ಕಹಿ ರಹಿತ ಹಾಗಲಕಾಯಿ ಸ್ಟಫ್ಡ್ ರೆಸಿಪಿ

ಹಾಗಲಕಾಯಿಯಲ್ಲಿ ಅನೇಕ ಔಷಧೀಯ ಗುಣಗಳಿವೆ, ಆದರೆ ಇದು ಕಹಿಯಾಗಿರುವುದರಿಂದ ಹೆಚ್ಚಿನವರು ಇದನ್ನು ತಿನ್ನಲು ಇಷ್ಟಪಡುವುದಿಲ್ಲ. ವಾರದಲ್ಲಿ ಒಮ್ಮೆಯಾದರೂ ಹಾಗಲಕಾಯಿಯ ಪದಾರ್ಥ ಹೊಟ್ಟೆ ಸೇರಿದರೆ ಹೊಟ್ಟೆ ಶುದ್ಧವಾಗುವುದು.

ಇಲ್ಲಿ ನಾವು ಹಾಗಲಕಾಯಿಯ ಕಹಿ ತೆಗೆದು ಅದರಲ್ಲಿ ಮಸಾಲೆ ತುಂಬಿ ತಯಾರಿಸುವ ಹಾಗಲಕಾಯಿ ಸ್ಟಫ್ಡ್ (ಮಸಾಲೆ ತುಂಬಿದ ಹಾಗಲಕಾಯಿ) ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು :
ಹಾಗಲಕಾಯಿ 3 (ಚಿಕ್ಕದಾಗಿದ್ದರೆ 6)
ಅರಿಶಿಣ ಪುಡಿ 1 ಚಮಚ
ನಿಂಬೆ ರಸ 2 ಚಮಚ
ಜೀರಿಗೆ 1 ಚಮಚ
ಚಿಟಿಕೆಯಷ್ಟು ಇಂಗು
ದೊಡ್ಡ ಜೀರಿಗೆ 1 ಚಮಚ
ಖಾರದ ಪುಡಿ 1 ಚಮಚ
ಅಮ್ ಚೂರ್ 1 ಚಮಚ (ಒಣ ಮಾವಿನಕಾಯಿ ಪುಡಿ)
ಕಡಲೆಹಿಟ್ಟು 2 ಚಮಚ
ಎಣ್ಣೆ
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:
1. 3 ಕಪ್ ನೀರಿಗೆ ಅರಿಶಿಣ ಪುಡಿ, ರುಚಿಗೆ ತಕ್ಕ ಉಪ್ಪು ಮತ್ತು ನಿಂಬೆ ರಸ ಹಾಕಿ ಕುದಿಸಬೇಕು.

2. ಹಾಗಲಕಾಯಿಯನ್ನು ಉದ್ದಕ್ಕೆ ಕತ್ತರಿಸಿ, ಅದರ ಒಳಗೆ ಇರುವ ಬೀಜವನ್ನು ತೆಗೆದು ಬಿಸಾಡಬೇಡಿ. ಇದನ್ನು ಕೂಡ ಕುದಿಯುವ ನೀರಿನಲ್ಲಿ 20 ನಿಮಿಷ ಕಾಲ ಹಾಕಿಡಿ. ಈ ರೀತಿ ಮಾಡಿದರೆ ಹಾಗಲಕಾಯಿ ಕಹಿ ಬಿಡುತ್ತದೆ.

3. ಈಗ ಪಾತ್ರೆಯನ್ನು ಬಿಸಿ ಮಾಡಿ 1 ಚಮಚ ಎಣ್ಣೆ ಹಾಕಬೇಕು. ಎಣ್ಣೆ ಬಿಸಿಯಾದಾಗ ಇಂಗು ಮತ್ತು ದೊಡ್ಡ ಜೀರಿಗೆ ಹಾಕಬೇಕು.

4. ಈಗ ಹಾಗಲಕಾಯಿಯ ಒಳಭಾಗವನ್ನು ನೀರಿನಿಂದ ತಗೆದು ಹಿಂಡಿ ನಂತರ ಎಣ್ಣೆಯಲ್ಲಿ ಹಾಕಿ 3-4 ನಿಮಿಷ ಕಡಿಮೆ ಉರಿಯಲ್ಲಿ ಹುರಿಯಬೇಕು.

5. ನಂತರ ಕಡಲೆ ಹಿಟ್ಟು ಹಾಕಿ, ಖಾರದ ಪುಡಿ, ಅಮ್ ಚೂರ್ , ಚಿಟಿಕೆಯಷ್ಟು ಉಪ್ಪು ಸೇರಿಸಿ. 5-6 ನಿಮಿಷ ಹುರಿಯಿರಿ. ನಂತರ ಉರಿಯಿಂದ ತೆಗೆದು ಆರಲು ಇಡಿ.

6. ನಂತರ ನೀರಿನಲ್ಲಿ ಹಾಕಿರುವ ಹಾಗಲಕಾಯಿಯ ತುಂಡಿನಿಂದ ನೀರನ್ನು ಹಿಂಡಿ ಅದರಲ್ಲಿ ಈ ಮಸಾಲೆಯನ್ನು ತುಂಬಿ.

7. ನಂತರ ಪಾತ್ರೆಯಲ್ಲಿ 2-3 ಚಮಚ ಎಣ್ಣೆ ಹಾಕಿ ಅದರಲ್ಲಿ ಹಾಗಲಕಾಯಿ ಹಾಕಿ ಪಾತ್ರೆಯ ಬಾಯಿಯನ್ನು ಮುಚ್ಚಿ ಬೇಯಿಸಿ.

ಸೂಚನೆ: ಆಗಾಗ ಸೌಟ್ ನಿಂದ ಆಡಿಸುತ್ತಾ ಇರಬೇಕು.

ಹೀಗೆ ತಯಾರಿಸಿದ ಹಾಗಲಕಾಯಿಯನ್ನು ಬಿಸಿ-ಬಿಸಿ ಅನ್ನದ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.