ಲಾಲ್ ಮಾಸ್- ರಾಜಾಸ್ಥಾನಿ ಶೈಲಿಯ ಮಟನ್ ಕರಿ

ಲಾಲ್ ಮಾಸ್ ಕರಿ ಉತ್ತರ ಭಾರತದ ಕಡೆ ತುಂಬಾ ಫೇಮಸ್ಸು. ಇದೊಂದು ರಾಜಾಸ್ಥಾನಿ ಸೈಲಿಯ ಅಡುಗೆಯಾಗಿದ್ದು ಈ ಸಾರನ್ನು ಮಟನ್ ನಿಂದ ತಯಾರಿಸಲಾಗುವುದು.

ಈ ಅಡುಗೆ ತುಂಬಾ ರುಚಿಕರವಾಗಿದ್ದು , ಒಣ ಮೆಣಸನ್ನು ಹುರಿದು ಪೇಸ್ಟ್ ಮಾಡಿ ಈ ಸಾರನ್ನು ತಯಾರಿಸಲಾಗುವುದು. ಮಟನ್ ನಲ್ಲಿ ಹೊಸ ರುಚಿಯ ಅಡುಗೆ ಟ್ರೈ ಮಾಡ ಬೇಕೆನ್ನುವವರು ಇದನ್ನು ಸುಲಭವಾಗಿ, ರುಚಿಕರವಾಗಿ ತಯಾರಿಸಬಹುದು.

ಬೇಕಾಗುವ ಸಾಮಾಗ್ರಿಗಳು
ಮಟನ್
ಒಂದು ಮೆಣಸಿನಕಾಯಿ
ಏಲಕ್ಕಿ
ಕರಿಮೆಣಸು 6
ಬೆಳ್ಳುಳ್ಳಿ 5-6 ಎಸಳು
ಲವಂಗ 2
ಅರ್ಧ ಇಂಚಿನಷ್ಟು ದೊಡ್ಡದಿರುವ ಚಕ್ಕೆ
ಜೀರಿಗೆ 1 ಚಮಚ
ಈರುಳ್ಳಿ 3
ಶುಂಠಿ, ಬೆಳ್ಳುಳ್ಳಿ ಪೀಸ್ 1 ಚಮಚ
ಮೊಸರು 1 ಕಪ್
ಕೊತ್ತಂಬರಿ ಪುಡಿ 1 ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ತುಪ್ಪ 2 ಚಮಚ

ತಯಾರಿಸುವ ವಿಧಾನ

* ಒಣ ಮೆಣಸನ್ನು ಸ್ವಲ್ಪ ಎಣ್ಣೆ ಹಾಕಿ ಹುರಿದು ಪೇಸ್ಟ್ ಮಾಡಿಡಬೇಕು.

* ತಾಮ್ರದ ಪಾತ್ರೆಯಲ್ಲಿ 2 ಚಮಚ ತುಪ್ಪ ಹಾಕಿ ಬಿಸಿ ಮಾಡಬೇಕು. ತುಪ್ಪ ಬಿಸಿಯಾದಾಗ ಚಕ್ಕೆ, ಲವಂಗ, ಏಲಕ್ಕಿ, ಕರಿ ಮೆಣಸಿನ ಪುಡಿ, 2 ಒಣ ಮೆಣಸಿನ ಪುಡಿ, ಬೆಳ್ಳುಳ್ಳಿ, ಪಲಾವ್ ಎಲೆ ಹಾಕಿ ಸ್ವಲ್ಪ ಹೊತ್ತು ಹುರಿಯಬೇಕು.

* ನಂತರ ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

* ನಂತರ ಮಟನ್ ಹಾಕಿ ಒಣ ಮೆಣಸಿನ ಪೇಸ್ಟ್, ಕೊತ್ತಂಬರಿ ಪುಡಿ, ಅರಿಶಿಣ ಪುಡಿ ಹಾಕಿ 5-6 ನಿಮಿಷ ಬೇಯಿಸಬೇಕು. ನಂತರ ಮೊಸರು ಹಾಕಿ ರುಚಿಗೆ ತಕ್ಕ ಉಪ್ಪು ಸೇರಿಸಿ ಪಾತ್ರೆಯ ಬಾಯಿಯನ್ನು ಮುಚ್ಚಿ ಮಟನ್ ಬೇಯುವವರೆಗೆ ಬೇಯಿಸಿ.

* ಗ್ರೇವಿ ತುಂಬಾ ಗಟ್ಟಿಯಾಗಿದ್ದರೆ1/4 ಕಪ್ ನೀರು ಸೇರಿಸಿ ಕುದಿಸಿ, ಮಟನ್ ಬೆಂದ ಮೇಲೆ ಉರಿಯಿಂದ ಇಳಿಸಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರಾಜಾಸ್ಥಾನಿ ಶೈಲಿಯ ಮಟನ್ ಕರಿ ರೆಡಿ.