ಸೊಗಸಾದ ಬಾಳೆದಿಂಡಿನ ಪಲ್ಯ

Palya

oi-Staff

By Super

Updated: Thursday, March 14, 2013, 18:23 [IST]

ಈಗ ದಸರಾ ಹಬ್ಬಗಳ ಸಾಲು. ದಕ್ಷಿಣ ಭಾರತದ ಮಾರುಕಟ್ಟೆಗಳಲ್ಲಿ ಮಾವಿನ ಸೊಪ್ಪು, ಬಾಳೆ ಕಂಬ, ಬಾಳೆದಿಂಡು, ಬಾಳೆ ಹಣ್ಣು ಹೇರಳವಾಗಿ ದೊರಕುವ ಕಾಲ. ಹೇಗಿದ್ದರೂ ಮಂಟಪ ತೋರಣ ಕಟ್ಟುವುದಕ್ಕೆ ಅಥವಾ ವಾಹನ ಸಿಂಗಾರಕ್ಕೆ ಬಾಳೆ ಕಂಬಗಳನ್ನು ತಂದೇ ಇರುತ್ತೀರಿ. ಎರಡು ಕಂಬಗಳನ್ನು ಮಂಟಪಕ್ಕೆ ಕಟ್ಟಿ ಇನ್ನೊಂದನ್ನು ಅಡುಗೆಗೋಸ್ಕರ ಇಟ್ಟುಕೊಳ್ಳಿರಿ. ಬಾಳೆ ದಿಂಡು ತುಂಬಾ ಎಳೆಯದಾಗಿರಕೂಡದು, ತುಂಬಾ ಬಲಿತದ್ದೂ ಆಗಿರಕೂಡದು. ಆಯುಧ ಪೂಜೆ ಅಥವಾ ವಿಜಯದಶಮಿ ಹಬ್ಬದ ದಿನ ನಿಮ್ಮ ಅಡುಗೆ ಮನೆಯಲ್ಲಿ ಈ ಪಲ್ಯ ತಯಾರಾಗಲಿ.

ಪದಾರ್ಥಗಳು :ಸುಮಾರು ಒಂದು ಅಡಿ ಉದ್ದದಷ್ಟು ಎಳೆ ಬಾಳೆದಿಂಡು. ಅರ್ಧ ಲೋಟ ಹೆಸರು ಬೇಳೆ. 4 ಹಸಿಮೆಣಸಿನಕಾಯಿ. ಸ್ವಲ್ಪ ಸಕ್ಕರೆ. ತೆಳ್ಳಗಿನ ಮಜ್ಜಿಗೆ. ಉಪ್ಪು ; ಒಗ್ಗರಣೆಗೆ: ಸಾಸಿವೆ, ಜೀರಿಗೆ, ಚಮಚದಷ್ಟು ಉದ್ದಿನಬೇಳೆ, ಕಡಲೆಬೇಳೆ, ಒಣಮೆಣಸಿನಕಾಯಿ ಚೂರುಗಳು, ಚೂರು ಇಂಗು, ಕರಿಬೇವಿನ ಸೊಪ್ಪು.

ವಿಧಾನ:ಬಾಳೆದಿಂಡನ್ನು ಸಣ್ಣಗೆ ಹೆಚ್ಚಿ ಕೊಚ್ಚಿ ಮಜ್ಜಿಗೆಯಲ್ಲಿ ನೆನೆ ಇಡಬೇಕು. ಹೆಸರು ಬೇಳೆಯನ್ನು ಪ್ರತ್ಯೇಕವಾಗಿ ಸುಮಾರು ಒಂದು ಗಂಟೆ ಕಾಲ ನೆನೆಸಬೇಕು. ಬೇಳೆ ನೆನೆದ ನಂತರ ನೀರು ಬಸಿದು ಇಟ್ಟುಕೊಳ್ಳಬೇಕು. ನಾನ್ ಸ್ಟಿಕಿ ತವ ಅಥವಾ ಬಾಣಲೆಗೆ ಅಂದಾಜುನೋಡಿಕೊಂಡು ಎಣ್ಣೆ ಹಾಕಿ ಒಗ್ಗರಣೆಗೆ ರೆಡಿ ಮಾಡಿಕೋಬೇಕು. ಸಾಸಿವೆ, ಕರಿಬೇವು , ಉದ್ದು, ಹಸಿಮೆಣಸು, ಕಡಲೆ ಬೇಳೆಗಳನ್ನು ಹಾಕಿ ಬಾಡಿಸಿರಿ. ಆನಂತರ ಹೆಸರುಬೇಳೆ ಹಾಗೂ ಹೆಚ್ಚಿಕೊಂಡಿರುವ ದಿಂಡನ್ನು ಹಾಕಿ ಚೆನ್ನಾಗಿ ಬಾಡಿಸಿರಿ. ಒಂದು ಲೋಟದಷ್ಟು ನೀರು, ಸಕ್ಕರೆ, ಉಪ್ಪು, ಇಂಗು ಹಾಕಿ ಬೇಯಲು ಬಿಡಿ. ಕ್ರಮೇಣ ನೀರು ಇಂಗಿ ಪುಡಿ ಪುಡಿ ಪಲ್ಯದ ಆಕಾರಕ್ಕೆ ತಿರುಗುವವರೆಗೆ ಬೇಯಲಿ. ಊಟಕ್ಕೆ ಕುಳಿತುಕೊಳ್ಳುವ ಮುನ್ನ ಈ ಪಲ್ಯ ಮಾಡಿದರೆ ಸರಿ. ಏಕೆಂದರೆ ಬಾಳೆದಿಂಡಿನ ಪಲ್ಯವನ್ನು ಬಿಸಿಬಿಸಿ ತಿಂದರೆ ಚೆನ್ನಾಗಿರುತ್ತದೆ. ಆರಿದರೆ ತಿನ್ನುವ ಮಜ ಕಡಿಮೆ.

ಈ ಹಿಂದೆ ನಮ್ಮಲ್ಲಿ ಬಾಳೆ ದಿಂಡಿನ ಗೊಜ್ಜು ಮಾಡುವ ಕ್ರಮ ಪ್ರಕಟಿಸಲಾಗಿತ್ತು. ಅದನ್ನೂ ಓದಿ, ಅದನ್ನೂ ಮಾಡಿ .

( ದಟ್ಸ್ ಕನ್ನಡ ಅಡುಗೆ ಶಾಲೆ)