗುವ ಸಾಮಗ್ರಿಗಳು :

ನೂರು ಗ್ರಾಂ ಹೆಸರುಕಾಳಿನ ಹಿಟ್ಟು
ಎರಡು ಮಧ್ಯಮ ಗಾತ್ರದ ಈರುಳ್ಳಿ
4ರಿಂದ 6 ಹಸಿಮೆಣಸಿನಕಾಯಿ
ಕರಿಬೇವು ಸೊಪ್ಪು
ಒಂದು ಚಿಟಿಕೆ ಅರಿಶಿನಪುಡಿ
ರುಚಿಗೆ ತಕ್ಕ ಉಪ್ಪು
ಒಂದು ಚಿಕ್ಕಕಟ್ಟು ಕೋತಂಬರಿ
25ಗ್ರಾಂ ಕರಿಎಳ್ಳು ಅಥವಾ ಬಿಳಿಎಳ್ಳು
ಅಡುಗೆ ಎಣ್ಣೆ, ಜೀರಿಗೆ, ಸಾಸಿವೆ

ಮಾಡುವ ವಿಧಾನ :

ಈರುಳ್ಳಿ, ಹಸಿಮೆಣಸಿನಕಾಯಿ, ಕೋತಂಬರಿಯನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ. ಆನಂತರ ಬಾಣಲೆಯನ್ನು ಒಲೆ ಮೇಲೆ ಕಾಯಲು ಇಡಿ. ಎಣ್ಣೆ ಹಾಕಿ, ಸಾಸಿವೆ, ಜೀರಿಗೆ ಹಾಕಿ ಕಲಕಿ. ಈಗ ಹಸಿಮೆಣಸಿನಕಾಯಿ, ಕೋತಂಬರಿ, ಈರುಳ್ಳಿ ಹಾಕಿ ಒಗ್ಗರಣೆಯನ್ನು ಚೆನ್ನಾಗಿ ತಿರುವಾಡಿ.

ಒಗ್ಗರಣೆ ಸ್ವಲ್ಪ ಬೆಂದ ಮೇಲೆ ಸುಮಾರು ಎರಡು ಗ್ಲಾಸಿ(ಟೀ ಗ್ಲಾಸ್‌ ಅಲ್ಲ)ನಷ್ಟು ನೀರುಹಾಕಿ ಕುದಿಯಲು ಬಿಡಿ. ಕುದಿಯುತ್ತಿರುವ ಮಿಶ್ರಣದಲ್ಲಿ ಅರಿಶಿನ ಹಾಗೂ ಉಪ್ಪು ಹಾಕಿ. ಮಿಶ್ರಣ ಕುದಿಯಲು ಶುರುವಾದ ಮೇಲೆ ಹೆಸರು ಹಿಟ್ಟನ್ನು ಅದಕ್ಕೆ ಬೆರೆಸುತ್ತಾ ಸೌಟಿನಿಂದ ತಿರುವುತ್ತಿರಿ. ಒಂದೆರಡು ನಿಮಿಷ ಬಾಣಲೆಯನ್ನು ತಟ್ಟೆಯಿಂದ ಮುಚ್ಚಿಡಿ.

ಈಗ ಒಂದು ತಟ್ಟೆ ತೆಗೆದುಕೊಂಡು, ಅದರ ತಳಕ್ಕೆ ಎಣ್ಣೆ ಸವರಿಕೊಳ್ಳಿ. ಬಾಣಲೆಯನ್ನು ಕೆಳಕ್ಕೆ ಇಳಿಸಿಕೊಂಡು, ಅದರಲ್ಲಿರುವ ಪದಾರ್ಥವನ್ನು ತಟ್ಟೆಗೆ ಹಾಕಿ, ಚೆನ್ನಾಗಿ ತಟ್ಟೆತುಂಬ ಹರಡಿ. ಒಂದೈದು ನಿಮಿಷ ಬಿಟ್ಟು, ಹರಡಿರುವ ಪದಾರ್ಥದ ಮೇಲೆ ಕರಿಎಳ್ಳು ಅಥವಾ ಬಿಳಿಎಳ್ಳು ಹಾಕಿ ಮೆಲ್ಲಗೆ ಅದುಮಿ. ಆನಂತರ ನಿಮಗೆ ಬೇಕಾದ ಆಕಾರದಲ್ಲಿ ಚಾಕುವಿನಿಂದ ಕತ್ತರಿಸಿಕೊಳ್ಳಿ. ಈಗ ನಿಮಗೆ ರುಚಿಯ ಪರಾಕಾಷ್ಟೆ ತೋರುವ ಝಣಕ ರೆಡಿ...

ಚಪಾತಿ, ಜೋಳದ ರೊಟ್ಟಿ, ಅಕ್ಕಿರೊಟ್ಟಿ, ಸಜ್ಜೆರೊಟ್ಟಿ, ಇವುಗಳೊಂದಿಗೆ ಅದ್ಭುತವಾಗಿ ಮ್ಯಾಚ್‌ ಆಗುತ್ತದೆ. ಹಾಗಿದ್ದರೆ ತಡವೇಕೆ? ನಿಮ್ಮ ಪಾಕಶಾಲೆಯಲ್ಲೂ ಈ ಪ್ರಯೋಗ ನಡೆದುಬಿಡಲಿ...