ಪನ್ನೀರ್ ಟೊಮೆಟೊ ಗ್ರೇವಿ -ಸೈಡ್ ಡಿಶ್ ರೆಸಿಪಿ

ಈ ಟೊಮೆಟೊ ಪನ್ನೀರ್ ತುಂಬಾ ಸ್ವಾದಿಷ್ಟಕರವಾಗಿದ್ದು ಚಪಾತಿ, ಪರೋಟ, ಅನ್ನ ಇವುಗಳಿಗೆ ಸೈಡ್ ಡಿಶ್ ಆಗಿ ಬಳಸಬಹುದು. ಈ ಸೈಡ್ ಡಿಶ್ ಅನ್ನು ಮಾಡಲು ಕೂಡ ಹೆಚ್ಚಿನ ಶ್ರಮವೇನು ಪಡಬೇಕಾಗಿಲ್ಲ, ಟೊಮೆಟೊ ಗೊಜ್ಜಿನಷ್ಟೇ ಸುಲಭವಾಗಿ ಇದನ್ನೂ ಮಾಡಬಹುದು.

ಬನ್ನಿ ಈ ಸೈಡ್ ಡಿಶ್ ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಾಗ್ರಿಗಳು
ಪನ್ನೀರ್ 250 ಗ್ರಾಂ
ಟೊಮೆಟೊ 3-4
ಈರುಳ್ಳಿ 2
ಅರಿಶಿಣ ಅರ್ಧ ಚಮಚ
ಖಾರದ ಪುಡಿ (ನಿಮ್ಮ ರುಚಿಗೆ ತಕ್ಕಷ್ಟು)
ಗರಂ ಮಸಾಲ ಅರ್ಧ ಚಮಚ
ಹಸಿ ಮೆಣಸಿನಕಾಯಿ 3
ಟೊಮೆಟೊ ಸಾಸ್ 1 ಚಮಚ
ಸ್ವಲ್ಪ ಕರಿಬೇವಿನ ಎಲೆ
ಜೀರಿಗೆ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

* ಪ್ಯಾನ್ ನಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ, ನಂತರ ಅದರಲ್ಲಿ ಪನ್ನೀರ್ ತುಂಡುಗಳನ್ನು ಹಾಕಿ 5-10 ನಿಮಿಷ ಫ್ರೈ ಮಾಡಬೇಕು. ನಂತರ ಪನ್ನೀರ್ ಅನ್ನು ತೆಗೆದು ಒಂದು ಬದಿಯಲ್ಲಿಡಿ.

* ಈರುಳ್ಳಿ ಮತ್ತು ಹಸಿ ಮೆಣಸಿನಕಾಯಿಯ ಪೇಸ್ಟ್ ಮಾಡಿ ಇಡಿ.

* ಟೊಮೆಟೊವನ್ನು ಪೇಸ್ಟ್ ಮಾಡಿ ಬದಿಯಲ್ಲಿಡಿ.

* ಈಗ ಅದೇ ಎಣ್ಣೆಗೆ ಜೀರಿಗೆ ಮತ್ತು ಕರಿಬೇವಿನ ಎಲೆ ಹಾಕಿ. ಈಗ ರುಬ್ಬಿದ ಈರುಳ್ಳಿ ಮತ್ತು ಹಸಿ ಮೆಣಸಿನಕಾಯಿಯ ಪೇಸ್ಟ್ ಹಾಕಿ 3-4 ನಿಮಿಷ ಫ್ರೈ ಮಾಡಿ. ಈಗ ಟೊಮೆಟೊ ಹಾಕಿ ಸಾಧಾರಣ ಉರಿಯಲ್ಲಿ ಮತ್ತೆ 5 ನಿಮಿಷ ಫ್ರೈ ಮಾಡಿ.

* ಈಗ ಅರಿಶಿಣ ಪುಡಿ, ರುಚಿಗೆ ತಕ್ಕ ಉಪ್ಪು ಹಾಕಿ ಮತ್ತೆ 5 ನಿಮಿಷ ಫ್ರೈ ಮಾಡಿ, ಖಾರದ ಪುಡಿ, ಗರಂ ಮಸಾಲ ಪುಡಿ, ಟೊಮೆಟೊ ಸಾಸ್ ಸೇರಿಸಿ 2-3 ನಿಮಿಷ ಫ್ರೈ ಮಾಡಿ, ನಂತರ ಫ್ರೈ ಮಾಡಿಟ್ಟ ಪನ್ನೀರ್ ಹಾಕಿ ಸೌಟ್ ನಿಂದ ಆಡಿಸುತ್ತಾ 5 ನಿಮಿಷ ಬೇಯಿಸಿದರೆ ಸವಿರುಚಿಯ ಟೊಮೆಟೊ ಪನ್ನೀರ್ ಗ್ರೇವಿ ರೆಡಿ.