ಬದನೆ ಜೊತೆ ಖಾರಾ ಖಾರಾ ಮಿರ್ಚಿ ಪಚಡಿ

Palya

oi-Sumalatha

By Sumalatha

Published: Saturday, December 17, 2011, 12:15 [IST]

ಸುಟ್ಟ ಬದನೆಕಾಯಿಯಿಂದ ಮಾಡುವ ಪಚಡಿ ತಿನ್ನಲು ಸಖತ್ ರುಚಿ. ಸ್ವಲ್ಪ ಹಸಿರು ಮೆಣಸಿನ ಖಾರ ಮತ್ತು ಬೆಳ್ಳುಳ್ಳಿಯ ಒಗರುತನ ಇದ್ದರಂತೂ ಪಚಡಿ ಇನ್ನೂ ಚೆಂದ. ಚಪಾತಿ, ರೊಟ್ಟಿ ಅಥವಾ ಪೂರಿಯೊಂದಿಗೆ ನೆಂಜಿಕೊಂಡರೆ ಸುಟ್ಟ ಬದನೆ ಮೆಣಸಿನ ಪಚಡಿ ಒಳ್ಳೆ ಕಾಂಬಿನೇಶನ್. ಇದನ್ನು ಮಾಡಲೂ ಹೆಚ್ಚು ಕಷ್ಟವಿಲ್ಲ. ಚಕ್ ಅಂತ ಮಾಡಿ ಮುಗಿಸಬಹುದು. ಸುಟ್ಟ ಬದನೆ ಮೆಣಸಿನ ಪಚಡಿ ಮಾಡುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಪಚಡಿಗೆ ಬೇಕಾಗುವ ಪದಾರ್ಥಗಳು:
* ಬದನೆಕಾಯಿ
* ಹಸಿರು ಮೆಣಸಿನಕಾಯಿ 4
* ಬೆಳ್ಳುಳ್ಳಿ 6 ಎಸಳು
* ಗರಂ ಮಸಾಲ
* ಉಪ್ಪು, ಎಣ್ಣೆ, ನಿಂಬೆರಸ

ಪಚಡಿ ತಯಾರಿಸುವ ವಿಧಾನ:
* ಸ್ವಲ್ಪ ಹಣ್ಣಾಗಿರುವ ಬದನೆಕಾಯಿಯನ್ನು ಆರಿಸಿಕೊಳ್ಳಬೇಕು.
* ಬದನೆಕಾಯನ್ನು ಮಧ್ಯೆ ಸೀಳಿ ಅದರಲ್ಲಿ ಮೆಣಸಿನಕಾಯಿ, ಬೆಳ್ಳುಳ್ಳಿ ಎಸಳನ್ನು ಸೇರಿಸಬೇಕು. (ತೊಟ್ಟನ್ನು ಮುರಿಯಬಾರದು)
* ಈಗ ಕೆಂಡದ ಸೌಲಭ್ಯವಿಲ್ಲದಿರುವುದರಿಂದ ಸ್ಟೌವ್ ಮೇಲೆ ಕಡಿಮೆ ಉರಿಯಲ್ಲಿ ಬದನೆ ಮೆತ್ತಗಾಗುವವರೆಗೂ ಸುಡಬೇಕು.
* ನಂತರ ಬದನೆಕಾಯಿಯ ಸಿಪ್ಪೆಯನ್ನು ಬಿಡಿಸಿ ತೊಟ್ಟನ್ನು ತೆಗೆಯಬೇಕು.
* ಈಗ ಸುಟ್ಟ ಬದನೆ ಕಾಯಿ, ಮೆಣಸಿನ ಕಾಯಿ ಮತ್ತು ಬೆಳ್ಳುಳ್ಳಿಯನ್ನು ಚೆನ್ನಾಗಿ ಹಿಸುಕಿಡಬೇಕು.
* ಬಾಣಲೆಯಲ್ಲಿ ಒಂದು ಚಮಚ ಎಣ್ಣೆ ಕಾಯಿಸಿ ಅದರಲ್ಲಿ ಈ ಮಿಶ್ರಣ ಹಾಕಿ ಚೆನ್ನಾಗಿ ಕಲೆಸಬೇಕು.
* ಸ್ವಲ್ಪ ಗರಂ ಮಸಾಲೆ ಅಥವಾ ಕೆಂಪು ಮೆಣಸಿನ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಬೇಯಿಸಿದರೆ ಸುಟ್ಟ ಬದನೆ ಮೆಣಸಿನ ಪಚಡಿ ತಿನ್ನಲು ಸಿದ್ಧ. ಕೊನೆಯಲ್ಲಿ ಇದರ ಮೇಲೆ ನಿಂಬೆರಸವನ್ನು ಹಿಂಡಿದರೆ ರುಚಿ ಹೆಚ್ಚು.