ಪ್ರಾನ್ ಕ್ಯಾಪ್ಸಿಕಂ ಸಾರಿನ ರೆಸಿಪಿ

ಪ್ರಾನ್ ಸಾರನ್ನು ಅನೇಕ ರುಚಿಯಲ್ಲಿ ತಯಾರಿಸಬಹುದು. ತೆಂಗಿನಕಾಯಿ ಹಾಕಿ ಮಾಡಬಹುದು, ಹಾಗೇ ಮಾಡಬಹುದು, ಗ್ರೇವಿ ರೀತಿ ಮಾಡಬಹುದು ಹೀಗೆ ನಮಗೆ ಹೇಗೆ ಬೇಕೋ ಆ ರುಚಿಯಲ್ಲಿ ತಯಾರಿಸಬಹುದು.

ಇಲ್ಲಿ ನಾವು ಬರೀ ಮಸಾಲೆ ಸಾಮಾಗ್ರಿ ಬಳಸಿ ಮಾಡುವ ತುಂಬಾ ಸರಳವಾದ ಪ್ರಾನ್ ಕ್ಯಾಪ್ಸಿಕಂ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಸೀಗಡಿ(ಪ್ರಾನ್ಸ್) 500 ಗ್ರಾಂ
ಈರುಳ್ಳಿ 1
ಬೆಳ್ಳುಳ್ಳಿ ಎಸಳು 8-10
ಕ್ಯಾಪ್ಸಿಕಂ 1
ಟೊಮೆಟೊ 1
ಸ್ವಲ್ಪ ಹುಣಸೆ ಹಣ್ಣು
ಖಾರದ ಪುಡಿ (ಖಾರಕ್ಕೆ ತಕ್ಕಷ್ಟು)
ಅರಿಶಿಣ ಪುಡಿ ಹಾಗೂ ಗರಂ ಮಸಾಲ ಅರ್ಧ ಚಮಚದಷ್ಟು
ಹಸಿ ಮೆಣಸಿನಕಾಯಿ 2
ಎಣ್ಣೆ 2 ಚಮಚ
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

* ಪ್ರಾನ್ ಅನ್ನು ಶುಚಿಗೊಳಿಸಿ ಉಪ್ಪು, ಅರಿಶಿಣ ಹಾಕಿ ಮಿಶ್ರ ಮಾಡಿ ಅರ್ಧ ಗಂಟೆ ಕಾಲ ಇಡಿ.

* ಬಾಣಲೆಗೆ ಎಣ್ಣೆ ಹಾಕಿ, ಅದರಲ್ಲಿ ಪ್ರಾನ್ ಹಾಕಿ ಪ್ರಾನ್ ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಹುರಿಯಿರಿ. ಫ್ರೈ ಮಾಡಿದ ಪ್ರಾನ್ ಅನ್ನು ಒಂದು ಪಾತ್ರೆಯಲ್ಲಿ ಹಾಕಿಡಿ.

* ಈಗ ಬಾಣಲೆಗೆ 1 ಚಮಚ ಎಣ್ಣೆ ಹಾಕಿ ಬಿಸಿ ಮಾಡಿ, ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಿ ನಂತರ ಬೆಳ್ಳುಳ್ಳಿ ಹಾಗೂ ಕರಿ ಬೇವಿನ ಎಲೆ ಹಾಕಿ. ಈಗ ಹಸಿ ಮೆಣಸಿನಕಾಯಿ, ಈರುಳ್ಳಿ ಹಾಕಿ, ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

* ನಂತರ ಕತ್ತರಿಸಿದ ದುಂಡು ಮೆಣಸಿನಕಾಯಿ ಹಾಕಿ, ಟೊಮೆಟೊ ಹಾಕಿ ಟೊಮೆಟೊ ಮೆತ್ತಗಾಗುವವರೆಗೆ ಹುರಿಯಿರಿ.

* ಈಗ ಮಸಾಲೆ ಪದಾರ್ಥಗಳನ್ನು ಸೇರಿಸಿ, ಸ್ವಲ್ಪ ಉಪ್ಪು ಹಾಕಿ, 2 ಕಪ್ ನೀರು ಸೇರಿಸಿ ಕುದಿಸಿ. ಸಾರು ಕುದಿ ಬರುವಾಗ ಹುಣಸೆ ಹಣ್ಣಿನ ರಸವನ್ನು ಹ ಹಾಕಿ. ನಂತರ ಪುನಃ 5 ನಿಮಿಷ ಕುದಿಸಿ. ಮಿಶ್ರಣ ಕುದಿ ಬರುವಾಗ ಫ್ರೈ ಮಾಡಿದ ಪ್ರಾನ್ ಹಾಕಿ, 5 ನಿಮಿಷ ಬೇಯಿಸಿ ಉಪ್ಪು ನೋಡಿ ಉರಿಯಿಂದ ಇಳಿಸಿದರೆ ರುಚಿಕರವಾದ ಪ್ರಾನ್ ಕ್ಯಾಪ್ಸಿಕಂ ಸಾರು ರೆಡಿ.