ರುಚಿಕರವಾದ ಮಟನ್ ಖೀಮಾ ರೆಸಿಪಿ

Published: Monday, June 25, 2012, 15:31 [IST]

ನಾನ್ ವೆಜ್ ಪೌಷ್ಠಿಕ ಆಹಾರವಾಗಿದ್ದು ದೇಹದ ಆರೋಗ್ಯವನ್ನು ಹೆಚ್ಚಿಸುತ್ತದೆ. ನಮ್ಮ ಅನೇಕ ಓದುಗ ಮಿತ್ರರು ಒನ್ ಇಂಡಿಯಾ ಕನ್ನಡದಲ್ಲಿ ನಾನ್ ವೆಜ್ ರೆಸಿಪಿಯೇ ಇಲ್ಲ. ನಮಗೆ ನಾನ್ ವೆಜ್ ಅಡುಗೆ ತಯಾರಿಸುವುದರ ಬಗ್ಗೆ ಕೂಡ ತಿಳಿಸಿ ಕೊಡಿ ಎಂದು ಕೇಳಿಕೊಂಡಿದ್ದರು. ಇನ್ನು ಮುಂದೆ ಸ್ವಾದಿಷ್ಟಕರ ವೆಜ್ ರೆಸಿಪಿ ಜೊತೆ ನಾನ್ ವೆಜ್ ರೆಸಿಪಿ ಕೂಡ ನಮ್ಮ ಪಾಕಶಾಲೆಯಲ್ಲಿ ದೊರೆಯುವಂತಾಗುವುದು.

ಇವತ್ತು ನಾವು ರುಚಿಕರವಾದ ಮಟನ್ ಖೀಮಾ ಮಾಡುವ ವಿಧಾನ ತಿಳಿಯೋಣ. ಈ ಅಡುಗೆ ತಯಾರಿಸಲು ಸುಲಭವಾಗಿದ್ದು, ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
ಅರ್ಧ ಕೆಜಿ ಮಟನ್ ಖೀಮಾ
ಲಿವರ್ 1/4 ಕೆಜಿ
ಈರುಳ್ಳಿ 3
ಬೆಳ್ಳುಳ್ಳಿ 7-8 ಎಸಳು
ಶುಂಠಿ 2ಇಂಚಿನಷ್ಟು
ಕತ್ತರಿಸಿದ ಹಸಿಮೆಣಸಿನ ಕಾಯಿ 4
ಜೀರಿಗೆ 1 ಚಮಚ
ಕರಿಮೆಣಸಿನಕಾಳು 1 ಚಮಚ
ಚಕ್ಕೆ ಮತ್ತು ಲವಂಗ ( ರುಚಿಗೆ ತಕ್ಕ ಹಾಗೆ)
ಕೆಂಪು ಮೆಣಸಿನ ಪುಡಿ 1 ಚಮಚ
ಕೊತ್ತಂಬರಿ 1 ಚಮಚ
ಟೊಮೆಟೊ 1 (ಕತ್ತರಿಸಿದ್ದು)
ಮೊಸರು 2 ಚಮಚ
ಕೊತ್ತಂಬರಿ ಸೊಪ್ಪು
ಎಣ್ಣೆ 2 ಚಮಚ
ಪಲಾವ್ ಎಲೆ 1
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಹಸಿ ಮಟನ್ ಖೀಮಾ, ಲಿವರ್, ಉಪ್ಪು ಮತ್ತು ಒಂದು ಬಟ್ಟಲು ನೀರನ್ನು ಅದಕ್ಕೆ ಸೇರಿಸಿ ಕುಕ್ಕರ್ ಮುಚ್ಚಿ 5 ನಿಮಿಷಗಳ ಕಾಲ ಬೇಯಿಸಿ ಒಂದು ಪಾತ್ರೆಯಲ್ಲಿ ಹಾಕಿಡಬೇಕು.

2. ಬೆಳ್ಳುಳ್ಳಿ, ಕರಿಮೆಣಸಿನ ಕಾಳು, ಜೀರಿಗೆ, ಚಕ್ಕೆ, ಲವಂಗ ಶುಂಠಿಯನ್ನು ಅರೆದು ಗಟ್ಟಿ ಪೇಸ್ಟ್ ಮಾಡಿ ಇಟ್ಟುಕೊಳ್ಳಬೇಕು.

3. ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ ಎಣ್ಣೆ ಹಾಕಿ , ಅದರಲ್ಲಿ ಪಲಾವ್ ಎಲೆಗಳನ್ನು ಹಾಕಿ, ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಉರಿಯಬೇಕು.

4. ಈರುಳ್ಳಿ ಕಂದು ಬಣ್ಣಕ್ಕೆ ಬರುವಾಗ ಖೀಮಾ ಮತ್ತು ಲಿವರ್ (ಬೇಯಿಸಿದ ಮಾಂಸ) ಹಾಕಿ 2-3 ನಿಮಿಷ ಮಿಶ್ರ ಮಾಡಬೇಕು. ನಂತರ ಕತ್ತರಿಸಿದ ಹಸಿಮೆಣಸಿನ ಕಾಯಿ, ಸಂಬಾರ ಪೇಸ್ಟ್ ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು. ನಂತರ ಕಡಿಮೆ ಉರಿಯಲ್ಲಿ 5 ನಿಮಿಷ ಬೇಯಿಸಬೇಕು. ನಂತರ ಕತ್ತರಿಸಿದ ಟೊಮೆಟೊ, ಕೆಂಪು ಮೆಣಸಿನ ಪುಡಿ ಕೊತ್ತಂಬರಿ ಪುಡಿ, ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರ ಮಾಡ 2-3 ನಿಮಿಷಬೇಯಿಸಬೇಕು.

5. ನಂತರ 1 ಕಪ್ ನೀರು ಸೇರಿಸಿ ಮಿಶ್ರ ಮಾಡಿ, ಪಾತ್ರೆಯ ಬಾಯಿ ಮುಚ್ಚಿ 7-10 ನಿಮಿಷ ಬೇಯಿಸಬೇಕು.

6. ನಂತರ 2 ಚಮಚ ಮೊಸರು ಹಾಕಿ ಪುನಃ2-5 ನಿಮಿಷ ಬೇಯಿಸಬೇಕು. ಈ ಮಟನ್ ಖೀಮಾವನ್ನು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿಕರವಾದ ಮಟನ್ ಲಿವರ್ ಖೀಮಾ ರೆಡಿ.

ಗಮನಕ್ಕೆ: ಲಿವರ್ ಬದಲಿಗೆ, ಎಲೆಕೋಸು, ಕ್ಯಾರೆಟ್, ಬಟಾಣಿಯಂತಹ ಯಾವುದೇ ತರಕಾರಿಯನ್ನು ಹಾಕಿ ಕೂಡ ಖೀಮಾ ತಯಾರಿಸಬಹುದು.
ಇದನ್ನು ತಯಾರಿಸಿ ನೋಡಿ, ರುಚಿ ಇಷ್ಟವಾಯಿತೇ ಎಂದು ನಮಗೆ ಬರೆಯಿರಿ.