ಟೊಮೆಟೋ ಸೌತೆಕಾಯಿ ಸಲಾಡ್‌

Palya

oi-Staff

By * ಸರಸ್ವತಿ ಕೆ.ಎಸ್., ಬೆಂಗಳೂರು

Published: Friday, May 22, 2009, 18:09 [IST]

ಸೌತೆಕಾಯಿಯಲ್ಲಿ ಕೋಸಂಬರಿ- ಸಳ್ಳಿ, ಸಾರು ಬಿಟ್ರೆ ಇನ್ನೇನು ಮಾಡಲಿಕ್ಕೆ ಬರತ್ತೆ ಅಂತ ಯಾವಾಗಲೂ ಮಾರ್ಕೆಟ್‌ನಿಂದ ಕಾಲು ಕೆಜಿಗಿಂತ ಹೆಚ್ಚು ಸೌತೇ ಕಾಯಿ ತರುತ್ತಿರಲಿಲ್ಲ. ಆದ್ರೆ ಮೊನ್ನೆಯಷ್ಟೇ ಸುಮ್ಮಿ ಮನೆಯಲ್ಲಿ ಸೌತೇಕಾಯಿ ಮತ್ತು ಟೊಮೆಟೋ ಸಲಾಡ್‌ ಮಾಡಿದ್ದರು. ಯಾಕೆ ಒಮ್ಮೆ ಟ್ರೈ ಮಾಡಿ ನೋಡಬಾರದು. ಸೋ.. ಈ ಭಾನುವಾರದ ಸ್ಪೆಷಲ್‌ ಮೆನು ಟೋಮೆಟೋ-ಸೌತೆಕಾಯಿ ಸಲಾಡ್‌ !

ಅಂದ ಹಾಗೆ ಇದು ಮಂಗಳೂರಿನ ತರಾವಳಿ ಸೌತೆ ಕಾಯಿಯ ಸಲಾಡ್‌ ಅಲ್ಲ. ಮುಳ್ಳು ಸೌತೆಕಾಯಿ ಸಲಾಡ್‌. ಮಂಗಳೂರು ಸೌತೆ ಕಾಯಿಯಲ್ಲಿ ಸಲಾಡ್‌ ಮಾಡಲಾಗದು ಎಂದಲ್ಲ. ಅದು ಎಳೆ ಸೌತೆಯಾಗಿದ್ದರೆ ಸರಿ. ಆದರೆ ಅದು ಕಹಿ ಸೌತೆಯಾ ಅಂತ ಕನ್‌ಫರ್ಮ್‌ ಮಾಡಿಕೊಳ್ಳಬೇಕು.

ನಿಮ್ಮ ಟ್ರೇಯಲ್ಲಿ ಈ ಎಲ್ಲಾ ಸಾಮಾನುಗಳಿರಬೇಕು

ಒಂದು ಸೌತೇಕಾಯಿ ನೀಟಾಗಿ ತೊಳೆದು ಒರೆಸಿಟ್ಟುಕೊಳ್ಳಿ.
ಜೊತೆಗಿರಲಿ ಕಾಲು ಕೆಜಿ ಟೊಮೆಟೋ
ಒಂದು ನಿಂಬೆ ಹಣ್ಣು
ಅರ್ಧ ಕಪ್‌ ಸಕ್ಕರೆ
10-12 ಪುದೀನಾ ಎಲೆ
ಅರ್ಧ ಚಮಚ ಜೀರಿಗೆ.
ರುಚಿಗೆ ತಕ್ಕಷ್ಟು ಉಪ್ಪು

ಪುದೀನಾ ಮತ್ತು ಟೋಮೆಟೋ ಹೋಳು ಮಾಡಿ ಮಿಕ್ಸಿಗೆ ಹಾಕಿ ನುಣ್ಣಗೆ ಅರೆಯಿರಿ. ಇದನ್ನು ಒಂದು ಸ್ಟೀಲ್‌ ಪಾತ್ರೆಗೆ ಹಾಕಿಡಿ. ಉಪ್ಪು, ಮೆಣಸು ಸಕ್ಕರೆ ಮತ್ತು ಹುರಿದು ಪುಡಿ ಮಾಡಿರುವ ಜೀರಿಗೆ, ಸೇರಿಸಿ ಕುದಿಯಲಿಕ್ಕಿಡಿ. ಕೆಳಗಿಳಿಸಿ ಆರಿದ ನಂತರ ಐಸ್‌ ಟ್ರೇಗೆ ಸುರಿದು ಫ್ರಿಜ್‌ನಲ್ಲಿಡಿ.

ಸೌತೆಕಾಯಿ ಸಿಪ್ಪೆ ತೆಗೆದು ತುರಿದಿಡಿ. ಇದರ ಮೇಲೆ ನಿಂಬೆ ಹಣ್ಣು ಹಿಂಡಿಕೊಂಡು ಒಂದು ತಾಸು ಫ್ರಿಜ್‌ನಲ್ಲಿರಿಸಿ. ಬಡಿಸಲಿಕ್ಕೆ ಮುಂಚೆ ಇದರ ಮೇಲೆ ಉಪ್ಪು ಮತ್ತು ಮೆಣಸು ಮಿಶ್ರಣ ಉದುರಿಸಿ. ಇದನ್ನು ಬಟ್ಟಲಿನಲ್ಲಿ ಬಡಿಸಿದ ಮೇಲೆ ಮೊದಲು ತಯಾರಿಸಿಟ್ಟುಕೊಂಡಿದ್ದ ಟೊಮೆಟೋ ಕ್ಯೂಬ್‌ಗಳನ್ನು ಬಟ್ಟಲಿನ ಸುತ್ತ ಇಟ್ಟು ಊಟಕ್ಕೆ ಮೊದಲು ಬಡಿಸಿ.