ಸಿಹಿ ಅಡಿಕೆಪುಡಿ ಮಾಡುವ ಮೂರು ಬಗೆ

Palya

oi-Staff

By * ಕೆ.ಆರ್. ಶರ್ಮಾ, ತಲವಾಟ, ಸಾಗರ

Updated: Thursday, March 28, 2013, 14:07 [IST]

'ಅಡಿಕೆಗೆ ಹೋದ ಮಾನ ಆನೆಕೊಟ್ಟರೂ ಬರದು' ಎಂಬ ಗಾದೆಯನ್ನು ಮತ್ತೆ ನೆನಪಿಸುತ್ತಾ ಸಿಹಿ ಅಡಿಕೆಯ ಬಗೆಗೆ ನನಗೆ ತಿಳಿದಿರುವ ಕೆಲವು ಅಂಶಗಳನ್ನು ತಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ಅಡಿಕೆ ಭಾರತೀಯ ಸಂಸ್ಕೃತಿಯಲ್ಲಿ ಹಾಸುಹೊಕ್ಕಾಗಿ ಬೆರೆತ ಆಹಾರ ಪದಾರ್ಥ. ಊಟದ ನಂತರ ಎಲೆಅಡಿಕೆ ಹಾಕುವುದರಿಂದ ಜೀರ್ಣ ಕ್ರಿಯೆ ಸುಲಭವಾಗುತ್ತದೆ. ಹಾಗೂ ಬಾಯಿ ಸ್ವಚ್ಚವೂ ಆಗುತ್ತದೆ. ಈ ಅಡಿಕೆ ಸವಿಯುವುದರಲ್ಲಿ 'ಸಿಹಿ ಅಡಿಕೆಯ' ಪಾತ್ರ ಮಹತ್ವದ್ದು. ತಂಬಾಕು ರಹಿತ ಅಡಿಕೆ ಸೇವನೆಗೆ ಹೆಚ್ಚಿನ ಮಹತ್ವವಿದೆ. ಸಿಹಿ ಅಡಿಕೆ ಮಾಡುವ ವಿಧಾನ ಹಲವು ಇವೆ. ಒಂದೆರಡು ಸುಲಭ ವಿಧಾನ ಇಲ್ಲಿ ಹೇಳುತ್ತೇನೆ.

ವಿಧಾನ 1: ಅಡಿಕೆ ಹಸುರಿದ್ದಾಗಲೆ ಮರದಿಂದ ಗೊನೆಯನ್ನು ಬೇರ್ಪಡಿಸಿಕೊಳ್ಳಬೇಕು. ನಂತರ ಸಿಪ್ಪೆಯನ್ನು ಬೇರ್ಪಡಿಸಿ ಇಡಿ ಅಡಿಕೆಯನ್ನು ಪಾತ್ರೆಯೊಂದರಲ್ಲಿ ಹಾಕಿ ನೀರಿನಲ್ಲಿ ಮುಳುಗಿಸಿ ಎರಡು ಅಥವಾ ಮೂರುದಿನಗಳ ಕಾಲ ಇಡಬೇಕು. ದಿನಕ್ಕೊಮ್ಮೆ ನೀರನ್ನು ಬದಲಾಯಿಸಬೇಕು. ಇದರಿಂದಾಗಿ ಅಡಿಕೆಯಲ್ಲಿನ ಚೊಗರು ಅಂಶ ಮಾಯವಾಗುತ್ತದೆ.

ಆನಂತರ ಬಿಸಿಲಿನಲ್ಲಿ 7 ದಿವಸಗಳ ಕಾಲ ಒಣಗಿಸಬೇಕು. ಒಣಗಿದ ಇಡಿ ಅಡಿಕೆ ಚೊಗರುರಹಿತವಾಗಿ ತಿನ್ನಲು ಸಿದ್ದ. ಆವಾಗ ಅದನ್ನು ಒರಳಿನಲ್ಲಿ ಅಥವಾ ಮಿಕ್ಸರಿನಲ್ಲಿ ಹಾಕಿ ಪುಡಿಮಾಡಿ ನಂತರ ಅದಕ್ಕೆ ಕೊಬ್ಬರಿ ತುರಿ, ಚೀನಿ ಬೀಜ, ಕಲ್ಲುಸಕ್ಕರೆ, ಬಡೆಸೋಪು ಮುಂತಾದವುಗಳನ್ನು ಬೆರಸಿದರೆ ಸ್ವಾದಿಷ್ಟ ಸಿಹಿ ಅಡಿಕೆ ಪುಡಿ ಮೆಲ್ಲಲು ಸಿದ್ದ. ಹೀಗೆ ತಯಾರು ಮಾಡಿದ ಅಡಿಕೆಯ ಬಣ್ಣವೂ ಕಂದುಬಣ್ಣದ್ದಾಗಿರುತ್ತದೆ.

ವಿಧಾನ 2 : ಅಡಿಕೆಯನ್ನು ಸಿಪ್ಪೆಯಿಂದ ಬೇರ್ಪಡಿಸಿಕೊಂಡನಂತರ ನೀರಿನಲ್ಲಿ ಹಾಕಿ ಬೇಯಿಸಬೇಕು. ಸಿಪ್ಪೆಯಿಲ್ಲದ ಅಡಿಕೆಯ ಬಿಳಿದಾದ ಕಣ್ಣು ಉಗುಳಿದ ನಂತರ ಅಡಿಕೆ ಬೆಂದಂತೆ. ಹೀಗೆ ಬೆಂದ ಅಡಿಕೆಯನ್ನು 7 ದಿವಸಗಳವರೆಗೆ ಬಿಸಿಲಿನಲ್ಲಿ ಒಣಗಿಸಬೇಕು. ನಂತರ ಕುಟ್ಟಿ ಅಥವಾ ಮಿಕ್ಸರಿನಲ್ಲಿ ಪುಡಿಮಾಡಿ ಸಕಲಸಾಂಬಾರ್ ಬೆರೆಸಿದರೆ ಸಿಹಿ ಅಡಿಕೆ ರೆಡಿ. ಇದೂ ಕೂಡ ಮಾರುಕಟ್ಟೆಯಲ್ಲಿ ದೊರಕುವಂತೆ ಡಾಳಾದ ಕೆಂಪುಬಣ್ಣ ಬರುವುದಿಲ್ಲ. ಡಾಳಾದ ಕೆಂಪುಬಣ್ಣ ಬರಲು ಅಡಿಕೆಬೇಯಿಸುವಾಗ ಸಿದ್ಧ ಚೊಗರನ್ನು ಹಾಕಬೇಕಾಗುತ್ತದೆ.

ವಿಧಾನ 3 : ಮಾರುಕಟ್ಟೆಯಲ್ಲಿ ಸಿಗುವ ಇಡೀ ಕೆಂಪು ಅಡಿಕೆಯನ್ನು ಕೊಂಡು ತಂದು ಅದನ್ನು ಮಿಕ್ಸರ್ರಿಗೆ ಹಾಕಿ ಪುಡಿ ಮಾಡಿ ಸಕಲಸಾಂಬಾರ್(ಕಲ್ಲುಸಕ್ಕರೆ, ಕೊಬ್ಬರಿ,ಮುಂತಾದವುಗಳು) ಬೆರೆಸಿದರೆ ಸಿಹಿ ಅಡಿಕೆ ಪುಡಿ ಸಿದ್ಧ. ಆದರೆ ಇದು ಸ್ವಲ್ಪ ಚೊಗರು ಇರುತ್ತದೆ.

ಇನ್ನು ಸಿಹಿ ಅಡಿಕೆಪುಡಿ ಮಾರುಕಟ್ಟೆ ಮಾಡಬಯಸುವವರು ಕೊಬ್ಬರಿ ತುರಿಯನ್ನು ಮಿಕ್ಸ್ ಮಾಡಬಾರದು. ಆವಾಗ ಅದು ಹೆಚ್ಚಿನ ಕಾಲ ಇಡಲು ಆಗುವುದಿಲ್ಲ. ಮಾರುಕಟ್ಟೆಯಲ್ಲಿ ಈಗ ದೊರಕುವ ಎಲ್ಲಾ ಸಿಹಿ ಅಡಿಕೆ ಪುಡಿ ಕಂದುಬಣ್ಣದ್ದಾಗಿದ್ದು ಚೊಗರು ಸಹಿತವಾಗಿರುತ್ತದೆ. ಚೊಗರು ರಹಿತ ಸಿಹಿ ಅಡಿಕೆ ಅಗಿಯಲು ಚೆನ್ನಾಗಿರುತ್ತದೆ.

(ಮೇಲಿನ ಪದ್ದತಿಗಳು ನಮ್ಮ ಬೆಳೆಗಾರರು ಅನುಸರಿಸುವ ಪದ್ದತಿ. ಸಿಹಿ ಅಡಿಕೆ ಕಂಪನಿಗಳು ಯಾವ ವಿಧಾನ ಅನುಸರಿಸುತ್ತವೋ ತಿಳಿದಿಲ್ಲ)