ಸಿಂಪಲ್ಲಾಗಿ ಒಂದು ಮೊಟ್ಟೆ ಸಾರು

Non Vegetarian

oi-Reena

By Hema S

Updated: Friday, June 14, 2013, 15:03 [IST]

ಈ ಮೊಟ್ಟೆ ಸಾರು ಮಾಡುವುದು ಬಲು ಸುಲಭ. ಅಡುಗೆ ಬರದವರೂ ಕೂಡ ಇದನ್ನು ಮಾಡಿದರೆ ಸವಿರುಚಿಯ ಮೊಟ್ಟೆ ಸಾರು ಸಿದ್ಧವಾಗುವುದು. ಮನೆಯಲ್ಲಿ ಸಾಮಾನ್ಯವಾದ ಅಡುಗೆಗೆ ಬಳಸುವ ಪದಾರ್ಥಗಳನ್ನು ಬಳಸಿ, ಈ ಮೊಟ್ಟೆ ಸಾರು ತಯಾರಿಸಬಹುದಾಗಿದ್ದು, ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ ಬನ್ನಿ.

ರೆಸಿಪಿಯನ್ನು ಈ ಕೆಳಗೆ ನೀಡಲಾಗಿದೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಬೇಯಿಸಿದ ಮೊಟ್ಟೆ 4
ಈರುಳ್ಳಿ 1
ಖಾರದ ಪುಡಿ 1 ಚಮಚ
ಕೊತ್ತಂಬರಿ ಪುಡಿ 3/4 ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ಟೊಮೆಟೊ 1-2
ಗರಂ ಮಸಾಲ ಪುಡಿ ಅರ್ಧ ಚಮಚ
ಬೇಯಿಸಿದ ಆಲೂಗಡ್ಡೆ 2
ರುಚಿಗೆ ತಕ್ಕ ಉಪ್ಪು
ಸ್ವಲ್ಪ ಕೊತ್ತಂಬರಿ ಸೊಪ್ಪು
ಎಣ್ಣೆ 1 ಚಮಚ
ಸಾಸಿವೆ
ಬೆಳ್ಳುಳ್ಳಿ 2-3 ಎಸಳು

ತಯಾರಿಸುವ ವಿಧಾನ:

* ಪಾತ್ರೆಗೆ ಎಣ್ಣೆ ಹಾಕಿ ಉರಿಯಲ್ಲಿ ಇಡಿ. ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಿ, ನಂತರ ಬೆಳ್ಳುಳ್ಳಿ, ಈರುಳ್ಳಿ ಹಾಕಿ, ಈರುಳ್ಳಿ ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

* ನಂತರ ಟೊಮೆಟೊ ಹಾಕಿ ಅದು ಮೆತ್ತಗಾಗುವವರೆಗೆ ಹುರಿದು ಅದನ್ನು ಚೆನ್ನಾಗಿ ಮ್ಯಾಶ್ ಮಾಡಿ, ಈಗ ಖಾರದ ಪುಡಿ, ಅರಿಶಿಣ ಪುಡಿ, ಗರಂ ಮಸಾಲ, ಕೊತ್ತಂಬರಿ ಪುಡಿ, ರುಚಿಗೆ ತಕ್ಕ ಉಪ್ಪು ಹಾಕಿ , ಬೇಯಿಸಿದ ಆಲೂಗಡ್ಡೆಯನ್ನು ಕತ್ತರಿಸಿ ಹಾಕಿ 2 ನಿಮಿಷ ಸೌಟ್ ನಿಂದ ಆಡಿಸಿ. ನಂತರ 1 ಕಪ್ ನೀರು ಹಾಕಿ ಕುದಿಸಿ.

* ಮಿಶ್ರಣ ಚೆನ್ನಾಗಿ ಕುದಿ ಬಂದಾಗ ಬೇಯಿಸಿದ ಮೊಟ್ಟೆಯನ್ನು ಹಾಕಿ ಕಡಿಮೆ ಉರಿಯಲ್ಲಿ 5 ನಿಮಿಷ ಕುದಿಸಿ, ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಮೊಟ್ಟೆ ಸಾರು ರೆಡಿ.