ಸ್ವಲ್ಪ ಭಿನ್ನ, ಆಧಿಕ ರುಚಿಯ ಫಿಶ್ ರೋಲ್ ರೆಸಿಪಿ

Non Vegetarian

oi-Reena

By Hema S

Updated: Wednesday, July 11, 2012, 12:50 [IST]

ಎಗ್ ರೋಲ್, ಚಿಕನ್ ರೋಲ್ ಸಾಮಾನ್ಯವಾಗಿ ಹೋಟಲ್ ಗಳಲ್ಲಿ ದೊರೆಯುತ್ತದೆ. ಆದರೆ ಫಿಶ್ ರೋಲ್ ಕೆಲವೇ ಕೆಲವು ಹೋಟಲ್ ಗಳಲ್ಲಿ ಮಾತ್ರ ದೊರೆಯುತ್ತದೆ. ಈ ಫಿಶ್ ರೋಲ್ ಅನ್ನು ಸ್ವಲ್ಪ ವಿಭಿನ್ನವಾಗಿ ಮಾಡಬಹುದು.

ಸಾಮಾನ್ಯವಾಗಿ ಚಿಕನ್ ಅಥವಾ ಎಗ್ ರೋಲ್ ಮಾಡುವಾಗ ಪರೋಟದಿಂದ ರೋಲ್ ಮಾಡಿ ಅದರೊಳಗೆ ಮಸಾಲೆ ಮತ್ತು ಚಿಕನ್ ಅಥವಾ ಮೊಟ್ಟೆ ಹಾಕಿ ರೋಲ್ ಮಾಡಿ, ಎಣ್ಣೆಯಲ್ಲಿ ಕರಿದು ಕೊಡಲಾಗುವುದು. ಆದರೆ ಇದರಲ್ಲಿ ಮೀನಿನ ತುಂಡಿನಿಂದಲೇ ರೋಲ್ ಮಾಡಿ ಫಿಶ್ ರೋಲ್ ಮಾಡಲಾಗುವುದು. ತುಂಬಾ ರುಚಿಕರವಾಗಿರುವ ಈ ಫಿಶ್ ರೋಲ್ ಮಾಡುವ ವಿಧಾನ ಸುಲಭವಾಗಿದ್ದು ರೆಸಿಪಿ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು:

* 1/2 ಕೆಜಿ ಮೀನಿನ ತುಂಡುಗಳು (ಮುಳ್ಳು ಇರಬಾರದು)
* ಈರುಳ್ಳಿ 4
* 4 ಹಸಿಮೆಣಸಿನ ಕಾಯಿ
* ಕತ್ತರಿಸಿದ ಕೊತ್ತಂಬರಿ ಸೊಪ್ಪು 1/4 ಕಪ್
* 3 ಮೊಟ್ಟೆ
* 8 ಬ್ರೆಡ್ ಪೀಸ್ ಗಳು (ಅವುಗಳನ್ನು ಪುಡಿಪುಡಿ ಮಾಡಿರಬೇಕು)
* 2 ಚಮಚ ನಿಂಬೆ ರಸ
* ಎಣ್ಣೆ
* ರುಚಿಗೆ ತಕ್ಕ ಉಪ್ಪು
* ಮೆಣಸಿನ ಪುಡಿ 1/2 ಚಮಚ

* ಗರಂ ಮಸಾಲ ಪುಡಿ 1/2 ಚಮಚ ಮತ್ತು ಬೆಳ್ಳುಳ್ಳಿ ಮತ್ತು ಶುಂಠಿ ಪೇಸ್ಟ್ 1 ಚಮಚ

ಸಲಹೆ: ಈ ಫಿಶ್ ರೋಲ್ ಗೆ ಮೀನಿನ ತುಂಡುಗಳಿಂದ ರೋಲ್ ಮಾಡುವ ಕಾರಣ ಸ್ವಲ್ಪ ಅಗಲವಾದ ಮೀನಿನ ತುಂಡು ತೆಗೆದುಕೊಳ್ಳಬೇಕು.

ತಯಾರಿಸುವ ವಿಧಾನ:

1. ಅಗಲವಾದ ಮೀನಿನ ತುಂಡುಗಳನ್ನು ಚೆನ್ನಾಗಿ ತೊಳೆದು ಶುಚಿಗೊಳಿಸಬೇಕು. ನಂತರ ಸ್ವಲ್ಪ ಉಪ್ಪು ಹಾಕಿ ಬದಿಯಲ್ಲಿ ಇಡಬೇಕು.

2. ಈರುಳ್ಳಿಯನ್ನು ಉದ್ದುದ್ದವಾಗಿ ಕತ್ತರಿಸಬೇಕು.

3. ಮೊಟ್ಟೆಯನ್ನು ಒಂದು ಬಟ್ಟಲಿನಲ್ಲಿ ಹಾಕಿ, ಚಿಟಿಕೆಯಷ್ಟು ಉಪ್ಪು ಹಾಕಿ ಚೆನ್ನಾಗಿ ಕದಡಬೇಕು.

4. ನಂತರ 5 ಚಮಚ ಬ್ರೆಡ್ ಚೂರುಗಳು, ಕೆಂಪು ಮೆಣಸಿನ ಹುಡಿ, ಗರಂ ಮಸಾಲ, ನಿಂಬೆ ರಸ, ಬೆಳ್ಳುಳ್ಳಿ ಮತ್ತು ಶುಂಠಿ ಪೇಸ್ಟ್, ಈರುಳ್ಳಿ, ಹಸಿ ಮೆಣಸಿನ ಕಾಯಿ, ಕೊತ್ತಂಬರಿ ಸೊಪ್ಪು, 2 ಚಮಚ ಕದಡಿದ ಮೊಟ್ಟೆ, ರುಚಿಗೆ ತಕ್ಕ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

5. ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ ಕುದಿಯಲು ಇಡಬೇಕು.

6. ನಂತರ ಮೀನಿನ ತುಂಡನ್ನು ರೋಲ್ ರೀತಿ ಮಾಡಿ ಅದರೊಳಗೆ ಮುಕ್ಕಾಲು ಭಾಗದಷ್ಟು ಬ್ರೆಡ್ ಚೂರು, ಮೆಣಸಿನ ಪುಡಿ ಎಲ್ಲಾ ಹಾಕಿ ಮಾಡಿದ ಮಿಶ್ರಣ ತುಂಬಬೇಕು, ನಂತರ ರೋಲ್ ಒಳಗೆ ಕದಡಿದ ಮೊಟ್ಟೆ ಸುರಿದು ಅದನ್ನು ಬ್ರೆಡ್ ಚೂರುಗಳಲ್ಲಿ ಹೊರಳಾಡಿಸಿ ಕುದಿಯುತ್ತಿರುವ ಎಣ್ಣೆಗೆ ಹಾಕಿ, ಮೀನು ಬೆಂದು ಕಂದು ಬಣ್ಣಕ್ಕೆ ಬರುವಾಗ ತೆಗೆದರೆ ರುಚಿಕರವಾದ ಫಿಶ್ ರೋಲ್ ರೆಡಿ.