ಮೀನು ಪ್ರಿಯರಿಗಾಗಿ ಪಾಂಫ್ರೆಟ್ ಫಿಶ್ ಫ್ರೈ

Non Vegetarian

oi-Reena

By Hema S

Published: Thursday, June 28, 2012, 14:58 [IST]

ಒಂದೊಂದು ಮೀನು ತನ್ನದೇ ಆದ ವಿಶಿಷ್ಟ ರುಚಿಯನ್ನು ಹೊಂದಿರುತ್ತದೆ. ಅದರಲ್ಲಿ ಪಾಂಫ್ರೆಟ್ ಫಿಶ್ ನೋಡಿದರೆ ಮೀನು ಪ್ರಿಯರ ಬಾಯಲ್ಲಿ ನೀರೂರುವುದು ಸಹಜ. ಈ ಮೀನನ್ನು ಸಾರು ಮಾಡುವ ಬದಲು ಫ್ರೈ ಮಾಡಿ ತಿನ್ನಲಾಗುವುದು. ಪಾಂಫ್ರೆಟ್ ಫ್ರೈ ತಟ್ಟೆಯಲ್ಲಿ ಇದ್ದರೆ ಒಂದು ಹಿಡಿ ಅನ್ನ ಅಧಿಕವೇ ಹೊಟ್ಟೆ ಸೇರುತ್ತದೆ. ಈ ಮೀನಿನ ಫ್ರೈ ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಗ್ರಿಗಳು:
* 1 ಕೆ.ಜಿ. ಪಾಂಫ್ರೆಟ್ ಫಿಶ್
* ರುಚಿಗೆ ತಕ್ಕ ಉಪ್ಪು
* 4 ಚಮಚ ಖಾರದ ಪುಡಿ
* 1 ಮೊಟ್ಟೆ
* 1/4 ಚಮಚ ಅರಿಶಿಣ
* 100 ಗ್ರಾಂ ರವೆ,
* ಎಣ್ಣೆ
* ನಿಂಬೆರಸ

ಮಾಡುವ ವಿಧಾನ:

1. ಸ್ವಚ್ಛಗೊಳಿಸಿದ ಪಾಂಫ್ರೆಟ್ ಗೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಅರ್ಧ ಗಂಟೆ ಬಿಡಬೇಕು.

2. ಖಾರದಪುಡಿ, ಸ್ವಲ್ಪ ಉಪ್ಪು, ಅರಿಶಿಣ ಪುಡಿ ಮತ್ತು ಮೊಟ್ಟೆಯನ್ನು ಚೆನ್ನಾಗಿ ಮಿಶ್ರ ಮಾಡಬೇಕು. ಮಿಶ್ರಣ ಸ್ವಲ್ಪ ಗಟ್ಟಿಯಾಗಿರಬೇಕು. ನಂತರ ಆ ಮಿಶ್ರಣವನ್ನು ಮೀನಿಗೆ ಚೆನ್ನಾಗಿ ಸವರಿ ಒಂದು ಗಂಟೆ ಇಡಬೇಕು.

3. ನಂತರ ಮೀನನ್ನು ರವೆಯಲ್ಲಿ ಅದ್ದಿ, ಕಾದ ಎಣ್ಣೆಯಲ್ಲಿ ಹಾಕಿ ಕರಿದರೆ ರುಚಿಕರವಾದ ಪಾಂಫ್ರೆಟ್ ಫಿಶ್ ಫ್ರೈ ರೆಡಿ. ಅದಕ್ಕೆ ನಿಂಬೆ ರಸ ಹಿಂಡಿದರೆ ಈ ಮೀನು ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.

ಈ ಮೀನನ್ನು ಫ್ರೈ ಮಾಡಿ ಫ್ರಿಜ್ ನಲ್ಲಿ ಎರಡು ದಿನಗಳವರೆಗೆ ಇಟ್ಟು ತಿನ್ನಬಹುದು. ಆದರೆ ಪ್ರತಿ ಬಾರಿ ತಿನ್ನುವಾಗ ತವಾದಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಮೀನನ್ನು ಬಿಸಿ ಮಾಡಿ ತಿನ್ನಿ. ಮನೆಗೆ ನೆಂಟರಿಷ್ಟರು ಬಂದಾಗ ಪಾಂಫ್ರಟ್ ಫ್ರೈ ಮಾಡುವುದಾದರೆ, ಫ್ರೈಯನ್ನು ತಟ್ಟೆಗೆ ಹಾಕಿ, ಕತ್ತರಿಸಿದ ಈರುಳ್ಳಿ ಮತ್ತು ನಿಂಬೆ ಹಣ್ಣಿನ ತುಡನ್ನು ತಟ್ಟೆಯಲ್ಲಿ ಇಟ್ಟು ಅನ್ನದ ಜೊತೆ ಸವಿಯಲು ಕೊಡಿ.

ಸಲಹೆ: ಫ್ರಿಜ್ ನಲ್ಲಿ ಇಡುವ ಮೀನಿಗೆ ನಿಂಬೆ ರಸ ಹಿಂಡ ಬೇಡಿ, ತಿನ್ನುವಾಗ ಹಿಂಡಿದರೆ ಸಾಕು.