ಸಿಲಿಂಡರಿನ ಆಯಸ್ಸು ತಿಳಿಯುವ ಬಗೆ

ಸುಮಿತ್ರಾ, ಬೆಂಗಳೂರು

ನಿಮ್ಮ ಎಲ್‌ಪಿಜಿ ಸಿಲಿಂಡರ್‌‌ನ ಕಾಲಾವಧಿ ಅಂದ್ರೆ ಅದರ ಆಯಸ್ಸು(ಗಮನಿಸಿ:ಅಡುಗೆ ಅನಿಲದ ಕಾಲಾವಧಿಯಲ್ಲ) ಯಾವಾಗ ಮುಗಿಯುತ್ತದೆ ಎಂದು ತಿಳಿದುಕೊಳ್ಳುವುದು ಅಷ್ಟು ಕಷ್ಟವಲ್ಲ ಎಂದು ನಮ್ಮ ಪರಿಕರ ವಿಭಾಗದಲ್ಲಿ ಬೆಂಗಳೂರಿನ ಸುಮಿತ್ರಾ ತಿಳಿಸಿದ್ದಾರೆ.

ಕಾಲಾವಧಿ ಮುಗಿದ ಸಿಲಿಂಡರ್‌ಗಳನ್ನು ಬಳಸುವುದು ಜೀವಕ್ಕೇ ಅಪಾಯ. ಈ ವಿಚಾರದಲ್ಲಿ ಗೃಹಿಣಿಯರು ಸ್ವಲ್ಪ ಎಚ್ಚರಿಕೆ ವಹಿಸಬೇಕು. ನಿಮ್ಮ ಅಡುಗೆ ಮನೆಯಲ್ಲಿರುವ ಸಿಲಿಂಡರನ್ನು ಯಾವತ್ತಾದರೂ ಒಮ್ಮೆ ಪರೀಕ್ಷಿಸಿ ನೋಡಿದ್ದೀರಾ? ಈ ಬಾರಿ ಅಡುಗೆ ಅನಿಲ ಮಾರಾಟಗಾರರಿಂದ ಸಿಲಿಂಡರನ್ನು ಪಡೆಯ ಬೇಕಾದರೆ ಅದರ ಮೇಲೆ ನಮೂದಿಸಿರುವ ದಿನಾಂಕವನ್ನೊಮ್ಮೆ ಪರೀಕ್ಷಿಸಿ ನೋಡಿ. ಸಿಲಿಂಡರಿನ ಮೂತಿಯ ಬಳಿ ಮೂರು ಹಿಡಿಗಳಿರುತ್ತವಲ್ಲಾ ಅಲ್ಲಿ ದಿನಾಂಕವನ್ನು ಬರೆದಿರುತ್ತಾರೆ.

ಹೀಗೆ ಮಾಡಿ: ಸಿಲಿಂಡರಿನ ಹಿಡಿಯ ಮೇಲೆ ಸಂಕೇತಾಕ್ಷರಗಳಲ್ಲಿ(alpha numeric) A, B,C,D ಮತ್ತು ಎರಡು ಅಂಕೆಯ ಸಂಖ್ಯೆಯೊಂದಿಗೆ ಬರೆದಿರುತ್ತಾರೆ. ಉದಾ: D06 ಎಂದು.

ಎ,ಬಿ,ಸಿ,ಡಿ ಅರ್ಥ ಹೀಗಿದೆ:

A ಅಕ್ಷರವು ಮಾರ್ಚ್ (ಮೊದಲನೆ ತ್ರೈಮಾಸಿಕ)
B ಅಕ್ಷರವು ಜೂನ್(ಎರಡನೆ ತ್ರೈಮಾಸಿಕ)
C ಅಕ್ಷರವು ಸೆಪ್ಟೆಂಬರ್(ಮೂರನೆ ತ್ರೈಮಾಸಿಕ)
D ಅಕ್ಷರವು ಡಿಸೆಂಬರ್(ನಾಲ್ಕನೆ ತ್ರೈಮಾಸಿಕ)

ಸಂಖ್ಯೆಗಳು ಸಿಲಿಂಡರಿನ ಆಯುಸ್ಸನ್ನು ಸೂಚಿಸುತ್ತವೆ:

D06 ಸಂಕೇತಾಕ್ಷರದ ಅರ್ಥ ಹೀಗಿದೆ; 2006ನೇ ವರ್ಷದ ಡಿಸೆಂಬರ್‌ಗೆ ಸಿಲಿಂಡರಿನ ಆಯಸ್ಸು ಮುಗಿಯುತ್ತದೆ ಎಂದು. ಈ ರೀತಿ ಅವಧಿ ಮುಗಿದ ಸಿಲಿಂಡರನ್ನು ನಿಮ್ಮ ಮಾರಾಟಗಾರರಿಂದ ಸ್ವೀಕರಿಸಬೇಡಿ. ಇದನ್ನು ನಿಮ್ಮ ನೆರೆಹೊರೆಯವರಿಗೂ ತಿಳಿಸಿ. ಅಪಾಯ ಎದುರಾಗುವ ಮುಂಚೆ ಉಪಾಯವಾಗಿ ಪಾರಾಗುವುದೇ ಜಾಣತನ ಅಲ್ಲವೇ!?

ಇದರ ಅರ್ಥ ಹೀಗಿದೆ:

"A" ಅಂದ್ರೆ ಮೊದಲ ತ್ರೈಮಾಸಿಕ ಎಂದು ಜನವರಿ ಯಿಂದ ಮಾರ್ಚ್‌ವರೆಗಿನ ಕಾಲಾವಧಿ "07" ಅಂದ್ರೆ 2007ನೇ ವರ್ಷ ಎಂದುಸಿಲಿಂಡರಿನ ಹಿಡಿಯ ಮೇಲೆ ನಮೂದಿಸಿರುವ A-07ನ ಅರ್ಥ, ನೀವು ಬಳಸುತ್ತಿರುವ ಸಿಲಿಂಡರ್‌ನ ಕಾಲಾವಧಿ ಮಾರ್ಚ್ 2007ಕ್ಕೆ ಮುಗಿಯುತ್ತದೆ. ಆನಂತರ ಆ ಸಿಲಿಂಡರನ್ನು ಬಳಸಬೇಡಿ. ಈ ಸಂಕೇತಾಕ್ಷರವನ್ನು ಬಹಳಷ್ಟು ಜನ ಅನಿಲ ಮುಗಿಯುವ ಕಾಲಾವಧಿ ಎಂದು ತಪ್ಪಾಗಿ ಅರ್ಥ ಮಾಡಿಕೊಳ್ಳುತ್ತಾರೆ. ಈ ರೀತಿ ಅವಧಿ ಮುಗಿದ ಸಿಲಿಂಡರ್‌ಗಳು ಬಾಂಬ್‌‍ನಂತೆ ಸಿಡಿದು ಜೀವ ತೆಗೆಯುತ್ತವೆ ಹುಶಾರಾಗಿರಿ!