ಸುಲಭದಲ್ಲಿ ಮಾಡಬಹುದು ಬದನೆಕಾಯಿ ಪೋಡಿ

ಬದನೆಕಾಯಿಯಿಂದ ಅನೇಕ ಬಗೆಯ ರುಚಿಕರವಾದ ಖಾದ್ಯಗಳನ್ನು ತಯಾರಿಸಬಹುದು. ಹಲಸಿನಕಾಯಿ ಪೋಡಿ ತಯಾರಿಸುವಂತೆ ಬದನೆಕಾಯಿಂದ ಕೂಡ ಪೋಡಿಯನ್ನು ತಯಾರಿಸಬಹುದಾಗಿದ್ದು ಇದನ್ನು ಅನ್ನದ ಜೊತೆ ಅಥವಾ ಚಪಾತಿ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಪೋಡಿ ಅಡುಗೆ ದಕ್ಷಿಣ ಕನ್ನಡದಲ್ಲಿ ಹೆಚ್ಚಾಗಿ ತಯಾರಿಸುತ್ತಾರೆ. ಪೋಡಿಯನ್ನು ಬಾಳೆಕಾಯಿಯಿಂದ, ಹಲಸಿನಕಾಯಿಂದ ತಯಾರಿಸಬಹುದಾಗಿದ್ದು ಈ ಖಾದ್ಯ ಊಟಕ್ಕಿದ್ದರೆ ಊಟದ ರುಚಿ ಮತ್ತಷ್ಟು ಹೆಚ್ಚುವುದು.

ಬೇಕಾಗುವ ಸಾಮಾಗ್ರಿಗಳು:

* ಬದನೆಕಾಯಿ 10-15
* 1 ಚಮಚ ಮಸಾಲೆ ಪುಡಿ
* ರುಚಿಗೆ ತಕ್ಕ ಉಪ್ಪು
* 1 ಚಮಚ ಎಣ್ಣೆ
* 1 ಚಮಚ ಸಾಸಿವೆ
* ಚಿಟಿಕೆಯಷ್ಟು ಇಂಗು
* 2-3 ಹಸಿ ಮೆಣಸಿನ ಕಾಯಿ
* 4-5 ಕರಿ ಬೇವಿನ ಎಲೆ
* ಸ್ವಲ್ಪ ಕೊತ್ತಂಬರಿ ಸೊಪ್ಪು

ತಯಾರಿಸುವ ವಿಧಾನ:

1. ಬಾಣಲೆಯನ್ನು ಬಿಸಿ ಮಾಡಿ ಸ್ವಲ್ಪ ಎಣ್ಣೆ ಹಾಕಬೇಕು. ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟಾ ಶಬ್ದ ಮಾಡುವಾಗ ಜೀರಿಗೆ, ಇಂಗು ಮತ್ತು ಕರಿ ಬೇವಿನ ಎಲೆ ಮತ್ತು ಹಸಿಮೆಣಸಿನ ಕಾಯಿಯನ್ನು ಹಾಕಿ ಹುರಿಯಬೇಕು.

2. ಈಗ ಕತ್ತರಿಸಿದ ಬದನೆಕಾಯಿಯನ್ನು ಸೇರಿಸಿ, ರುಚಿಗೆ ತಕ್ಕ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು. ಸೌಟ್‌ನಿಂದ ಆಗಾಗ ಮಿಶ್ರ ಮಾಡುತ್ತಿರಬೇಕು. ಬದನೆಕಾಯಿಯನ್ನು ಬಾಣಲೆಯಲ್ಲಿ ತಳ ಹಿಡಿಯದಂತೆ ಸ್ವಲ್ಪ ಎಣ್ಣೆ ಹಾಕಿ ಚೆನ್ನಾಗಿ ತಿರುಗಿಸಬೇಕು.

3. ಈಗ ಮಸಾಲೆ ಪುಡಿಯನ್ನುಸೇರಿಸಿ 7-10 ನಿಮಿಷದವರೆಗೆ ಬೇಯಿಸಬೇಕು. ಆದರೆ ಮಿಶ್ರಣವನ್ನು ಸೌಟ್‌ನಿಂದ ಆಗಾಗ ತಿರುಗಿಸುತ್ತಾ ಇರಬೇಕು. ಬೆಂದ ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿಯಾದ ಬದನೆಕಾಯಿ ಪೋಡಿ ರೆಡಿ.