ತರಕಾರಿ ಬಳಸಿ ಮಾಡುವ ಬಂಗಾಳಿ ಖಾದ್ಯ- ಶುಕ್ತೊ

ಇಲ್ಲಿ ನಾವು ಶುಕ್ತೊ ಅನ್ನುವ ಬೆಂಗಾಳಿ ಶೈಲಿಯ ರೆಸಿಪಿ ನೀಡಿದ್ದೇವೆ. 4-5 ಬಗೆಯ ತರಕಾರಿ ಬಳಸಿ, ಅದಕ್ಕೆ ಪಂಚ ಫೋರನ್ ಎಂಬ ಮಸಾಲೆ ಸೇರಿಸಿ ತಯಾರಿಸುವ ಈ ಪಲ್ಯದ ರುಚಿ ಖಂಡಿತ ನಿಮ್ಮ ಬಾಯಿಗೂ ತುಂಬಾ ರುಚಿ ಅನಿಸುವುದು.

ಘಮ್ಮೆನ್ನುವ ಸುವಾಸನೆಯಿಂದ ಕೂಡಿರುವ ಈ ರುಚಿಕರವಾದ ಅಡುಗೆಯನ್ನು ಮಾಡುವ ವಿಧಾನ ಸುಲಭವಾಗಿದ್ದು, ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು
ಹಾಗಲಕಾಯಿ 2
ಆಲೂಗಡ್ಡೆ 2
ಬದನೆಕಾಯಿ1
ಸಾರು ಬಾಳೆ 1
ಬಟಾಣಿ ಅರ್ಧ ಕಪ್(ಬೇಯಿಸಿದ್ದು)
ಟೊಮೆಟೊ 1
ಒಂದು ಇಂಚಿನಷ್ಟು ದೊಡ್ಡದಿರುವ ಶುಂಠಿ
ಪಂಚ ಫೋರನ್(5 ಬಗೆಯ ಮಸಾಲೆ ಸಾಮಾಗ್ರಿಗಳನ್ನು ಹಾಕಿ ಮಾಡುವ ಪುಡಿ)
ಹಸಿ ಮೆಣಸಿನಕಾಯಿ 2
ಗಸೆ ಗಸೆ 2 ಚಮಚ
ಅರಿಶಿಣ ಪುಡಿ 1 ಚಮಚ
ಸಕ್ಕರೆ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ನೀರು 1 ಕಪ್
ಎಣ್ಣೆ 2 ಚಮಚ

ಪಂಚ ಫೋರನ್ ಗೆ ಬೇಕಾಗುವ ಪದಾರ್ಥಗಳು
ಸಾಸಿವೆ 1 ಚಮಚ
ಜೀರಿಗೆ 1 ಚಮಚ
ಮೆಂತೆ 1 ಚಮಚ
ಜೀರಿಗೆ 1 ಚಮಚ
ಈರುಳ್ಳಿ ಬೀಜ 1 ಚಮಚ

ತಯಾರಿಸುವ ವಿಧಾನ:

* ಗಸೆಗಸೆ, ಹಸಿಮೆಣಸಿನಕಾಯಿ, ಶುಂಠಿ, ಪಂಚ ಫೋರನ್ ಗೆ 2 ಚಮಚ ನೀರು ಹಾಕಿ ನುಣ್ಣನೆ ರುಬ್ಬಿ.

* ನಂತರ ಪ್ಯಾನ್ ನಲ್ಲಿ ಎಣ್ಣೆ ಹಾಕಿ ಅದು ಬಿಸಿಯಾದಾಗ ಮೊದಲಿಗೆ ಆಲೂಗಡ್ಡೆ ಫ್ರೈ ಮಾಡಿ ಅದನ್ನು ತೆಗೆದು ಪಕ್ಕಕ್ಕಿಡಿ, ನಂತರ ಮತ್ತೊಂದು ಚಮಚ ಎಣ್ಣೆ ಹಾಕಿ ಹಾಗಲಕಾಯಿಯನ್ನು ಫ್ರೈ ಮಾಡಿ, ನಂತರ ಬದನೆಕಾಯಿಯನ್ನು ಫ್ರೈ ಮಾಡಿ ಇಡಿ.

* ನಂತರ ಬಾಳೆಕಾಯಿ ಮತ್ತು ಬಟಾಣಿ ಹಾಕಿ 6-8 ನಿಮಿಷ ಫ್ರೈ ಮಾಡಿ, ಈಗ ಗಸೆಗಸೆ ಪೇಸ್ಟ್ ಹಾಕಿ 3-4 ನಿಮಿಷ ಫ್ರೈ ಮಾಡಿ.

* ನಂತರ ಟೊಮೆಟೊ, ಅರಿಶಿಣ ಪುಡಿ, ರುಚಿಗೆ ತಕ್ಕ ಉಪ್ಪು, ಸಕ್ಕರೆ ಹಾಕಿ 3-4 ನಿಮಿಷ ಫ್ರೈ ಮಾಡಿ.

* ನಂತರ ಫ್ರೈ ಮಾಡಿಟ್ಟ ಉಳಿದ ಪದಾರ್ಥಗಳನ್ನು ಹಾಕಿ 1 ಕಪ್ ನೀರು ಸೇರಿಸಿ ಮಿಕ್ಸ್ ಮಾಡಿ ಪಾತ್ರೆಯ ಬಾಯಿ ಮುಚ್ಚಿ 10 ನಿಮಿಷ ಬೇಯಿಸಿ.

* ನಂತರ ಅದರಲ್ಲಿ ಸ್ವಲ್ಪ ನೀರಿನಂಶ ಇದ್ದರೆ ಪಾತ್ರೆಯ ಮುಚ್ಚಳ ತೆಗೆದಿಟ್ಟು ಸ್ವಲ್ಪ ಡ್ರೈಯಾಗುವವರೆಗೆ ಬೇಯಿಸಿ, ಉಪ್ಪು ಸರಿಯಾಗಿದೆಯೇ ಎಂದು ನೋಡಿ ಉರಿಯಿಂದ ಇಳಿಸಿದರೆ ಶುಕ್ತೊ ರೆಡಿ.