ಯಮ್ಮೀ... ಈ ಮೆಂತೆ ಚಿಕನ್ ಗ್ರೇವಿ

ಇವತ್ತು ಚಿಕನ್ ನಿಂದ ಸ್ಪೆಷಲ್ ಅಡುಗೆ ಮಾಡಬಯಸುವುದಾದರೆ ಈ ಅಡುಗೆ ಟ್ರೈ ಮಾಡಿ. ಮೆಂತೆ ಸೊಪ್ಪು ಹಾಕಿ ಮಾಡುವ ಈ ಚಿಕನ್ ಗ್ರೇವಿ ಅನ್ನ ಅಥವಾ ಚಪಾತಿಗೆ ಬೆಸ್ಟ್.

ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣವೇ?

ಬೇಕಾಗುವ ಸಾಮಾಗ್ರಿಗಳು
* 1 ಕೆಜಿ ಚಿಕನ್ 2 ಕಟ್ಟು ಮೆಂತೆ ಸೊಪ್ಪು
* 2 ಈರುಳ್ಳಿ (ಕತ್ತರಿಸಿದ್ದು)
* 3 ಹಸಿ ಮೆಣಸಿನಕಾಯಿ(ಪೇಸ್ಟ್ ಮಾಡಿ)
* 3/4 ಚಮಚ ಶುಂಠಿ ಪೇಸ್ಟ್
* 1 ಟೊಮೆಟೊ(ಪೇಸ್ಟ್ ಮಾಡಿದ್ದು)
* 1/4 ಕಪ್ ಮೊಸರು
* ಅರ್ಧ ಚಮಚ ಅರಿಶಿಣ ಪುಡಿ
* 1 ಚಮಚ ಕೊತ್ತಂಬರಿ ಪುಡಿ
* ಅರ್ಧ ಚಮಚ ಜೀರಿಗೆ ಪುಡಿ
* ಗರಂ ಮಸಾಲ 1 ಚಮಚ
* ರುಚಿಗೆ ತಕ್ಕ ಉಪ್ಪು
* ಗೋಡಂಬಿ(8-10)
* ಎಣ್ಣೆ

ಮಾಡುವ ವಿಧಾನ:

* ಮೆಂತೆ ಸೊಪ್ಪನ್ನು ಶುಚಿ ಮಾಡಿ, ಅದಕ್ಕೆ ಸ್ವಲ್ಪ ನೀರು, ಸಕ್ಕರೆ, ಉಪ್ಪು ಹಾಕಿ ಮಿಕ್ಸ್ ಮಾಡಿ 15 ನಿಮಿಷ ಇಟ್ಟು ಸೊಪ್ಪಿನಿಂದ ನೀರನ್ನು ಸೋಸಿ.

* ಈಗ ಚಿಕನ್ ಅನ್ನು ಸಾಧಾರಣ ಗಾತ್ರಕ್ಕೆ ಕತ್ತರಿಸಿ.

* ಈಗ ಪಾತ್ರೆಗೆ ಅರ್ಧ ಚಮಚ ಎಣ್ಣೆ ಹಾಕಿ ಅದರಲ್ಲಿ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿದ ಬಳಿಕ ಅದನ್ನು ಮೊಸರಿನ ಜೊತೆ ಹಾಕಿ ಪೇಸ್ಟ್ ಮಾಡಿ ಇಡಿ.

* ಈಗ ಪಾತ್ರೆಗೆ 2 ಚಮಚ ಎಣ್ಣೆ ಹಾಕಿ ಅದರಲ್ಲಿ ಶುಂಠಿ ಮತ್ತು ಬೆಳ್ಳುಳ್ಳಿ ಮತ್ತು ಹಸಿ ಮೆಣಸಿನಕಾಯಿ ಪೇಸ್ಟ್ ಹಾಕಿ 2 ನಿಮಿಷ ಹುರಿದು, ನಂತರ ಅರಿಶಿಣ ಪುಡಿ, ಖಾರದ ಪುಡಿ, ಜೀರಿಗೆ ಮತ್ತು ಕೊತ್ತಂಬರಿ ಪುಡಿ ಹಾಕಿ ಮಿಕ್ಸ್ ಮಾಡಿ.

* ಈಗ ಟೊಮೆಟೊ ಪೇಸ್ಟ್ ಹಾಕಿ 3 ನಿಮಿಷ ಹುರಿದು, ಈಗ ಮೊಸರು ಜೊತೆ ರುಬ್ಬಿದ ಈರುಳ್ಳಿ ಪೇಸ್ಟ್, ಈಗ ಶುಚಿ ಮಾಡಿದ ಚಿಕನ್ ಹಾಕಿ, ರುಚಿಗೆ ತಕ್ಕ ಉಪ್ಪು ಮಿಕ್ಸ್ ಮಾಡಿ, ಉರಿ ಜಾಸ್ತಿ ಮಾಡಿ 5 ನಿಮಿಷ ಬೇಯಿಸಿದ ಬಳಿಕ, ಉರಿಯನ್ನು ಮೀಡಿಯಂನಲ್ಲಿಟ್ಟು ಚಿಕನ್ ಮುಕ್ಕಾಲು ಭಾಗ ಬೇಯುವವರೆಗೆ ಬೇಯಿಸಿ.

* ಈಗ ಗೋಡಂಬಿ ಪೇಸ್ಟ್, ಗರಂ ಮಸಾಲ ಪುಡಿ, ಕತ್ತರಿಸಿದ ಮೆಂತೆ ಸೊಪ್ಪು ಹಾಕಿ ಮಿಕ್ಸ್ ಮಾಡಿ, ನಂತರ ಕಾಲು ಗ್ಲಾಸ್ ನೀರು ಹಾಕಿ ಮಿಕ್ಸ್ ಮಾಡಿ, ಗ್ರೇವಿ ರೀತಿಯಾದ ಮೇಲೆ ಉರಿಯಿಂದ ಇಳಿಸಿದರೆ ಮೆಂತೆ ಸೊಪ್ಪಿನ ಚಿಕನ್ ರೆಡಿ.