ಮಸಾಲೆ ಮಿರ್ಚಿ: ಸೈಡ್ ಡಿಶ್ ರೆಸಿಪಿ

ಬಜ್ಜಿ ಮೆಣಸಿನಿಂದ ಬಜ್ಜಿ ಮಾಡಿದರೆ ಮಾತ್ರವಲ್ಲ, ಸೈಡ್ ಡಿಶ್ ಮಾಡಿದರೂ ತುಂಬಾ ರುಚಿಕರವಾಗಿರುತ್ತದೆ. ಬಿಸಿ ಬಿಸಿ ಅನ್ನದ ಜೊತೆ ಕಲೆಸಿಕೊಂಡು ತಿನ್ನುತ್ತಿದ್ದರೆ ಎರಡು ತುತ್ತು ಅನ್ನ ಹೆಚ್ಚೇ ಹೊಟ್ಟೆಯನ್ನು ಸೇರುತ್ತದೆ. ಇದನ್ನು ಮಾಡುವ ವಿಧಾನ ತುಂಬಾ ಸರಳವಾಗಿದೆ.

ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಾಗ್ರಿಗಳು
ಬಜ್ಜಿ ಮೆಣಸು 5-6
ಅರಿಶಿಣ ಪುಡಿ 1 ಚಮಚ
ಖಾರದ ಪುಡಿ 1 ಚಮಚ
ಕೊತ್ತಂಬರಿ ಪುಡಿ ಒಂದೂವರೆ ಚಮಚ
ಹಸಿ ಮೆಣಸಿನಕಾಯಿ 2
ಒಣ ಮಾವಿನಕಾಯಿ 1 ಚಮಚ
ಸಾಸಿವೆ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ನಿಂಬೆ ರಸ 1 ಚಮಚ
ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

* ಬಜ್ಜಿ ಮೆಣಸನ್ನು ಉದ್ದುದ್ದವಾಗಿ ಕತ್ತರಿಸಿ.

* ಪ್ಯಾನ್ ನಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ ಅದರಲ್ಲಿ ಸಾಸಿವೆ ಹಾಕಿ, ಸಾಸಿವೆ ಚಟಪಟಾ ಶಬ್ದ ಮಾಡುವಾಗ ಹಸಿ ಮೆಣಸಿನಕಾಯಿ ಮತ್ತು ಬಜ್ಜಿ ಮೆಣಸಿನಕಾಯಿ ಹಾಕಿ, ರುಚಿಗೆ ತಕ್ಕ ಉಪ್ಪು ಮತ್ತು ಅರಿಶಿಣ ಪುಡಿ ಹಾಕಿ ಮೆಣಸಿನಕಾಯಿ ಬೆಂದು ಮೆತ್ತಗಾಗುವವರೆಗೆ ಫ್ರೈ ಮಾಡಿ.

* ನಂತರ ಖಾರದ ಪುಡಿ, ಕೊತ್ತಂಬರಿ ಪುಡಿ, ಒಣ ಮಾವಿನಕಾಯಿ ಚೂರು ಹಾಕಿ ಮಿಕ್ಸ್ ಮಾಡಿ, 3-4 ನಿಮಿಷ ಫ್ರೈ ಮಾಡಿ.

* ನಂತರ ನಿಂಬೆರಸ ಹಾಕಿ ಮಿಕ್ಸ್ ಮಾಡಿ ಉರಿಯಿಂದ ಇಳಿಸಿದದರೆ ಬಿಸಿ-ಬಿಸಿ ಅನ್ನದ ಜೊತೆ ಕಲೆಸಿಕೊಂಡು ತಿನ್ನಲು ಮಸಾಲೆ ಮಿರ್ಚಿ ರೆಡಿ.