ಪನ್ನೀರ್ ಚೆನ್ನಾ ಮಸಾಲ -ಪಂಜಾಬಿ ಶೈಲಿಯ ರೆಸಿಪಿ

ದೊಡ್ಡ ಕಡಲೆಯಿಂದ ಅನೇಕ ಬಗೆಯ ಪದಾರ್ಥಗಳನ್ನು ತಯಾರಿಸಬಹುದು. ಈ ಕಡಲೆಯಿಂದ ಯಾವುದೇ ಪದಾರ್ಥ ತಯಾರಿಸಿದರೂ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಇವತ್ತು ಸಾವು ದೊಡ್ಡ ಕಡಲೆ ಜೊತೆ ಪನ್ನೀರ್ ಹಾಕಿ ತಯಾರಿಸುವ ಗಟ್ಟಿ ಸಾರಿನ ಬಗ್ಗೆ ತಿಳಿಯೋಣ.

ಈ ರೆಸಿಪಿ ಪಂಜಾಬಿ ಶೈಲಿಯ ಅಡುಗೆಯಾಗಿದೆ. ಪನ್ನೀರ್-ಚೆನ್ನಾ ಮಸಾಲ ರೆಸಿಪಿ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು:

ದೊಡ್ಡ ಕಡಲೆ(ಚೆನ್ನಾ) 3-4 ಕಪ್
ಟೀ ಬ್ಯಾಗ್ 3
ಈರುಳ್ಳಿ 2-3
ಶುಂಠಿ ಪೇಸ್ಟ್ 1 ಚಮಚ
ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಹಸಿ ಮೆಣಸಿನ ಕಾಯಿ 2-3
ಟೊಮೆಟೊ 1
ಖಾರದ ಪುಡಿ ಅರ್ಧ ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ಸಕ್ಕರೆ 1 ಚಮಚ
ಪನ್ನೀರ್ 2 ಕಪ್
ಗರಂ ಮಸಾಲ ಒಂದೂವರೆ ಚಮಚ
ರುಚಿಗೆ ತಕ್ಕ ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

* ದೊಡ್ಡ ಕಡಲೆಯನ್ನು ನೀರಿನಲ್ಲಿ ಒಂದು ರಾತ್ರಿ ನೆನೆ ಹಾಕಿ. ಹೀಗೆ ನೆನೆ ಹಾಕುವಾಗ ಜೊತೆಗೆ ಟೀ ಬ್ಯಾಗ್ ಅನ್ನು ಹಾಕಿಡಿ. ಆಗ ಚೆನ್ನಾ ಸ್ವಲ್ಪ ಕಪ್ಪು ಬಣ್ಣಕ್ಕೆ ತಿರುಗುತ್ತದೆ.

* ಮಾರನೆಯ ದಿನ ಬೆಳಗ್ಗೆ ಅದನ್ನು ಪ್ರೆಶರ್ ಕುಕ್ಕರ್ ನಲ್ಲಿ ಹಾಕಿ ಬೇಯಿಸಿ.

* ಈಗ ಸ್ವಲ್ಪ ಅಗಲವಾದ ಪಾತ್ರೆಯನ್ನು ತೆಗೆದುಕೊಂಡು ಅದರಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಬೇಕು. ನಂತರ ಗ್ಯಾಸ್ ಉರಿಯನ್ನು ಸ್ವಲ್ಪ ಕಡಿಮೆ ಮಾಡಿ ಹಸಿ ಮೆಣಸಿನಕಾಯಿ ಹಾಗೂ ಈರುಳ್ಳಿ ಹಾಕಿ, ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

* ಈಗ ಶುಂಠಿ ಪೇಸ್ಟ್, ಬೆಳ್ಳುಳ್ಳಿ ಪೇಸ್ಟ್, ಟೊಮೆಟೊ, ರುಚಿಗೆ ತಕ್ಕ ಉಪ್ಪು, ಟೊಮೆಟೊ ಹಾಕಿ, ಟೊಮೆಟೊ ಮೆತ್ತಗಾಗುವವರೆಗೆ ಹುರಿಯಬೇಕು.

* ನಂತರ ಖಾರದ ಪುಡಿ, ಅರಿಶಿಣ ಪುಡಿ, ಗರಂ ಮಸಾಲ ಪುಡಿ ಹಾಕಿ ಪನ್ನೀರ್ ಹಾಕಿ ಸ್ವಲ್ಪ ಹೊತ್ತು ಹುರಿಯಬೇಕು. ನಂತರ ಬೇಯಿಸಿದ ಚೆನ್ನಾ (ದೊಡ್ಡ ಕಡಲೆ) ಹಾಕಿ, ಒಂದೂವರೆ ಕಪ್ ನೀರು ಹಾಕಿ ಕುದಿಸಬೇಕು. ನೀರು ಬತ್ತಿ ಸಾರು ಗಟ್ಟಿಯಾದ ನಂತರ ಅರ್ಧ ಚಮಚ ಗರಂ ಮಸಾಲವನ್ನು ಉದುರಿಸಿ, ಸೌಟ್ ನಿಂದ ಈ ಪದಾರ್ಥವನ್ನು ಒಮ್ಮೆ ತಿರುಗಿಸಿದರೆ ಚೆನ್ನಾ-ಪನ್ನೀರ್ ಮಸಾಲ ರೆಡಿ.

ಇದನ್ನು ರೊಟ್ಟಿ, ಚಪಾತಿ, ದೋಸೆ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.