ಚೆನ್ನಾ ಮಸಾಲಾದ ರುಚಿ ಸವಿಯೋಣ ಬಾರಾ

ಚೆನ್ನಾ ಮಸಾಲಾ ಪುಡಿಯನ್ನು ಮನೆಯಲ್ಲೇ ತಯಾರಿಸುವುದರಿಂದ ರುಚಿ, ಶುಚಿ ಹಾಗೂ ಸ್ವಾದಿಷ್ಟವಾಗಿರುತ್ತದೆ.

• ಸುನೀತಾ ಅನಂತರಾಮು

ಚೆನ್ನಾ ಮಸಾಲಾ ಪುಡಿ ತಯಾರಿಸಲು ಬೇಕಾಗುವ ಪದಾರ್ಥಗಳು :

• ಒಣ ಮೆಣಸಿನ ಕಾಯಿ : 30 ಗ್ರಾಂ
• ಕೊತ್ತಂಬರಿ ಬೀಜ : 20 ಗ್ರಾಂ
• ಒಣ ಮಾವಿನ ಚಟ್ಟು : 4ರಿಂದ 5 ಚೂರು
• ಮೆಣಸು : ಅರ್ಧ ಟೀ ಚಮಚ
• ಜೀರಿಗೆ : 2 ಟೀ ಚಮಚ
• ಮೆಂತ್ಯ : ಅರ್ಧ ಟೀ ಚಮಚ
• ಒಣ ಶುಂಠಿ : ಸಣ್ಣ ತುಂಡು
• ಜಾಯಿ ಕಾಯಿ : 1
• ಜಾಪತ್ರೆ : 2
• ಚಕ್ಕೆ : ಬೆರಳುದ್ದ
• ಲವಂಗ : 3-4
• ಸಾಸಿವೆ : ಅರ್ಧ ಟೀ ಚಮಚ
• ಎಣ್ಣೆ : 1 ಒಗ್ಗರಣೆಯಷ್ಟು
• ತುಪ್ಪ : 1 ಟೀ ಚಮಚ

ಮಾಡುವ ವಿಧಾನ :

ಕಾದ ಬಾಣಲೆಗೆ ಮೆಣಸಿನ ಕಾಯಿ, ಕೊತ್ತಂಬರಿ ಬೀಜ ಹಾಕಿ ಹದವಾಗಿ ಹುರಿಯಿರಿ. ಈಗ ಒಣ ಮಾವಿನ ಚಟ್ಟು, ಮೆಣಸು, ಜೀರಿಗೆ, ಮೆಂತ್ಯ, ಒನಶುಂಠಿ, ಜಾಯಿಕಾಯಿ, ಜಾಪತ್ರೆ, ಚಕ್ಕೆ, ಲವಂಗ, ಸಾಸಿವೆ ಹಾಕಿ ಸ್ವಲ್ಪ ಹೊತ್ತು ಹುರಿಯಿರಿ. ಈಗ ತಣ್ಣಗಾಗಲು ಸ್ವಲ್ಪ ಸಮಯ ಬಿಟ್ಟು ನಂತರ ಮಿಕ್ಸಿಯಲ್ಲಿ ಹಾಕಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ಅಷ್ಟೆ ನಿಮ್ಮ ನೆಚ್ಚಿನ ಚೆನ್ನಾ ಮಸಾಲಾ ಪುಡಿ ರೆಡಿ.

***

ಚೆನ್ನಾ ಮಸಾಲ

ಸಂಜೆ ಟೀವಿ ನೋಡುತ್ತಾ ಬಾಯಿ ಚಪ್ಪರಿಸಲು ಚೆನ್ನಾ ಮಸಾಲ ಒಳ್ಳೆಯ ಸಾಥ್ ನೀಡುತ್ತದೆ. ಚಪಾತಿ ಮತ್ತು ಪರೋಟಕ್ಕೂ ಚೆನ್ನಾ ಮಸಾಲ ಚೆನ್ನಾಗಿರುತ್ತದೆ.

ಬೇಕಾದ ಪದಾರ್ಥಗಳು :

• ಕಾಬೂಲ್ ಕಡಲೆ : 1 ಬಟ್ಟಲು
• ಈರುಳ್ಳಿ : 2
• ಆಲೂಗಡ್ಡೆ : 2
• ಟೊಮೆಟೊ : 2
• ತುಪ್ಪ : 2 ಚಮಚ
• ಉಪ್ಪು : ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ : ಕಾಬೂಲ್ ಕಡಲೆಯನ್ನು 7-8 ಗಂಟೆಗಳ ಕಾಲ ನೆನೆಹಾಕಿ. ಇದಕ್ಕೆ ಎರಡು ಚಿಟಿಕೆ ಅಡುಗೆ ಸೋಡ ಹಾಕಿ ಬೇಯಿಸಿ. ಸಿಪ್ಪೆ ತೆಗೆದ ಆಲೂಗೆಡ್ಡೆ ಬೇಯಿಸಿ.

ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಕಾದ ಬಾಣಲೆಗೆ ತುಪ್ಪ ಹಾಕಿ ಸಾಸಿವೆ ಸಿಡಿಸಿ. ಈಗ ಹೆಚ್ಚಿಟ್ಟಿರುವ ಈರುಳ್ಳಿ ಹಾಕಿ ಸ್ವಲ್ಪ ಹೊತ್ತು ಹುರಿದ ನಂತರ ಆಲೂಗೆಡ್ಡೆ, ಟೊಮೆಟೊ, ಬೇಯಿಸಿದ ಕಡಲೆ ಹಾಕಿ ಸ್ವಲ್ಪ ಹೊತ್ತು ಹುರಿಯಿರಿ. ಈಗ ಚೆನ್ನಾ ಮಸಾಲಾ ಪುಡಿ, ಉಪ್ಪು ಹಾಕಿ 5 ನಿಮಿಷಗಳವರೆಗೆ ತಳಹತ್ತದಂತೆ ತಿರುವುತ್ತಿರಿ.

ಸಣ್ಣಗೆ ಹೆಚ್ಚಿಕೊಂಡ ಕೊತ್ತಂಬರಿ ಸೊಪ್ಪು, ಒಣ ಮೆಣಸಿನಕಾಯಿ, ನಿಂಬೆ ಹಣ್ಣು, ವೃತ್ತಾಕಾರದಲ್ಲಿ ಕತ್ತರಿಸಿದ ಟೊಮೆಟೊ ಬಿಲ್ಲೆಯನ್ನಿಟ್ಟು ಅಲಂಕರಿಸಿ.