ಹಕ್ಕಾ ಚಿಲ್ಲಿ ಚಿಕನ್ - ಚೈನೀಸ್ ರೆಸಿಪಿ

ಚೈನೀಸ್ ಅಡುಗೆ ಭಾರತದಲ್ಲಿ ಪ್ರಸಿದ್ಧಿಯನ್ನು ಪಡೆದಿದೆ. ಅವರು ಮಾಡುವ ಅಡುಗೆಗಳು ತುಂಬಾ ವಿಶಿಷ್ಟವಾಗಿದ್ದು, ರುಚಿಕರವಾಗಿರುತ್ತದೆ. ಚೈನೀಸ್ ಅಡುಗೆ ವೆಜ್ ಹಾಗೂ ನಾನ್ ವೆಜ್ ಎರಡಕ್ಕೂ ಪ್ರಸಿದ್ಧಿಯನ್ನು ಪಡೆದಿದೆ.

ಹಕ್ಕಾ ಚಿಕನ್ ಚಿಲ್ಲಿ ಚೈನೀಸ್ ಮಾದರಿಯ ಅಡುಗೆಯಾಗಿದೆ. ಚೈನೀಸ್ ಹಕ್ಕಾ ಚಿಲ್ಲಿ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಈ ಚೈನೀಸ್ ಅಡುಗೆಯನ್ನು ಅವರಷ್ಟೆ ರುಚಿಕರವಾಗಿ ನಾವು ಕೂಡ ತಯಾರಿಸಬಹುದಾಗಿದ್ದು ರೆಸಿಪಿ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು:
ಚಿಕನ್ ಲೆಗ್ ಪೀಸ್ 6-7
ಈರುಳ್ಳಿ 2
ಹಸಿ ಮೆಣಸಿನ ಕಾಯಿ 3-4
ದುಂಡು ಮೆಣಸಿನ ಕಾಯಿ 1
ಜೋಳದ ಹಿಟ್ಟು 3 ಚಮಚ
ಚಿಕ್ಕ ಈರುಳ್ಳಿ 2 (Spring onions)
ಬೆಳ್ಳುಳ್ಳಿ ಎಸಳು 5-6 (ಚಿಕ್ಕದಾಗಿ ಕತ್ತರಿಸಿದ್ದು)
ಕೆಂಪು ಮೆಣಸಿನ ಪುಡಿ 1 ಚಮಚ
ಸಿಪ್ಪೆ ಸುಲಿದ ಕಾಳು ಮೆಣಸಿನ ಪುಡಿ 1 ಚಮಚ
ಜೀರಿಗೆ 1 ಚಮಚ
ಸೋಯಾ ಸಾಸ್ 3 ಚಮಚ
ರುಚಿಗೆ ತಕ್ಕ ಉಪ್ಪು
ನೀರು 1 ಕಪ್
ಎಣ್ಣೆ ಅರ್ಧ ಕಪ್

ತಯಾರಿಸುವ ವಿಧಾನ:

* ಚಿಕನ್ ತುಂಡುಗಳನ್ನು ಸಾಧಾರಣ ಗಾತ್ರಕ್ಕೆ ಕತ್ತರಿಸಬೇಕು. ನಂತರ ಅದನ್ನು ಚೆನ್ನಾಗಿ ತೊಳೆದು ಉಪ್ಪು, ಕರಿಮೆಣಸಿನ ಪುಡಿ, 2 ಚಮಚ ಜೋಳದ ಹಿಟ್ಟು ಹಾಕಿಡಬೇಕು.

* ನಂತರ ಬಾಣಲೆಯಲ್ಲಿ ಒಂದು ಚಮಚ ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಶುಂಠಿ, ಬೆಳ್ಳುಳ್ಳಿ, ಜೀರಿಗೆ, ಕೊತ್ತಂಬರಿ ಪುಡಿ ಹಾಕಿ 1-2ನಿಮಿಷ ಹುರಿಯಬೇಕು.

* ಈಗ ಈ ಮಿಶ್ರಣವನ್ನು ಮಿಕ್ಸಿಯಲ್ಲಿ ಹಾಕಿ ರುಬ್ಬಬೇಕು.

* ಇದೇ ಸಮಯದಲ್ಲಿ ಎಣ್ಣೆ ಹಾಕಿ ಕಾಯಿಸಿ ಅದರಲ್ಲಿ ಚಿಕನ್ ತುಂಡುಗಳನ್ನು ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಅದನ್ನು ಒಂದು ಪಾತ್ರೆಯಲ್ಲಿ ತೆಗೆದಿಡಬೇಕು.

* ಈಗ ಪಾತ್ರೆಯನ್ನು ಬಿಸಿ ಮಾಡಿ ಅದಕ್ಕೆ 1 ಚಮಚ ಎಣ್ಣೆ ಹಾಕಿ ಹಸಿ ಮೆಣಸಿನ ಕಾಯಿ ಹಾಗೂ ಚಿಕ್ಕ ಈರುಳ್ಳಿ, ಕತ್ತರಿಸಿದ ದುಂಡು ಮೆಣಸಿನಕಾಯಿಯನ್ನು ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿದು ನಂತರ ಚಿಕನ್ ತುಂಡುಗಳನ್ನು ಹಾಕಿ, ರುಬ್ಬಿದ ಪೇಸ್ಟ್ ಹಾಕಿ ಸ್ವಲ್ಪ ನೀರು, 1 ಚಮಚ ಜೋಳದ ಹಿಟ್ಟು, ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರಣವನ್ನು ಕುದಿಸಬೇಕು. ನಂತರ ಸೋಯಾ ಸಾಸ್ ಹಾಕಬೇಕು. ಇಷ್ಟು ಮಾಡಿದರೆ ರುಚಿಕರವಾದ ಹಕ್ಕಾ ಚಿಲ್ಲಿ ಚಿಕನ್ ರೆಡಿ.